গীতসংহিতা 20 - Chakma Bible

গান পরিচালগত্তে। দায়ূদোর গান।

¹ তর্ দুঘো দিনোত্ লগেপ্রভু তর্ ডাগনিলোই রিনি চোক্; যাকোবর্ গোজেনে তরে গমেডালে রাগোক্।

² তার্ পবিত্র জাগানত্তুন্ তে তরে এজাল্ দোক্ আর সিয়োন মুড়োবোত্তুন্ তরে বল্ দোক্।

³ তর্ বেক্ উৎসর্বর কধানি তার্ মনত্ থোক্, তর্ পুজ্যে-উৎসর্বগুন তে গুজিই লোক্।

⁴ তর্ মনর্ আওজ্‌‌ছানি তে পূরোণ গোরোক্, তর্ বেক্ সল্লাগানি তে ফোলেই দুয়োক্।

⁵ তর্ জিদেনালোই আমি যেন হুজি ওই আর আমা গোজেন নাঙে বাবতা উড়েই। লগেপ্রভু তর্ বেক্ তবনাগানি গ্রাজ্য গোরোক্।

⁶ ইক্কিনে মুই হবর্ পাং, লগেপ্রভু তার্ অভিষেগ্ গোজ্যে মানুচ্চুনোরে রোক্ষ্যে গরে; তার্ ডেন্ আত্তোই রোক্ষ্যে গুরিবার বলান্দোই তে পবিত্র স্বর্গত্তুন তার্ অভিষেগ্ গোজ্যে মান্‌‌‌জ্যর্ ডাগনিলোই ইজিরে দিবো।

⁷ কয়েকজনে তারার্ রথ্‌তানিলোই বাড়্ গরন, কয়েকজনে গরন্ তারার্ ঘোড়ালোই, মাত্তর্ আমি গুরিই আমা গোজেন লগেপ্রভুর।

⁸ তারা তলে পোজ্যন্, তারা পড়ি যেইয়োন, মাত্তর্ আমি মাঢাবো তুলিনে থিয়্যেই আগিই।

⁹ ও লগেপ্রভু, রোক্ষ্যে গর্; ও রাজা, আমা ডাগনিলোই ইজিরে দে।