গীতসংহিতা 2 - Chakma Bible

¹ কিত্তে থির্ নেইয়্যে গুরি বেক্ জাদর মানুচ্চুনে কিজিক্ কাজাক্ গত্তন্? কিত্তে মানুচ্চুনে এনেবাদে কুজুরোমি গত্তন্?

² লগেপ্রভু আর তার্ মশীহর্ বিরুদ্ধে পিত্‌থিমীর রাজাগুনে একসমারে থিয়্যেদন্ আর শাজন্‌গুরিয়্যেগুনে গুমুরো তেম্মাং গত্তন্।

³ তারা কদন্দে, “এজঅ আমি তারার্ শিগোলানি ভাঙি ফেলেই, ছিনি ফেলেই আমা উগুরেত্তুন্ তারার্ বানি রাগেয়্যে ঘিরেগুন।”

⁴ লগেপ্রভু স্বর্গর সিংহাসনত্তুন্ আজের্; তে তারারে ঈচ্ গরের্।

⁵ তে অমকদ বেজার্ ওইনে তারারে থেঝেরা মারিবো, তা রাগর্ আগুনান্ তারার্ মনত্ দর্‌বুগ্ লাগেব।

⁶ লগেপ্রভু কবদে, “মুই যিবেরে রাজা বানেয়োং তারে মর্ সুদ্ধো-সাংগ সিয়োন মুড়োবোত্ বোজেয়োং।”

⁷ রাজা কবদে, “লগেপ্রভু যিয়েন ঠিগ্ গোজ্যে মুই সিয়েন ফগদাঙ্ গুরিম; তে মরে কোইয়্যেদে, তুই মঅ পুয়ো, এচ্চ্যে মুই তঅ বাপ্ ওলুং।

⁸ তুই মইদু চাহ্, সেক্কে সোম্বোত্তি ইজেবে মুই তঅ আঢত্ অযিহূদী জাদ্‌তোরে দিম; পুরো পিত্‌থিমীগান তঅ গজগত্ এবঅ।

⁹ লুয়ো শলালোই তুই তারারে ভাঙি ফেলেবে, নিগুজ্ গুরি দিবে মাত্যে পিলে ধোক্ক্যেন্।”

¹⁰ সেনত্তে ও রাজাগুন্, তুমি ইক্কিনে গমেডালে আঢঅ; পিত্‌থিমীর শাজন্‌গুরিয়্যেগুন, উজিয়ার অ।

¹¹ ভোক্তি গুরিনে তুমি লগেপ্রভুর সেবা গরঅ, দর্‌বুগ্ লাক্ক্যে মনানিলোই ফুত্তি গরঅ,

¹² তুমি সেই পুয়োবোরে সর্মান দেগেইনে চুমো, যেনে তে তমা উগুরে বেজার্ ন-অয় আর আঢি যাদে তুমি ভস্ত ওই ন-যঅ; কিত্যে চোগো মুজুঙোত্ তা রাগ্‌কান জুলি উদি পারে। বর্ পেইয়্যে সিগুন, যিগুনে তাইদু আশ্রয় নেযান।