গীতসংহিতা 29 - Chakma Bible

দায়ূদোর গান।

¹ ও স্বর্গদূত্‌তুন্, তুমি লগেপ্রভুর বাঈনীগান ফগদাং গরঅ, ফগদাং গরঅ লগেপ্রভুর বাঈনীগান্ আর বল্।

² তুমি লগেপ্রভুর বাঈনীগান্ ফগদাঙ্ গরঅ; তার্ মহিমাবলা পবিত্র কধানি ভাবিনে তারে শ্রদ্ধা জান।

³ পানি উগুরে লগেপ্রভুর রঅবো শুনো যায়; আগাজ বাজ্ পড়ানার রবোলোই বাঈনী গুরিবার গোজেনে গুজুরি উদে; বেক্ পানিগান উগুরে আগাজ বাজ রবোত্ রোইয়্যেদে লগেপ্রভুর গুজুরোনিবো।

⁴ লগেপ্রভুর রবো বল্লোই ভরা, মহিমালোই ভোজ্যে সে রবো।

⁵ সেই রবো এরস গাজ্‌সোরেয়ো ভাঙি ফেলায়; লগেপ্রভু লেবাননর্ এরস গাজ্‌সোরে কট্টা কট্ট গোজ্যে।

⁶ তে লেবাননর মুড়ো-মুড়িগুনোরে গোরু ছঅ ধোক্ক্যেন্ নাযায়, আর সিরিয়োন মুড়োগুনোরে নাযায় ঝাড়্‌বো গোরু ছঅ ধোক্ক্যেন্।

⁷ লগেপ্রভুর রবোলোই আগাজত্ ঝিমিলেনি দেগা যায়।

⁸ সে রবোলোই ধূল্যেচর্ গির্‌গিরে উদে; লগেপ্রভু কাদেশর ধূল্যেচরর্-চাগালা গির্‌গিরে তুলে।

⁹ তার্ রবোলোই উরিঙুনে ছঅ ফুদোন্ আর ঝাড়র্ ডেলাগুন,পাদাগানি পড়ি যায়; তার্ থেবার জাগায়ান বেক্কুনোর মুয়োই মুয়োই আঘে, “তে বাঈনী পেবার্।”

¹⁰ দাঙর্ বান পানিগান লগেপ্রভুর অধীনোত্ এলঅ; তে উমরর্ রাজা, তে সিংহাসনত্ আঘে।

¹¹ লগেপ্রভু তা মানুচ্চুনোরে বল্ যুগেই দিবো; সুগ-শান্দি দান গুরিনে তে তারারে আশিদ্‌বাদ গুরিবো।