গীতসংহিতা 30 - Chakma Bible

ঘর-উৎসর্বর এক্কো গান। দায়ূদোর গীদ্।

¹ ও লগেপ্রভু, মুই তর্ বাঈনী গুরিম, কিয়া তুয়ই মরে তুলি আন্যচ্; মঅ শত্রুগুনোরে তুই মঅ বিরুদ্ধে ফুত্তি গুরিবাত্তে ন-দুয়োচ্।

² ও লগেপ্রভু, মর্ গোজেন, বল্ পেবাত্তে তরে ডাক্যং আর তুই মরে গম্ গোজ্যস্।

³ ও লগেপ্রভু, তুই মরে মরণর জাগাত্তুন্ তুলি আন্যচ্; তুয়ই মরে বাঁজে রাগেয়োচ্ যেনে সেই গাত্তোত্ মত্তুন্ লামা ন-পড়ে।

⁴ ও লগেপ্রভুর ভক্তগু্‌ন্, তুমি তা নাঙে গীদ্ গঅ, তার্ পবিত্রতাগানর্ বাঈনী গরঅ;

⁵ কিয়া তা রাগকান্ বেশ্ ন-থায়; তার্ দোয়্যেলোই জিংকানি পাহ্ যায়। বানা কানদে কানদে রেত্তো কাদি যায়, মাত্তর্ বেন্যে পোত্যে হুজিগান্ এজে।

⁶ সুগোর্ দিনোত্ মুই কোয়োংগে, কনজনে মরে লাড়েই ন-পারিবাক্।

⁷ ও লগেপ্রভু, তুই দোয়্যেলোই মর্ রেজ্যগান ঠিগ্ রাগেয়োচ্, মাত্তর্ যেক্কেনে তুই মুয়োন ফিরেলে সেক্কেনে মুই অমকদ দোরেলুং।

⁸ ও লগেপ্রভু, তরে মুই ডাক্কোংগে; মর্ প্রভু ইদু মুই কোজোলি গুরিনে কোইয়োংগে,

⁹ “মর্ মরণত্ বা মরণর জাগাত্ যানাগান কি লাভ? ধূল্যেগানে কি তর্ বাঈনী গুরিবো বা তর্ বিশ্বেজ্‌ছান ফগদাং গুরিবো?

¹⁰ ও লগেপ্রভু, শুনিচ্, মঅ উগুরে দোয়্যে গর্; ও লগেপ্রভু, তুই মরে সাহায্য গর্।”

¹¹ আবিলেচ্ গরানার অনুষ্ঠানত্তুন্ তুই মরে নাচর্ উৎসবত্ আন্যচ্; আবিলেচ্ গরানার কাবড়ানি খুলিনে তুই মরে ফুত্তি গুরিবার কাবড়ানি উরেয়োচ্,

¹² যেনে মঅ মনান্ অলর্ গুরি ন-থায় বরং তঅ নাঙে গান গুরিবো। ও লগেপ্রভু, মর্ গোজেন, মুই জিংকানিবর্ তরে ভালেদি জানেম।