গীতসংহিতা 147 - Chakma Bible1 লগেপ্রভুরে নাঙ্ গিনো ওক্। আমা গোজেনরে নাঙ্ গিনেদে গান গানা কত্তমান গম্! সিয়েন কি দোল্! তারে বাঈনী গরানা কত্তমান গম্! 2 লগেপ্রভু যিরূশালেমানরে গড়েই তুলিবো; দূর্ গুরি দিয়্যে ইস্রায়েলীয়গুনোরে তেয়ই এগত্তর্ গরে। 3 যিগুনোর্ মনানি ভাঙি যেইয়্যে তে তারারে দোল্ গুরিবো; তারার বেক্ ঘা গানি তেয়ই বানি দে। 4 তে তারাগুনোরে গণে, তারার বেক্কুনোর্ নাঙানি ধুরিনে ডাগে। 5 আমা গোজেনে দাঙর্, তার খেমতা বজমান্; তা জ্ঞান-বুদ্ধির শেজ্ নেইয়্যে। 6 লগেপ্রভু নম্র মানুচ্চুনোরে ধুরি রাগায়, মাত্তর্ পাজি মানুচ্চুনোরে মাদিত্ ফেলেই দে। 7 তুমি লগেপ্রভুর নাঙে ভালেদি গান গঅ; বীণা বাজেইনে আমা গোজেন নাঙে নাঙ্ গিনেদে গান গঅ। 8 তে আগাজ্চান মেঘ্কোই ঢাগি রাগায়; তে পিত্থিমীগানত্তে ঝড় বেবস্থা গরে আর মুড়ো উগুরে ঘাস উদিবাত্তে দে। 9 য়েমানুনো হানাগানি তেয়ই যোগেই দে; কবাগুনো ছঅগুনে যেক্কেনে ডগরন্ সেক্কেনে তেয়ই তারারে হানা দে। 10 ঘোড়া বল্লোই তে হুজি ন-অয়, যুদ্ধোগুরিয়্যেবোর টেঙর্ বলানত্অ তার হুজি নেই; 11 মাত্তর্ যিগুনে তারে ভোক্তিগুরি দরান্ আর তার অমকদ কোচ্পানা উগুরে আজা রাগান্, তারারে নিইনে লগেপ্রভুর যেত্তমান্ হুজি। 12 ও যিরূশালেম, লগেপ্রভুর গুণগান গঅ; ও সিয়োন, তর্ গোজেনরে বাঈনী গর্। 13 তেয়ই দঅ তঅ গেট্তুনোর লাগাড়াগুন দরমর গোজ্যে, তঅ জাগা ভিদিরে বজত্তি গোজ্যে মানুচ্চুনোরে বর্ দিয়্যে। 14 তঅ দুযিগানিত্ তেয়ই সুগ-শান্দি রাগায়, আর বেগত্তুন দোল্ গমবোই তরে আওজ্চান্ পুরেই দে। 15 তে পিত্থিমীত্ তা উগুমানি পাদায়; অমকদ গমেডালে সিয়েনি পালা অয়। 16 তে ভেড়া ছাগল কেশ ধোক্ক্যেন তুষার পাদায় আর ছেইয়ো ধোক্ক্যেন শিরোপানি ছিদি দে। 17 তে রুটি কট্টা ধোক্ক্যেন শিল্ ছিদি ফেলায়; তার দিয়্যে ঠান্ডাগান কন্না সোজ্য গুরি পারে? 18 তার্ কধানি পাধেইনে তে শিল্ গোলেই ফেলায়; তার আভাগান্ বেহ্লে পানি বেঈ যায়। 19 যাকোব ইদু তে তার্ কধানি ফগদাং গোজ্যে, ইস্রায়েল ইদু ফগদাং গোজ্যেদে তার সুদোম আর আইন-কানুনানি। 20 অন্য কনঅ জাদত্তে তে সিয়েনি ন-গরে; তার আইন-কানুনানি তারা হবর্ ন-পান। লগেপ্রভুরে নাঙ্ গিনে ওক্। |
Copyright © 2021 Bangladesh Bible Society
Bangladesh Bible Society