গীতসংহিতা 26 - Chakma Bible

দায়ূদোর গান।

¹ ও লগেপ্রভু, মুই যে ন্যায়র পধেদি আগং সিয়েন তুই দেগেই দে, কিত্যে মুই গমেডালে চলং; মুই থির্ গুরিনে লগেপ্রভু উগুরে বিশ্বেজ্ গরং।

² ও লগেপ্রভু, তুই মরে খাটি বিলিনে প্রমান গর্; মরে যগা চাহ্, আর মঅ মনান্ আর মন চিন্তেগান নিগিলেই ফেলা;

³ কিত্যে নিত্য তর্ জদবদে কোচ্‌‌পানাগান মঅ চোগো মুজুঙোত্ আঘে; তর্ বিশ্বেজর্ কধানি মনত্ রাগেইনে মুই আঢাউদো গরং।

⁴ মুই ঠোগেয়্যেগুনো সমারে ন-থাং, আর ফক্করুনো সমারে উদোন্-বজন্ ন-গরং।

⁵ যিগুনে বজং কাম্ গরন্ তারা দল্লোরে মুই ঘিনাং; মুই পাজিগুনো সমারে বজিবাত্তে রাজি নয়।

⁶ ও লগেপ্রভু, মুই নিদ্দুযি অবস্থায় আঢ্‌‌তান্ ধোই ফেলেম আর তর্ পুজোবোর চেরোকিত্তে ঘুরি এইম্,

⁷ যেনে রঅ ছাড়িনে মুই তরে ভালেদি জানেই পারং, আর তর্ বেক্ আমক্ অইদে কামর্ কধানি কোই পারং।

⁸ ও লগেপ্রভু, যে ঘরত্ তুই বজত্তি গরচ্, তর্ মহিমাগান্ যিয়েনত্ থায়, সে জাগায়ান মুই কোচ্‌‌পাং।

⁹ পাপিগুনোর দলত্ তুই মরে ন-ফেলেচ্; যিগুনে লো-ঝোরেবাত্তে গম্ পান্ তারা সমারে মরে মারে ন-ফেলেচ্।

¹⁰ তারার আঢত্ আগেদে ভান্ন্যেয়র্ ফন্দি, তারার্ ডেন্ আঢ্‌তান্ ঘুজ্‌চোই ভরা।

¹¹ মাত্তর্ মুই গমেডালে আঢা-উদো গরং; মরে তারার্ আঢত্তুন্ উদ্ধোর্ গর্; আর মঅ উগুরে দোয়্যে গর্।

¹² মুই সং জাগাত্ থিয়্যেই আগং; মুই বেক্কুনো মুজুঙোত্ লগেপ্রভুর বাঈনী গুরিম।