গীতসংহিতা 24 - Chakma Bible

দায়ূদোর গান।

¹ পিত্‌‌থিমী আর তা ভিদিরে বেক্কানি লগেপ্রভুর; জগদৎ আর তা ভিদিরে যিগুনে বজত্তি গরন্ তারায়ো তার্;

² কিত্যে তেয়ই গভীন্ পানি উগুরে পিত্‌‌থিমীর গোড়াগান গাড়েল, আর সেই পিত্‌‌থিমীর মাদিগান তলেদি পানি উগুরে ধুরি রাগেল।

³ কন্না লগেপ্রভুর মুড়োবোত্ উদিবার যগাজ্যে? তার্ পবিত্র জাগানত্ থিয়্যেবার যগাজ্যে কন্না?

⁴ বানা তেয়ই যগাজ্যে, যিবের্ আঢ্‌‌তান্ নিদ্দুজি, মনান্ দোল্, মনান্ মিজে কধা ইন্দি নয়, আর মুয়োদি নেই মিজে শমক্।

⁵ তে লগেপ্রভু ইত্তুন্ আশিদবাদ্ পেবঅ; তে যে তার্ আওজ্ মজিম্ চলের্ তার্ উদ্ধোর গুরিয়্যে গোজেনে সিয়েন্ গোজেই দিবো।

⁶ এবাবোত্যে মানুচ্চুনে লগেপ্রভুর্ উবোসনা গরন, তারা তা মুয়োন্দি রিনি চান্; ইগুনে যাকোবর বংশ।

⁷ ও শঅরর্ গেট্টুন, তমা মাঢাগুন আরঅ উগুরে তুলো; ও আগঅ দিনোর দোরানি, তমা হুক্‌কুন্ বেক্কুন্ খুলি যাদোক্; বাঈনী গুরিবার রাজাবো ভিদিরে সোমেব।

⁸ এই বাঈনী গুরিবার্ রাজাবো কন্না? তে লগেপ্রভু, যিবে বেগত্তুন্ খেমতাবলা আর দাঙর্; সেই লগেপ্রভু, যিবে যুদ্ধোত্ দাঙর্।

⁹ ও শঅরর্ গেট্টুন্, তমা মাঢাগুন্ আরঅ উগুরে তুলো; ও আগ দিনোর দোরানি, তমা হুক্‌কুন বেক্কুন্ খুলি যাদোক্; বাঈনী গুরিবার রাজা ভিদিরে সোমেব।

¹⁰ কন্না এই বাঈনী গুরিবার্ রাজাবো? বেগত্তুন্ খেমতাবলা লগেপ্রভুই বাঈনী পেবার্ রাজা।