গীতসংহিতা 3 - Chakma Bible

নিজো পুয়ো অবশালোম ইত্তুন্ ধেই যেবার অক্তত্ দায়ূদোর গান।

¹ ও লগেপ্রভু, চাহ্, মর্ শত্রু কুদুক্কুন। চাহ্, মঅ বিরুদ্ধে কুদুক্কুন মানুচ্ থিয়্যেয়োন।

² ভালোকজনে মঅ পৌইদ্যেনে কদন্, “গোজেনে তারে উদ্ধোর্ ন-গুরিবো।”

³ মাত্তর্ ও লগেপ্রভু, তুই মর্ চেরোকিত্তে ঢাল্ ওই আগজ্। তুয়ই মর্ বাঈনী গুরিবার গোজেন; মর্ নিগিজ্যে মাঢাবো তুয়ই অজল্ গোজ্যস্।

⁴ মুই রঅ ছাড়িনে লগেপ্রভুরে ডাগং, আর তে মরে তার্ সুদ্ধো-সাংগ মুড়োবোত্তুন্ জোব্ দে।

⁵ মুই ঘুমোত্ পড়িলুং, আরঅ জাগি উদিলুং, কিয়া লগেপ্রভু মরে ধুরি রাগাই।

⁶ মঅ বিরুদ্ধে মর্ চেরোকিত্তে আজার আজার মানুচ্ উদিনে থিয়্যেয়োন, মাত্তর্ মুই তারারে ন-দরাং।

⁷ ও লগেপ্রভু, আয়; ও মর্ গোজেন, মরে উদ্ধোর্ গর্। তুই মঅ শত্রুগুনোর দাদ মাড়িগানিত্ চুয়োড়্ মারিনে সেই পাজি মানুচ্চুনোর্ দাদ্‌তুন্ ভাঙি দুয়োচ্।

⁸ উদ্ধোর্ গরানা লগেপ্রভুর্ কাম। তঅ নিজো মানুচ্চুনো উগুরে তঅ আশিদ্‌বাদ্‌তান লামি এজোক্।