গীতসংহিতা 17 - Chakma Bible

দায়ূদোর তবনা গরানা।

¹ ও লগেপ্রভু, তুই ন্যায়র্ কধা শুনোচ্, মঅ কানানিগান কান্ পাত্; মর্ ছলনা নেইয়্যে মুয়োর্ তবনাগান শুন্।

² মঅ উগুরে তঅ বিচেরান যেন ন্যায্য অয়; যিয়েন সত্য সিয়েন্ তঅ চোগোত্ ধরা পোড়োক্।

³ তুই দঅ মঅ মনানত্ সুমিনে চেইয়োচ্ আর রেদোত্ মরে যগা চেইয়োচ্; মরে পুযোর্ গুরিয়ো চেইয়োচ্ মাত্তর্ কনকিজু ন-পাজ্। মুই ঠিগ্ গোজ্যংগে কনঅ পাপ কধা মর্ মুয়োন্ মুই বেবহার ন-গুরিম।

⁴ মান্‌জ্যে যেদক্কানি কাম গরন সিয়েনি ন-গুরিনে তর্ মুয়ো কধালোই জুলুমোর্ পদত্তুন্ মুই নিজোরে সোরেই রাগেয়োং।

⁵ তঅ পধেদি মুই মঅ টেঙান্ থির্ রাগেয়োং; সিয়োত্তুন মঅ টেঙান্ এক্কেনায়ো ন-লরে।

⁶ ও গোজেন, তুই মঅ ডাগনিলোই শুনিবে, সেনত্তে মুই তরে ডাগঙর্; মঅ কধাগান শুন্, মঅ তবনাগান শুন্।

⁷ তর্ অমকদ কোচ্‌‌পানাগান আমক্ অইদে ধোক্ক্যেন গুরি ফগদাং গর্; শত্রুগুনো আঢত্তুন রোক্ষ্যে পেবাত্তে যিগুনে তইদু আশ্রয় নেযান, তুই ডেন্ আঢ্‌‌তোই তারারে রোক্ষ্যে গুরি থাচ্।

^8-9 চোগো মানেগ ধোক্ক্যেন গুরি তুই মরে রোক্ষ্যে গর্; যিগুনে মঅ উগুরে অত্যেচার্ গরন্ সে পাজিগুনোত্তুন্, যিগুনে মারে ফেলেবাত্তে মরে ঘিরি আগন্ সে শত্রুগুনোত্তুন্, তুই মরে তর্ ডুয়োগানি ছাবালোই রাগা।

¹⁰ তারার বাজে মনর্ দুয়োরান তারা নাঢি রাগেয়োন; তারার্ মুয়োদি বার্বো কধা নিগিলে।

¹¹ তারা ইক্কিনে আমারে ঘিরি ফেলেয়োন্, আমার্ কন জাগাত্ যেবার্ পথ নেই। তারা আমা উগুরে কড়া নজর্ রাগেয়োন যেনে মাদিত্ আমারে ফেলেই দি পারন।

¹² তারা সিংহ ধোক্ক্যেন শিগেরত্তে পাগল, যেনে আন্দলে হাফ্‌‌দি থেইয়্যে দামাড়া সিংহ।

¹³ ও লগেপ্রভু, তুই উঠ্, তারারে থামা, তারারে মাদিত্ ফেলেেই দে। তর্ লাম্বা ছুড়িলোই পাজিগুনোর্ আঢত্তুন মরে উদ্ধোর্ গর্।

¹⁴ ও লগেপ্রভু, সেই মানুচ্চুনোর্ আঢত্তুন, দুনিয়ে মানুচ্চুনো আঢত্তুন, তুই নিজো আঢে মঅ পরানান্ বাঁজা। তারার এ বক্‌শিষ্‌ছানি এ জগদত্ আঘে- তর্ ধন-সোম্বোত্তিগানিলোই তারার পেট ভরে, তারার্ পুয়ো-ছাগুন সয়-সাগোজ্যে অন্, পুয়ো-ছাগুনোত্তে তারা তারার্ ধন-সোম্বোত্তিগানি থোই যান্।

¹⁵ মাত্তর্ মুই যেন নিদ্দুজি ওইনে তঅ মুজুঙোত্ থেই পারং, যেন মরণত্তুন্ জাগি উদিনে তরে দেগিনে মুই হুজি অং।