গীতসংহিতা 25 - Chakma Bibleদায়ূদোর গান। 1 ও লগেপ্রভু, মঅ মনান্ মুই তইন্দি তুলি দুয়োঙর্। 2 ও মর্ গোজেন, তঅ উগুরে মুই বিশ্বেজ্ গরং, তুই মরে লাজত্ পড়িবাত্তে ন-দিচ্; মর্ শত্রুগুনে যেনে মঅ বেপারানিলোই রঙ্গ-ফুত্তি গুরিবার সুযোগ ন-পান। 3 যে তঅ উগুরে আজা রাগায় তে লাজত্ ন-পড়িবো, মাত্তর্ যিগুনে অকারনে কুজুরোমি গরন্ তারা লাজত্ পড়িবাক্। 4 ও লগেপ্রভু, তর্ পথ্তান্ মরে দেগেই দে, মরে তঅ পধেদি আঢিবাত্তে শিগা। 5 তর্ সত্যলোই মরে পরিচালনা গর্ আর মরে শিক্ষ্যে দে, কিত্যে তুয়ই মর্ উদ্ধোর্গুরিয়্যে গোজেন; নিত্য তঅ উগুরে মুই আজা রাগাং। 6 ও লগেপ্রভু, তর্ মমতা আর অমকদ কোচ্পানার কধা তুই পুরি ন-ফেলেচ্; সিয়েনি দঅ তর্ উমরর্ কাম। 7 মর্ গাবুরো অক্তত্ পাপ্পানি আর তর্ বিরুদ্ধে উল্লোমির কধানি তুই মনত্ ন-রাগেচ্; তর্ ন-পুরেইয়্যে কোচ্পানালোই তুই মরে মনত্ রাগেচ্, কিয়া ও লগেপ্রভু, তুই মংগলময়। 8 লগেপ্রভু মংগলময় আর গম্, সেনত্তেই তার্ পথ্তানি পৌইদ্যেনে তে পাপীগুনোরে শিক্ষ্যে দি থায়। 9 তে নম্রগুনোরে গম পধেদি চালেই নেযায় আর তার্ পথ্তান পৌইদ্যেনে শিক্ষ্যে দে। 10 লগেপ্রভুর বেবস্থা আর রীদি-সুুদোম মজিম্ যিগুনে আঢন্, তারা ইদু তার বেক্ পথ্তানিত্ অমকদ কোচ্পানা আর বিশ্বেজে ভরা। 11 মর্ অন্যেয়র বুধিবো অমকদ বেশ্, সেনত্তে ও লগেপ্রভু, তর্ নাঙান্ রোক্ষ্যে গুরিবাত্তেই মর্ সেই অন্যেয়ানি তুই খেমা গর্। 12 কন্না সেই মানুচ্চো, যে লগেপ্রভুরে ভোক্তি গরে? কন্ পথ্তান্ তাত্তুন্ বেঈ নেযা পড়িবো সিয়েন তুই তারে দেগেই দিবে। 13 তে ভালেদির ভিদিরে তা জিংকানিগান্ কাদেব, আর তা বংশধরুনে দেজর্ গিরোজ্ অবাক্। 14 লগেপ্রভুরে যিগুনে ভোক্তি গরন্ তারা ইদু তে তার্ হবর্ ন-পেইয়্যে উদ্দেশ্যগানি ফগদাং গরে, আর তার্ থিদেবর্ গোজ্যে সুদোমানি তে তারারে জানায়। 15 মর্ চোখকুনে নিত্য লগেপ্রভু ইন্দি আগন্, কিত্যে শিগেরীগুনো জালত্তুন্ তেয়ই মরে মর্ টেঙানি উদ্ধোর্ গুরিবো। 16 মন্দি ফির্ আর মঅ উগুরে দোয়্যে গর্, কিত্যে মুই গায় গায় আর বল্পোজ্যে। 17 মর্ মনর্ পিড়েগান বাড়ি যেইয়্যে; বেক্ দুগোত্তুন্ মরে রোক্ষ্যে গর্। 18 রিনি চাহ্ মর্ দুখ্ আর অমকদ দুঘো ইন্দি; মর্ বেক্ পাপ্পানি তুই ক্ষেমা গর্। 19 রিনি চাহ্, মর্ শত্রু কুদুক্কুন; তারা মরে কি জদবদে ঘিনান্। 20 মঅ পরাণান্ বাঁজা আর মরে রোক্ষ্যে গর্; মরে লাজত্ ন-ফেলেচ্, কিত্যে মুই তইদু আশ্রয় লোইয়োং। 21 মর্ গম আর ন্যায় কামানিয়ে মরে রোক্ষ্যে গোরোক্, কিত্যে মুই তঅ উগুরে মর্ আজাগান রাগেয়োং। 22 ও গোজেন, ইস্রায়েলরে তার বেক্ দুখকানিত্তুন্ উদ্ধোর্ গর্। |
Copyright © 2021 Bangladesh Bible Society
Bangladesh Bible Society