গীতসংহিতা 19 - Chakma Bible

গান পরিচালগত্তে। দায়ূদোর গান।

¹ আগাজ্‌‌ছানে গোজেনর মহিমাগানরে ফগদাং গরের্, আর আগাজ্‌‌ছানে তুলি ধরের্ তা আঢর্ কামানি।

² পত্তিদিন তারা ভিদিরেত্তুন্ বাণী এজের্, আর রেত্‌কে রেত্ তারা ফগদাং গত্তন্ জ্ঞান।

³ মাত্তর্ সিয়েনত্ কনঅ রঅ নেই, কনঅ ভাষা নেই, তারার্ রঅবো কানেদি শুনো ন-যায়;

⁴ তো তারার্ ডাগনিগান গোদা পিত্‌‌‌থিমীত্ ছিদি পোজ্যে; তারার্ কধানি ছিদি পোজ্যে পিত্‌‌থিমীর থুমোর্ দুযি সং। আগাজত্ বেলানত্তে তে এক্কান্ তাম্বুল্ ঠাঙেয়্যে;

⁵ তে জামেয়ো ধোক্ক্যেন্ গুরি নেগ-মোগোর পত্তম রেদোত্তুন্ নিগিলি এজে, সোজা পধেদি আঢিবো বিলিনে খেলোয়াড়্‌বো-বীরো ধোক্ক্যেন্ হুজি ওই উদিবো;

⁶ তে আগাজ এক কিত্তেদি উদিনে আর অন্য কিত্তেদি ঘুরিনে যায়; তার্ ছদকত্তুন্ কন কিজু বাদ ন-যায়।

⁷ লগেপ্রভুর উগুমোত্ কনঅ ভেজাল্ নেই, সিয়েনে মান্‌‌জ্যরে জাগেই তুলে। লগেপ্রভুর কধানি বিশ্বেজ্ গুরিবার, সিয়েনিয়ে সিদেসিদি মানুচ্চুনোরে জ্ঞান দে।

⁸ লগেপ্রভুর বেক্ সুদোমানিয়ে উজু পধেদি চালায় আর মনানরে হুজি রাগায়। লগেপ্রভুর উগুমান খাটি, সিয়েনে মনানরে ফোট্‌‌ফোট্যে রাগায়।

⁹ লগেপ্রভু উগুরে যে ভোক্তিবলা দর্, সিয়েন্ সিজি আর জনমত্তে থিদেবর্ গোজ্যে। লগেপ্রভুর রীদি-সুদোমানি সত্য, সিয়েনত্ অন্যেয় কিজু নেই।

¹⁰ সিয়েন সনাত্তুন্‌অ, ভালোক্কানি খাটি সনাত্তুন্‌অ বেশ্ বেশ্ আওজ্ গোজ্যে জিনিস। সিয়েন মধুত্তুন্অ বেশ্ মিদে, মুবাত্তুন্ ঝোজ্যে মধুত্তুন্অ বেশ্ মিদে।

¹¹ সিয়েনে তর্ চাগর্‌বোরে উজিয়ার গরে, আর সিয়েনি পালন গুরিলে লাভবান অয়।

¹² নিজোর্ ভুলানি কন্না বুঝে? মর্ হবর্ ন-পেইয়্যে দুষ্‌‌ছানি তুই খেমা গর্।

¹³ হবর্ পেইনে বার্‌বো গোজ্যে পাপত্তুন্ তর্ চাগর্‌‌‌বোরে তুই দূরোত্ রাগা; সিয়েনে যেনে মঅ উগুরে রাজাগিরি ন-গরে। সেক্কেনে তে মুই খাটি ওই পারিম, মুক্ত থেম্ গোজেন উগুরে অমকদ উল্লোমির দায়ত্তুন্।

¹⁴ ও লগেপ্রভু, মর্ আশ্রয়র-মুড়ো, মর্ উদ্ধোর্ গুরিয়্যে, মর্ মুয়োর কধানি আর মর্ মনর্ চিদেগানিয়ে তরে যেন হুজি গরে।