গীতসংহিতা 34 - Chakma Bibleদায়ূদোর গান। অবীমেলক মুজুঙোত্ দায়ূদে ভান্ গোজ্য, সেনত্তে অবীমেলকে দায়ূদোরে ধাবেই দিয়্যে আর দায়ূদেয়ো যেয়্যেগোই। গান্নো সেই সময়োর। 1 মুই নিত্য লগেপ্রভুর বাঈনী গুরিম; মর্ মুয়োন্দি তার্ গুণগান আমিঝে থেবঅ। 2 মুই লগেপ্রভুরে নিইনে বার্ গুরিম; সিয়েনি শুনিনে দুঘী মানুচ্চুনে হুজি অবাক্। 3 তুমি মঅ লগে লগেপ্রভুর মহিমার কধা কঅ; এজঅ, আমি একসমারে তার্ বাঈনী গুরিই। 4 মুই লগেপ্রভুরে ডাগিলুং, তে মঅ ডাগনিলোই ইজিরে দিলো; মর্ বেক্ দর্বুগোত্তুন তে মরে উদ্ধোর্ গুরিলো। 5 মানুচ্চুনে তাইন্দি যেক্কেনে বিশ্বেজর্ চোগেন্দি চান্ সেক্কেনে তারার্ মুয়োনি জোল্জোল্যে ওই উদে; তারার্ মুয়োনিত্ লাজর্ ভাব্ দেগা ন-যায়। 6 এই অভাগ্যত্যেবো লগেপ্রভুরে ডাগিলো; তে তার্ ডাগনিলোই ইজিরে দিলো আর বেক্ দুঘোত্তুন্ তারে উদ্ধোর্ গুরিলো। 7 যিগুনে লগেপ্রভুরে ভোক্তি গরন্ লগেপ্রভুর্ দূত্তুনে তারার্ চেরোকিত্তে তাম্বুল্ ফেলান্ আর তারারে রোক্ষ্যে গরন্। 8 যগা চাহ্ লগেপ্রভু মংগলময়; বর্পেইয়্যে সেই মানুচ্চো, যিবে তাইদু আশ্রয় নেযায়;। 9 কিত্যে যিগুনে তারে ভোক্তি গরন্ তারার্ কনঅ কিজুর্ অভাব ন-অয়। 10 দামারা সিংহগুনোর্ হানার অভাব অয়, তারা পেত্ফরায় দুঘ্ পান্; মাত্তর্ যিগুনে লগেপ্রভুর আওজ্ মজিম চলন্ তারার্ ভালেদির্ অভাব ন-অয়। 11 পুয়ো-ছাগুন্, এজঅ, মঅ কধানি শুনো, মুই তমারে শিগেম্ কেধোক্ক্যেন্ গুরি লগেপ্রভুরে ভোক্তি গরা পরে। 12 তমা ভিদিরে কন্না এ জিংকানিগান ভোগ গুরিবাত্তে চায়? সুগ্ ভোগ গুরিবাত্তে কন্না ভালোক্ দিন বাঁজি থেবাত্তে চায়? 13 সালে তে জিল্লোই বজং কধা ন-হোক্, আর ঠুট্তোই ছলনার্ কধা বার্ ন-গোরোক্। 14 ভান্ন্যেই কামত্তুন্ দূরোত্ থাগ, গম্ কাম গরঅ; শান্তিত্তে আওজি অ আর তার্ পিজেদিগান্ ন-ছাজ্য। 15 যিগুনে ন্যায়র্ পধেদি চলন্ তারা উগুরে লগেপ্রভুর চোখ্ আঘে; তারার্ ডাগনিগানি শুনিবাত্তে তা কানান্ খুলো আঘে। 16 যিগুনে ভান্ন্যেই কাম্ গরন লগেপ্রভু তারা বিরুদ্ধে থিয়্যেই, যেনে পিত্থিমী বুগোত্তুন্ তারার নাঙানি উদি যায়। 17 যিগুনে ন্যায় কাম গরন্ লগেপ্রভু তারার্ কানানিগানি শুনে; বেগ্ দুগোত্তুন্ তে তারারে উদ্ধোর্ গরে। 18 যিগুনোর মনানি ভাঙি যেয়েগোই লগেপ্রভু তারা ইদু থায়; যিগুনোর মনানি ভাঙি যেয়েগোই তে তারারে উদ্ধোর্ গরে। 19 যে ন্যায়র পধেদি চলে তা দজাগান দাঙর্ অলেয়ো সিয়েনিত্তুন্ লগেপ্রভু তারে উদ্ধোর্ গরে। 20 তার্ বেক্ আড়ুন্ তেয়ই রোক্ষ্যে গরে, সিগুনোর্ এক্কোয়ো ভাঙা ন-অবঅ। 21 অন্যেয়গুরিয়েবোর মরণান অবদে ভান্ন্যেই মানুচ্চুনোর আঢত্; যিগুনে ন্যায় কাম্ গরন্ তারারে ঘিনেইয়্যে মানুচ্চুনোর সাজা অবঅ। 22 লগেপ্রভু তার্ চাগরুনোরে উদ্ধোর্ গরে; যিগুনে তাইদু আশ্রয় নেযান্ তারা কনজনে সাজা ন-পেবাক্। |
Copyright © 2021 Bangladesh Bible Society
Bangladesh Bible Society