গীতসংহিতা 21 - Chakma Bible

গান পরিচালগত্তে। দায়ূদোর গান।

¹ ও লগেপ্রভু, তর্ বলান্ দেগিনে রাজা হুজি অয়; তুই তারে জিদেই দিলে তে কত্তমান হুজি অয়।

² তুই তার্ মন আওজ্‌ছান পূরোণ গোজ্যস্, তার্ মুয়ো কধাগান এলাফেলা ন-গরচ্।

³ ভালেদির্ বোউত্ আশিদ্‌বাদ নিইনে তুই তারে আগ্‌বাড়েই আনিবাত্তে যেইয়োচ্, তা মাঢাবোত্ দুয়োচ্ খাটি সনার মুকুট।

⁴ তে তইদু জিংকানি চেইয়্যে, আর তুই তারে সিয়েন দুয়োচ্; তুই তারে বোউত্ আয়ু দুয়োচ্।

⁵ তর্ দিয়্যে জিদেনাগান তার্ সর্মানান বাজ্যে; তুই তারে দুয়োচ্ বাঈনী আর মহিমাগান্।

⁶ তুই তারে জিংকানিবর আশিদ্‌বাদ গোজ্যস্; তর্ এজানার হুজিয়ে তারে হুজি গোজ্যস্।

⁷ লগেপ্রভু উগুরে রাজা বিশ্বেজ্ গরে; দাঙর্ গোজেনর অমকদ কোচ্‌‌পানাগানে তারে থির্ রাগেব।

⁸ তঅ আঢ্‌তানে তর্ বেক্ শত্রুগুনোরে ধুরিবো; যিগুনে তরে ঘিনান্ তর্ ডেন্ আঢ্‌তানে তারারে ধুরিবো।

⁹ তর্ ফগদাং অবার্ অক্তত্ তুই তারারে তুলিবে ছুলোর্ ধোক্‌‌ধোক্যে আঙারা ধোক্ক্যেন। লগেপ্রভু রাগে তারারে গিলি ফেলেব, তা আগুনানে তারারে পুড়ি ফেলেব।

¹⁰ পিত্‌‌থিমীর বুগোত্তুন্ তারার্ বংশধরুনোরে তুই ভস্ত গুরি ফেলেবে; ভস্ত গুরি দিবে তারার্ বংশবো মানেয় ভিদিরেত্তুন।

¹¹ যুনিয়ো তারা তর্ বিরুদ্ধে শদানর্ কুজুরোমি আর ভান্ন্যেই চিন্তে গোজ্যন্, তো তারা সিয়েনিত্ ফোলেই ন-পারিবাক্;

¹² কিত্যে তুই তারার মুয়োনি চেইনে যেক্কে তর্ ধনুগান টানিবে, সেক্কেনে তারারে ধেই যেবাত্তে তুই বাধ্য গুরিবে।

¹³ ও লগেপ্রভু, তর্ বল্লোই তুই ফগদাং অ; আমি তর্ খেমতাগানরে নাঙ্ গিনিবোং আর গান গেবং।