গীতসংহিতা 149 - Chakma Bible

¹ লগেপ্রভুরে নাঙ্ গিনে ওক্। তুমি লগেপ্রভুর নাঙে নুয়ো গীদ্ গঅ, গোজেন ভক্তগুনো তেম্মাঙত্ তারে নাঙ্ গিনেদে গীদ্ গঅ।

² ইস্রায়েলে তার সিরিষ্টি গুরিয়্যেবোরে নিইনে ফুত্তি গোরোক্, সিয়োন মানুচ্চুনে তারার রাজাবোরে নিইনে হুজিয়্যে রাজিয়্যে থাদোক্।

³ তারা নাজি নাজি তারে বাঈনী গোরোদোক্, খঞ্জনি আর বীণা বাজেইনে গোজেন নাঙে নাঙ্ গিনেদে গীদ্ গাদোক্;

⁴ কিত্তে লগেপ্রভু তা মানুচ্চুন্দোই হুজি অয়; তে নম্র মানুচ্চুনোরে উদ্ধোর্ গুরিনে সর্মান গরে।

⁵ এ সর্মানান্ পেইনে গোজেন ভক্তগুনে ফুত্তি গোরোদোক্; তারা যার্ যার্ বিচ্ছোনত্ রঙ্গ-ফুত্তির গীদ্ গাদোক্।

⁶ তারার্ মুয়োনিত্ গোজেনরে নাঙ্ গিনেনান্ থোক্ আর আঢত্ থোক্ দ্বিকিত্তেন্দি ধার্‌বলা তলোয়ার,

⁷ যেনে তারা জাদ্‌তুনো উগুরে হেনা সুজি পারন্ আর সেই মানুচ্চুনোরে সাজা দি পারন্,

⁸ যেনে শিগোল্লোই তারার্ রাজাগুনোরে বানি পারন্, তারার দাঙর্ পোজিশন মানুচ্চুনোরে লুয়ো শিগোল্লোই বানি পারন্,

⁹ তারার্ বিরুদ্ধে যে রায়য়ান লেগা ওইয়্যে সিয়েন কামত্ লাগেই পারন্। ইয়েনি বেক্কানি তার ভক্তগুনোর্ বাঈনী গুরিবার। লগেপ্রভুরে বাঈনী গরা ওক্।