গীতসংহিতা 27 - Chakma Bible

দায়ূদোর গান।

¹ লগেপ্রভুই মর্ পহ্‌র্ আর মর্ উদ্ধোর গুরিয়্যে, মুই কারে দোরেম্? লগেপ্রভু মরে রোক্ষ্যে গুরিবো বেক্ দযানিত্তুন, মুই কনমতে ন দোরেম্।

² পাজি মানুচ্চুনে মরে গিলি হেবাত্তে যেক্কেনে উজেই এজন্ সেক্কে মর্ সেই শত্রু আর বিপক্ষগুনে উজোত্ হেইনে পড়ন্।

³ সৈন্য দলুনেয়ো যুনি মরে ঘিরিনে ধরন্, তো মর্ মনত্ দর্‌বুগ্ ন-লাগিবো; যুনি মঅ বিরুদ্ধে যুদ্ধোয়ো আরম্ভ অয় তো সেক্কেনে মুই নিচিদে থেম্।

⁴ লগেপ্রভুর ইদু মুই এক্কান কোজোলী গরঙর্; মুই যিয়েন্ চাঙর্ সিয়েন্ অলদে- মুই সারা জিংকানিগান যেনে লগেপ্রভুর ঘরত্ বজত্তি গুরি পারং, যেনে মুই তার্ দোলান্ চেই পারং আর সেই থেবার ঘরানত্ তা বেপারান্দোই ধ্যান গুরি পারং;

⁵ কিত্যে দযার্ দিনোত্ তার্ সেই আশ্রয়লোই তে মরে গমেডালে রাগেব, তার্ সে তাম্বুলানত্ মরে লুগেই রাগেব, আর মুড়ো উগুরে মরে তুলি রাগেব।

⁶ যিদুক্কুন্ শত্রুয়ে মরে ঘিরিনে ধোজ্যন্ তারাত্তুন্ বেশ্ সেক্কেনে মর্ সর্মানান্ বাড়িবো; মুই তা ঘরত্ হুজিয়ে রঅ ছাড়ি ছাড়ি নানান্ বাবোত্যে উৎসর্ব গুরিম; মুই লগেপ্রভুর নাঙে গীত্ গেম্ আর তার নাঙ্ গিনেদে গান গেম্।

⁷ ও লগেপ্রভু, মুই ডাগিলে তুই শুনিচ্, মঅ উগুরে দোয়্যে গর্, মুই ডাগিলে জোব্ দিচ্।

⁸ মর্ মনানে তর্ এ কধাগান কত্তে, “তুমি মরে ডাগ।” ও লগেপ্রভু, সেনত্তেই মুই তরে ডাগিম।

⁹ তর্ মুয়োন্ তুই মত্তুন্ ফিরেই ন-রাগেচ্, রাগ্ গুরিনে তুই তঅ চাগর্‌বোরে ফিরেই ন-দিচ্; তুয়ই দঅ মর্ এজাল্ দিয়্যেবো ওইনে এজর্। ও গোজেন, মর্ উদ্ধোর্‌গুরিয়্যে, মরে ফেলেইনে ন-যেচ্, মরে বাদ্ ন-দিচ্।

¹⁰ মর্ মা-বাপ্পুনে মরে ফেলেই গেলেয়ো লগেপ্রভু মঅ ভারান্ নিবো।

¹¹ ও লগেপ্রভু, তর্ পথ্‌তান্ মরে দেগেই দে; মর্ শত্রুগুনোর্ কারনে সং পধেন্দি মরে চালেই নেযা।

¹² মর্ শত্রুগুনোর ইদু মরে ছাড়ি ন-দিচ্, কিত্যে মিজে সাক্ষিগুনে মঅ বিরুদ্ধে থিয়্যেয়োন্; তারার্ নিযেজর্ লগে নিগিলি এজের্ অত্যেচার কধানি।

¹³ লগেপ্রভুর দিয়্যে ভালেদিগানি মুই জেদা মানুচ্চুনোর ইদু দেগিম- এ কধাগান যুনি মুই বিশ্বেজ্ ন-গুরিদুং সালে মর্ কি অদঅ?

¹⁴ তুমি লগেপ্রভুর উগুরে আজা রাগেয়ো; মনবল্ আন আর বুগোত্ সাহস বান আর লগেপ্রভু উগুরে আজা রাগ।