গীতসংহিতা 28 - Chakma Bible

দায়ূদোর গান।

¹ ও লগেপ্রভু, মর্ আশ্রয়-মুড়োবো, মুই তরে ডাগঙর্। তুই মঅ কধালোই কানান্ ঢাগি ন-থেচ্, কিত্যে তুই যুনি জুরো গুরি থাচ্ মাত্তর্ যিগুনে মরণর জাগাত্ লামি যেইয়োন্ তারা ধোক্ক্যেন মর্ দজা অবঅ।

² বল্ পেবাত্তে মুই যেক্কেনে তরে ডাগঙর্ আর তর্ দাঙর্ সুদ্ধো-সাংগ জাগানর্ ইন্দি আত্ তুলোং, সেক্কেনে তুই মর্ কোজোলীগান শুনিচ্।

³ যিগুনে পাজি, যিগুনে বজং কাম্ গুরি গুরি বেড়ান্, যিগুনে বেক্কুনো সমারে গমেডালে কধা কন্ অদচ ভান্ন্যেয়ানি মনত্ রাগান্, তারা লগে সাজা দিবাত্তে তুই মরে টানি ন-নেযেচ্।

⁴ তারার্ কামর্ ফল, তারার্ ভান্ন্যেই কামর্ ফল, তুই তারারে দিচ্; তারার্ আঢ্‌তানিয়ে যে কামানি গরের্ সিয়েনর ফলুন্ তারারে দে; তারার্ যিয়েনি পাওনা সিয়েনি তারারে দে।

⁵ লগেপ্রভুর আঢ্‌তানিয়ে যে কামানি গোজ্যে সিয়েনি উগুরে তারা মনযোগ ন-দুয়োন, সেনত্তেই তে তারারে ভস্ত গুরিবো, আরঅ ন-তুলিবো।

⁶ ধন্য লগেপ্রভু, তে মর্ কোজোলিগান শুন্যে।

⁷ লগেপ্রভু মর্ বল্ আর মর্ ঢাল ধোক্ক্যেন্; মর্ মনানে তা উগুরে বিশ্বেজ্ গরে, সেনত্তে মুই এজাল্ পেইয়োং; সেনত্তে মঅ মনান্ হুজিয়ে ভুরি উঠ্যে, আর মুই গান্‌দোই তারে ভালেদি জানেম।

⁸ লগেপ্রভু তা মানুচ্চুনোর বল্; তেয়ই তার্ অভিষেগ্ গোজ্যে মানুচ্চুনোর রোক্ষ্যেগুরিয়্যে তাম্বুলো ধোক্ক্যেন্।

⁹ ও লগেপ্রভু, তঅ মানুচ্চুনোরে তুই রোক্ষ্যে গর্, তর্ সোম্বোত্তিগানরে তুই আশিদ্‌বাদ গর্; তুই তারার্ পালক অ আর উমরত্যে তারারে বুয়োই নেযা।