গীতসংহিতা 35 - Chakma Bible

দায়ূদোর গান্।

¹ ও লগেপ্রভু, যিগুনে মর্ বিপক্ষে তুইয়ো তারার্ বিপক্ষে থাগ্; যিগুনে মঅ বিরুদ্ধে যুদ্ধো গরন্ তুইয়ো তারা বিরুদ্ধে যুদ্ধো গর্।

² চিগোন-দাঙর্ দ্বিয়েন ঢাল তুই তুলি নেযা আর মর্ সাহায্যত্তে এইনে থিয়্যে।

³ মঅ পিজেন্দি যিগুনে লোড়েইনে এত্তন্, সেল্লোই তারার্ এবার্ পথ্‌তান্ তুই নাঢি দে। মরে কঅ, “মুয়ই তর্ উদ্ধোর।”

⁴ যিগুনে মরে মারে ফেলেবাত্তে চাদন্ তারা লাজত্ আর অসর্মানত্ পোড়োদোক্; যিগুনে মর্ সর্বনাশর কুজুরোমি গত্তন্ তারা অগমান্ ওইনে ফিরি যাদন্।

⁵ তারা বোইয়্যের মুয়োত্ তুজো ধোক্ক্যেন্ উড়ি যাদোক্; অয়, লগেপ্রভুর দূত্‌তো তারারে ধাবেই দুয়োক্।

⁶ তারার্ পথ্‌তান্ আন্ধার্ আর বিজোল্ ওক্; অয়, লগেপ্রভুর দূত্‌তো তারারে লোড়োক্।

⁷ তারা এনেবাদে মত্তে গাদ উগুরে হবর্ ন-পেইয়্যে গুরি জাল্ পাত্যন্, এনেবাদে মত্তে গাত্ খুজ্যন্।

⁸ সেনত্তে আদিক্ক্যেন্‌গুরি তারা উগুরে দযা এজোক্; তারার্ হবর্ ন-পেইয়্যে জালত্ তারা ধরা পোড়োদোক্, সে দযাত্ তারা পোড়োদোক্।

⁹ সেক্কে লগেপ্রভুরে নিইনে মুই ফুত্তি গুরিম; তার্ দিয়্যে উদ্ধোরে মুই ফুত্তি গুরিম।

¹⁰ মর্ কিয়্যেগানে সেক্কেনে কবদে, “ও লগেপ্রভু, আর কন্না আগে তঅ ধোক্ক্যেন্? তুয়ই দঅ দুখি মানুচ্চুনোরে উদ্ধোর গরচ্ তারার্ শত্রুগুনোর্ আঢত্তুন্ যিগুনে তারাত্তুনো বেশ্ বোলী; যিগুনে লুদোন্ তারা আঢত্তুন্ তুই দুখি আর নেইয়্যে মানুচ্চুনোরে উদ্ধোর্ গুরি থাচ্।”

¹¹ অত্যেচারিগুনে মিজে সাক্ষি দিবাত্তে উজেই এত্তন্, আর মুই যিয়েনি হবর্ ন-পাং সে পৌইদ্যেনে মরে পুযোর্ গত্তন্।

¹² ভালেদির বদলে তারা মর্ অমংগল গোজ্যন্; হায়, কি দুর্ভাগ্যত্তে মুই!

¹³ তো তারার্ অসুগোর্ সময়োত্ মুই বস্তা ফাদা সিলুম্ উয্যং; উবোস্ থেইনে নিজোরে বল্‌‌পোজ্যে গোজ্যং; মাত্তর্ মঅ তবনাগান মইদু ফিরি এচ্চ্যে।

¹⁴ ভেই আর সমাজ্যে আরেবার ধোক্ক্যেন্ মুই তারাত্তে আবিলেচ্ হেইয়োং; আবিলেচ্ হেবার্ সময়োত্ মা আরাইদে ধোক্ক্যেন্ মাঢা নিগিজ্যং।

