গীতসংহিতা 31 - Chakma Bibleগান পরিচালগত্তে। দায়ূদোর গান। 1 ও লগেপ্রভু, মুই তইদু আশ্রয় নেযেয়োং; মরে কনদিন্অ লাজত্ পড়িবাত্তে ন-দিচ্; তর্ ন্যায়বিচেরর্ জোরে মরে তুই রোক্ষ্যে গর্। 2 মঅ কধাগান শুন্; মরে উদ্ধোর্ গুরিবাত্তে তুই যাদিমাদি আয়। মরে রোক্ষ্যে গুরিবাত্তে তুই মর্ আশ্রয়-মুড়ো অগি আর মর্ ঘর্ অগি। 3 তুয়ই মর্ আশ্রয়-মুড়ো আর মর্ ঘর্; তর্ নাঙান্ রোক্ষ্যে গুরিবাত্তে মরে তুই পথ দেগেবে আর চালেই নেযেবে। 4 মত্তেই হবর্ ন-পেইয়্যে গুরি পাদি রাগেয়্যে জালত্তুন্ তুই মরে উদ্ধোর্ গুরিবে, কিত্যে তুয়ই দঅ মর্ আশ্রয়। 5 মুই তঅ আঢত্ মঅ আত্মাগান তুলি দিলুং, ও লগেপ্রভু, বিশ্বেজ্ গুরিবার গোজেন, তুয়ই মরে উদ্ধোর্ গোজ্যস্। 6 যিগুনে বাজে মুত্তিগুনোরে ভোক্তি গরন মুই তারারে ঘিনাং; মাত্তর্ মুই লগেপ্রভু উগুরে বিশ্বেজ্ গরং। 7 তর্ গভিন্ কোচ্পানা পেইয়োং বিলিনে মুই ফুত্তি গুরিম, হুজি ওম; কিত্যে তুই দঅ মর্ দুখ্কানি দেখ্যচ্, আর মর্ দুঘোর্ কধানি হবর্ পাজ্। 8 তুই শত্রুগুনো আঢত্ মরে আক্সোই ন-রাগাচ্, বরং এক্কান খুলো জাগাত্ মরে থিয়্যেই রাগেয়োচ্। 9 ও লগেপ্রভু, মরে দোয়্যে গর্, কিত্যে মুই দুঘোত্ আগং; দুঘে মঅ চোখকুন্ আর মঅ কিয়্যে-মনান্ ভাঙি পোজ্যে। 10 পিড়েলোই মর্ জীংকানিগান গেলঅ, আর ভঅ নিজেস্ ফেলাদে ফেলাদে বয়স্ছান গেলঅ; অন্যেয় গরানার কারনে বলান্ কুমি যার্, মর্ আড়ুন লদক্ দদক্ ওইয়োন। 11 শত্রুগুনে মরে চোগোশাল্ ইজেবে দেগদন্, মর্ সমাজ্যেগুনো ইদু সিয়েনি গোজ্যন্। চিনে পরিচয় মানুচ্চুনো ইদু মুই এক্কো দর্গরেপারা; মানুচ্চুনে মরে পদথ্ দেগিলে ধেই যান্। 12 মরা মান্জ্যরে মান্জ্যে যেধোক্ক্যেন্ ভুলি যান্ সেধোক্ক্যেন্ গুরি তারা মরে ভুলি যেইয়োন্; মুই যেন এক্কো ভাঙা পিলে ধোক্ক্যেন্। 13 মঅ পৌইদ্যেনে ভালোক্ জনর ইংসে-নিন্দের কধা মঅ কানত্ এচ্ছ্যে, মর্ চেরোকিত্তে অমকদ দর্গরেপারা। তারা মঅ বিরুদ্ধে একসমারে সল্লা গত্তন্, মরে মারে ফেলেবাত্তে কুজুরোমি গত্তন্। 14 মাত্তর্ ও লগেপ্রভু, তঅ উগুরে মুই বিশ্বেজ্ গুরি আগঙ্; মুই কঙত্তে, “তুয়ই মর্ গোজেন।” 15 তঅ আঢত্ দঅ মর্ জিংকানিগানর বেক্কানি; যিগুনে মরে লোড়েই এজদন্ সেই শত্রুগুনো আঢত্তুন্ তুই মরে বাঁজা। 16 তর্ চাগর্বো উগুরে তর্ দোয়্যে পহর্ ধোক্ক্যেন গুরি পোড়োক্; তর্ থুম্ ন-ওইয়্যে কোচ্পানালোই তুই মরে রোক্ষ্যে গর্। 17 ও লগেপ্রভু, মুই দঅ তরে ডাক্কোং, তুই মরে লাজত্ পড়িবাত্তে ন-দিচ্; পাজি মানুচ্চুনে বরং লাজত্ পোড়োদোক্, তারা জুরো গুরিনে মরণর জাগানত্ পড়ি থাদোক্। 18 বার্বো আর ঘিনাইদে মনভাবপোই যিগুনে গোজেন ভক্তগুনো বিরুদ্ধে অসর্মানর কধা কন্, তারার্ মিজেকধালোই ভরা মুয়োনি নাঢা যোক্। 19 তুই যে ভালেদি গোজ্যস্ সিয়েন কত্তমান দাঙর্ কাম্! যিগুনে তরে ভোক্তি গরন্ তারাত্তেই তুই সিয়েন তুলি রাগেয়োচ্; তইদু আশ্রয় লোইয়্যেগুনোরে তুই সে ভালেদিগানি গুরি থাচ্, আর সিয়েনি গুরিবে বেক্কুনো মুজুঙোত্। 20 তুই তারারে তর্ চোগো আন্দলত্ রাগেইনে মান্জ্যর্ কুজুরোমিত্তুন্ লুগেই রাগা; কোল্-কোজ্যেত্তুন্ তর্ আশ্রয়লোই তারারে সোরেই রাগা। 21 বর্ পেইয়্যে লগেপ্রভু। ঘিরি রাগেয়্যে শঅর ভিদিরে তার্ অমকদ কোচ্পানা আমক্ অইদে ধোক্ক্যেন্ তে মরে দেগেয়্যে। 22 মুই দোরেইনে কোইয়োঙে, “তঅ মুজুঙোত্তুন্ মুই ফারগ্ ওই যেইয়োং”; মাত্তর্ বল্ পেবাত্তে যেক্কেনে মুই তরে ডাক্কোং সেক্কেনে তুই মর্ কোজোলিগান শুন্যচ্। 23 ও বেক্ গোজেন ভক্ত মানুচ্চুন, তুমি লগেপ্রভুরে কোচ্পেয়ো। লগেপ্রভু বিশ্বেজিগুনোরে রোক্ষ্যে গরে মাত্তর্ বার্বোগুনোরে তে জদবদে সাজা দে। 24 তুমি যিগুনে লগেপ্রভু উগুরে আজা গুরি আগ তুমি মন বল্ আন আর বুগোত্ সাহস বান। |
Copyright © 2021 Bangladesh Bible Society
Bangladesh Bible Society