গীতসংহিতা 22 - Chakma Bible

গান পরিচালগত্তে। সুর-“বেন্যে মাদান্ উরিঙো ধোক্ক্যেন।” দায়ূদোর গান।

¹ গোজেনে মর্, গোজেনে মর্, কিত্তে তুই মরে ছাড়ি যেইয়োচ্? মরে রোক্ষ্যে ন-গুরিনে, মর্ চোগো পানিয়ে-ভোজ্যে তবনাগান ন-শুনিনে, কিত্তে তুই দূরোত্ সুরি আগচ্?

² ও মর্ গোজেন, দিনোত্ মুই তরে ডাগং, মাত্তর্ তুই জোব্ ন-দুয়োচ্; রেদোত্‌অ মুই জুরো গুরি ন-থাং।

³ মাত্তর্ তুই পবিত্র; ইস্রায়েলীয়গুনোর নাঙ্ গিনিবার সিংহাসনত্ তুই বুয়োই আগচ্।

⁴ তঅ উগুরে বিশ্বেজ্ গুরিদাক্ আমা পুরোণী মানুচ্চুনে; তারা বিশ্বেজ্ গুরিদাক্, আর তুই তারারে রোক্ষ্যে গুরিদে।

⁵ তারা তইদু কানিদাক্ আর রোক্ষ্যে পেদাক্; তঅ উগুরে বিশ্বেজ্ গুরিনে তারা লাজত্ ন-পড়িদাক্।

⁶ মাত্তর্ মুই দঅ বানা এক্কো পুগো ধোক্ক্যেন্, মানুচ্ নয়; মানুচ্চুনে মরে ঈচ্ গরন্ আর মান্‌‌জ্যে মরে ঈচ্ গুরিদাক্।

⁷ যিগুনে মরে রিনি চান্ তারা বেক্কুনে মরে ঠাট্টা গরন্। তারা মরে মু ভেঙান্, আর মাধাবো লাড়েইনে কন্,

⁸ তে দঅ লগেপ্রভু উগুরে বিশ্বেজ্ গরে, সালে তেয়ই তারে রোক্ষ্যে গোরোক্; তেয়ই তারে উদ্ধোর্ গুরিবো, কিত্যে তা উগুরে তে হুজি।

⁹ মা পেদত্তুন্ তুয়ই মরে নিগিলেই আন্যচ্; যেক্কেনে মুই মা দুধ হেদুং সেক্কেনে তঅ উগুরে মর্ বিশ্বেজ্‌ছান তুয়ই জাগেয়োচ্।

¹⁰ জর্মর্ পরেদি মরে তঅ আঢত্ দিয়্যে ওইয়্যে; জর্মত্তুন ধুরি তুয়ই মর্ গোজেন ওইয়োচ্।

¹¹ তুই মত্তুন্ দূরোত্ ন-থেচ্, কিত্যে মঅ দযাগান্ ঘোনেই এচ্ছ্যে, মরে বল্‌‌দিয়্যে কনজন নেই।

¹² মর্ চেরোকিত্তে রোইয়োন যেন বলদ্ গোরুর পাল; যেনে বাশন দেজর্ বোলী বলদ্ গোরুগুনে মরে ঘিরি ধোজ্যন্।

¹³ শিগের্ তোগেবাত্তে সিংহগুনে যেধোক্ক্যেন্ গুজুরোন্, সেধোক্ক্যেন্ গুরি তারা মঅ বিরুদ্ধে মুয়োন্ আহ্ গোজ্যন্।

¹⁴ মরে পানি ধোক্ক্যেন্ গুরি ঢালি দিয়্যে ওইয়্যে, মর্ বেক্ আড়র্ জড়াগুন্ খুলি যেইয়োন, মঅ মনান্ মুমো ধোক্ক্যেন্ ওইনে মঅ ভিদিরেদিগান গুলি পড়ের্।

¹⁵ মাত্যে পিলের্ শুগুনো কট্টা ধোক্ক্যেন্ মঅ বলান্ শুগেই এচ্চ্যে, আর মঅ জিলান্ তাগারাত্ বাচ্চেগোই; তুই মরে গোরত্ পোড়েই রাগেয়োচ্।

