গীতসংহিতা 144 - Chakma Bible

দায়ূদোর্ গান

¹ লগেপ্রভুর বাঈনী ওক্, তে মর্ আশ্রয়-মুড়ো; তে মঅ আঢ্‌তানরে যুদ্ধো গুরিবাত্তে শিগেয়্যে, মঅ আঙুলুনোরে লড়াই গুরিবাত্তে শিগেয়্যে।

² তেয়ই মর্ বিশ্বেজ্ গুরিবার সাহায্যগুরিয়্যে, মর্ ঘর, মর্ অজল্ আশ্রয় জাগা আর উদ্ধোরগুরিয়্যে; তেয়ই মর্ ঢাল্, মুই তাইদু আশ্রয় নেযাং; তেয়ই মঅ মানুচ্চুনোরে মঅ অধীনোত্ আনে।

³ ও লগেপ্রভু, মানুচ্ এদক্ কি ওয়োন্দে, তারা ইন্দি তুই খিয়েল্ গরচ্? মান্‌জ্য পুয়োগুন বা কন্না যে, তারা ইন্দি তুই মনান্ দুয়োচ্?

⁴ মানুচ্ দঅ বানা নিজেস্; তা দিনুন্ সুরি যেইয়্যে ছাবা ধোক্ক্যেন্।

⁵ ও লগেপ্রভু, তঅ আগাজ্‌চান্ লোঙেইনে তুই লামি আয়; তুই মুড়ো-মুড়িগুন ধর্ যেনে সিগুনোত্তুন্ ধূমো নিগিলে।

⁶ তুই ঝিমিলেনি পাধেইনে শত্রুগুনোরে ছিদি দে; তঅ সেলুন্ মারিনে তারারে ওলোমত্য গুরি দে।

⁷ তুই উগুরেত্তুন্ তঅ আত্তানি বাবেই দে; তুই মরে রোক্ক্যে গর্, বান পানিত্তুন, অয়, অন্য জাদর আঢত্তুন্ মরে বাঁজা।

⁸ তারার মুয়োনি ছলনা কধালোই ভরা; তারা ডেন আঢ্‌তান্ তুলিনে মিজে শমক্ গরন।

⁹ ও গোজেন, মুই তঅ নাঙে নুয়ো গান গেম্; দশতারা বাজেইনে মুই তঅ নাঙে নাঙ্ গিনেদে গান গেম্।

¹⁰ তুই দঅ রাজাগুনোরে জিদেই দি থাচ্; তঅ চাগর দায়ূদোরে ফাড়া দজা তলোয়ার আঢত্তুন্ রোক্ক্যে গুরি থাচ্।

¹¹ মরে রোক্ক্যে গর্, অন্য জাদর আঢত্তুন্ মরে বাঁজা; তারার মুয়োনি ছলনা কধালোই ভরা; তারা ডেন আঢ্‌তান্ তুলিনে মিজে শমক্ গরন্।

¹² আমা পুয়োগুন হার্‌গোজ্যে বয়জত্ যেন গাজ চারা ধোক্ক্যেন্ উদোন্, আর আমা ঝি-গুনে যেন রাজঘরর্ ছাজিনে বানেয়্যে খুদো ধোক্ক্যেন অন।

¹³ আমা গোলা ঘরানি যেন নানান্ বাবোত্যে হানালোই ভরা থায়; আমা ভেড়াগুনে যেন মাদত্ আজার্ আজার্, লাখ্ লাখ্ ছঅ পুদোন্।

¹⁴ আমা বলদ্‌তুনে যেন ঘুয়োর্ ঘুয়োর্ বুধি টানি পারন্; আমা দেবালত্ যেন ফাদামারা ন-অয়, কনজনে যেন বন্দি ন-অন্। পধে পধে যেন দুঘোর্ কানানি রঅ শুনো ন-যায়।

¹⁵ বর্ পেইয়্যে সেই জাদ্‌তো, যিবের্ অবস্থা এবাবোত্যে অয়। বর্ পেইয়্যে সেই জাদ্‌তো, লগেপ্রভু যিগুনোর্ গোজেন।