¹⁵ মাত্তর্ মুই যেক্কেনে উজোত্ হেলুং সেক্কেনে তারা হুজি ওইনে একযদা অলাক্। সে আক্রমণ গুরিয়্যেগুনে মুই হবর্ ন-পেইয়্যেগুরি মঅ বিরুদ্ধে একযদা অলাক্। তারা মরে আমিঝে গিয়েল্ দিয়্যে ধুরিলাক্।

¹⁶ উৎসবর সময়োত্ গোজেন উগুরে ভোক্তিনেইয়্যে ঠাট্টাগুরিয়্যেগুনো ধোক্ক্যেন্ মর্ বিরুদ্ধে তারা দাত্ কামারা কামারি গরা ধুরিলাক্।

¹⁷ ও প্রভু, আর কয়দিন তুই ইয়েনি দেগেবে? তারার্ অত্যেচারত্তুন্ মরে রোক্ষ্যে গর্; এ সিংহগুনো আঢত্তুন্ মর্ মূল্যবান জিংকানিগান বাঁজা।

¹⁸ বড়্ মিটিঙোত্ মুই তরে ভালেদি জানেম আর গুণি ন-পুড়েইয়্যে মানুচ্চুনো ভিদিরে তর্ গুণগান গুরিম।

¹⁹ মিজে মিজে গুরি যিগুনে মর্ শত্রু ওইয়োন তুই মরে তারার্ তামাজা গরেদে ধোক্ক্যেন্ অবাত্তে ন-দিচ্; এনেবাদে যিগুনে মরে ঘিনেন্ মর্ বিরুদ্ধে তারা চোখকুন্ চিবেচিবি গুরিবাত্তে ন-দিচ্।

²⁰ তারার্ কধানি গমত্তে নয়; দেজত্ যিগুনে সুগ্-শান্দিত্তে বজত্তি গত্তন্ তারা বিরুদ্ধে তারা ছলনালোই ভোজ্যে কুজুরোমি গরন্।

²¹ মর্ বিরুদ্ধে তারা মুয়োন ভেঙেইনে কোইয়োন, “অয়, অয়, আমি নিজো চোগেদি দেখ্যেই।”

²² ও লগেপ্রভু, তুই ইয়েনি দেগেয়োচ্, তুই জুরো গুরি ন-থেচ্; ও প্রভু, তুই মর্ কায় কুরে থাগ্।

²³ মর্ গোজেন, প্রভু মর্, তুই চেদন্ অ, মর্ পক্ষ অ, মর্ পক্ষেদি কধা কঅ।

²⁴ ও লগেপ্রভু, মর্ গোজেন, তর্ ন্যায়লোই মরে বিচের্ গর্; মরে তারার্ ঘিনাইদে ধোক্ক্যেন্ অবাত্তে ন-দিচ্।

²⁵ মনে মনে তারারে কবাত্তে ন-দিচ্, “গম ওইয়্যে! যিয়েন মুই চেইয়োং সিয়েনোই ওইয়্যে।” তারারে কবাত্তে ন-দিচ্, “আমি তারে শেজ্ গুরি দিয়্যেই।”

²⁶ মর্ দজা দেগিনে যিগুনে হুজি অন্ তারা বেক্কুনে লাজত্ পোড়োদোক্ আর অগমান ওদোক্; যিগুনে মঅ উগুরে নিজোরে তুলি ধরন্ তারা লাজত্ আর অগমানত্ পোড়োদোক্।

²⁷ মুই ন্যায়র্ পদথ্ চলঙর্, এ কধাগান যিগুনে শুনোদে গম‌্‌পান তারা হুজি ওইনে রঅ ছাড়োদোক্ আর ফুত্তি গোরোদোক্। তারা আমিঝে কোদোক্, “লগেপ্রভুর বাঈনী ওক্; তার্ চাগরুনোর্ ভালেদি অলে তে হুজি অয়।”

²⁸ মুই জিল্লোই তর্ ন্যায়বিচেরর্ কধানি কোম্, আর সারাদিন তর্ গুণগান গুরি গুরি থেম্।