¹⁶ মর্ চেরোকিত্তে একদল শদান্ মানুচ্ কুগুরো ধোক্ক্যেন্ মরে ঘিরি ধোজ্যন্; তারা মঅ আঢ্‌‌তানি আর টেঙানিত্ কামেড়েয়োন।

¹⁷ মর্ আড়ুন্ মুই গুণি পারং; সেই মানুচ্চুনে মরে আহ্ গুরি চেই রোইয়োন আর মন্দি চেই আগন্।

¹⁸ তারা তারা মর্ কাবড়-চুগোড়ানি ভাগ্ গত্তন্ আর মঅ সিলুম্মোত্তে চাম্বা চাদন্।

¹⁹ মাত্তর্ তুই, ও লগেপ্রভু, দূরোত্ ন-থেচ্; ও মর্ বলান্, মরে বল্ দিবাত্তে যাদিমাদি উজেই আয়।

²⁰ তলোয়ার মুয়োত্তুন্ মর্ পরাণান, সেই কুগুরুনো মুয়োত্তুন্ মর্ জিংকানিগান তুই রোক্ষ্যে গর্।

²¹ সে সিংহগুনোর্ মুয়োত্তুন্ তুই মরে উদ্ধোর গর্। তুই সেই ঝাড়্‌‌বো বলদ্ গোরুগুনো শিঙুনোত্তুন্ মরে রোক্ষ্যে গুরিলে।

²² ভেইয়ুনো ইদু মুই তঅ পৌইদ্যেনে ফগদাং গুরিম আর আদাম্মেগুনো ইদু তরে নাঙ্ গিনিম।

²³ তুমি যিগুনে লগেপ্রভুরে ভোক্তি গরঅ, তুমি তার্ বাঈনী গরঅ। যাকোবর বেক্ বংশধরুন, তুমি তারে সর্মান দেগঅ। ইস্রায়েলর বেক্ বংশধরুন, তুমি তারে শ্রদ্ধা জানঅ।

²⁴ দুখিগুনোর দুখ্ দেগিনে তারে তে তুচ্ছো বা এলাফেলা ন-গরে; তে তাত্তুন্ নিজোর্ মুয়োন্ ন-ফিরেই, বরং বল্ পেবাত্তে তে তার্ কোজোলীগান শুন্যে।

²⁵ দাঙর্ টেম্মাঙত্ মর্ যে নাঙ্ গিনেনা সিয়েন্ তত্তুনোই এজে; তঅ উগুরে যিগুনোর ভোক্তিবলা দর্ আঘে; তারার্ মুজুঙোত্ মর্ বেক্ মান্যেগানি মুই পূরোণ গুরিম।

²⁶ নম্র মানুচ্চুনোর্ হেইনে ঈল্ অবঅ; যিগুনে লগেপ্রভুর আওজ্ মজিম্ চলন্ তারা তার্ বাঈনী গুরিবাক্। তারা জিংকানিবর্ জেদা থেবাক্।

²⁷ পিত্‌‌থিমীর শেজ্ দুযির্ মানুচ্চুনেয়ো মন ফিরেইনে লগেপ্রভুর ইদু এবাক্; অন্য জাদর্ বেক্ গুট্টিগুনে তারে শ্রদ্ধা জানেবাক্।

²⁸ অয়, রেজ্যগান লগেপ্রভুর; বেক্ জাদ্‌তুনো উগুরে তেয়ই রাজা।

²⁹ পিত্‌‌থিমীর তাগোয়্যে মানুচ্চুনেয়ো সেক্কে তা মুজুঙোত্ হানা-দানা গুরিবাক্ আর তারে শ্রদ্ধা জানেবাক্;

³⁰ ভবিচ্চদ্ বংশধরুনে তারে সেবা গুরিবাক্, আর সেই যুগোর্ মানুচ্চুনো ইদু প্রভুর পৌইদ্যেনে কুয়ো অবঅ।

³¹ যিগুনোর্ এজঅ জর্ম ন-অয়, তারা ইদু যেইনে মানুচ্চুনে তার্ ন্যায্য কধাগানি ফগদাঙ্ গুরিবাক্; কবাক্কে, তেয়ই এ কামানি গোজ্যে।