গীতসংহিতা 145 - Chakma Bibleনাঙ্ গিনিবার গান। দায়ূদোর্ গান। 1 ও মর্ গোজেন, ও রাজা, মুই তর্ গুণগান গুরিম; মুই জিংকানিবর্ তরে নাঙ্ গিনিম। 2 পত্তিদিন্ মুই তরে নাঙ্ গিনিম; জিংকানিবর্ তরে বাঈনী গুরিম। 3 লগেপ্রভু দাঙর্ আর বেক্কুনোত্তুন্ বেজ্ নাঙ্ গিনে হেবার্ যগাজ্যে; কনজনে তার গমান্ ন-বুঝোন্। 4 এক বংশর্ মানুচ্ সে পরেদি বংশর্ মানুচ্চুনো ইদু তঅ কামানির গুণগান গুরিবাক্; তারা তর্ খেমতাবলা কাম কধানি ফগদাং গুরিবাক্। 5 মুই তর্ মহিমালোই বাঈনী গুরিবাত্যে সয়-সাগোজ্যে আর তর্ আমক্ অবার কামানি পৌইদ্যেনে ধ্যান গুরিম। 6 মান্জ্যে তর্ দর্গরেপারা আমক্ অবার কামানির খেমতার কধানি কবাক্, আর মুই তর্ গম্ গম্ কধানি ফগদাং গুরিম। 7 তুই যে তারারে বোউত্ ভালেদি গোজ্যস্ সিয়েনি তারা কোই কোই বেড়েবাক্, তর্ ন্যায়র্ কধানিলোই হুজিয়ে গান গেবাক্। 8 লগেপ্রভু দোয়্যে-মেয়্যেলোই তুুজিমপুরো; তে এমনে বেজার্ ন-অয় আর তার অমকদ কোচ্পানার দুযি নেই। 9 লগেপ্রভু বেক্কুনোত্তে ভালেদিগুরিয়্যে; তার বানেয়্যে বেক্কানি উগুরে মেয়্যে আঘে। 10 ও লগেপ্রভু, তুই যিয়েনি বানেয়োচ্ বেক্কানিত্যে তরে ভালেদি জানেবাক্; তর্ ভক্তগুনে তরে বাঈনী গুরিবাক্। 11 তারা তর্ রেজ্যগানর বাঈনী গরেদে কধানি আর তঅ খেমতার কধানি কবাক্; 12 যেনে বেক্ মানুচ্চুনে তর্ খেমতাবলা কাম কধানি হবর্ পান, আর তঅ রেজ্যগানর বাঈনী গরেদে সয়-সাগজ্যে কধানি হবর্ পান। 13 তর্ রেজ্যগান জনমভুরি থিদেবর্ গোজ্যে রেজ্য; তর্ শাজনান্ বংশর পর বংশ ধুরিনে চলিবো। 14 যিগুনে পড়দন্ লগেপ্রভু তারারে ধুরি রাগায়; যিগুনে লুঙি পোজ্যন্ তারারে তে তুলিনে ধরে। 15 আজালোই বেক্কুনে তন্দি চেই থান্; ঠিগ্ সময়োত তুই তারারে হানা দুয়োচ্। 16 বেক পরাণবলাগুনোর মনর্ আওজ্চানি তুই আঢ্তানি খুলিনে পুরেই দি থাচ্। 17 লগেপ্রভু তার বেক্ পধেদি ন্যায়বলা আর বেক্ কামদি বিশ্বেজি। 18 যিগুনে লগেপ্রভুরে ডাগন্, মনদি ডাগন্, তে তারা কায়-কুরে থায়। 19 যিগুনে তারে ভোক্তিগুরিনে দরান্ তারার মন আওজ্চানি তে পুরেই দে; সাহায্যত্তে তারার কানানিগানি শুনিনে তে তারারে রোক্ক্যে গরে। 20 যিগুনে লগেপ্রভুরে কোচ্পান বেক্কুনোরে তে রোক্ক্যে গরে, মাত্তর্ বেক্ পাজিগুনোরে তে ভস্ত গুরি ফেলেব। 21 মঅ মুয়োনে লগেপ্রভুর গুণগান গুরিবো; বেক্ প্রাণীগুনে যুগ যুগ ধুরিনে লগেপ্রভুর পবিত্রতাগান নাঙ্ গিনিবাক্। |
Copyright © 2021 Bangladesh Bible Society
Bangladesh Bible Society