গীতসংহিতা 143 - Chakma Bible

দায়ূদো গান।

¹ ও লগেপ্রভু, মর্ তবনাগান শুন্, মর্ কোজোলী গুরি কানানিগান তুই শুন্; তর্ বিশ্বেজ্‌‌চানে আর গম্ কামানিয়ে মরে জোব্ দে।

² তর্ এ সেবাগুরিয়্যেবোর বিচের ন-গুরিচ্, কিত্তে তঅ চোগেদি কনঅ প্রাণী নিদ্দুযি নয়।

³ শত্রুবো মঅ পিজেদি লোড়েয়্যে, তে মরে কট্টা কট্টা গুরি মাদিত্ ফেলেই দিয়্যে; পুরোণি মরা মানুচ্চুনো ধোক্ক্যেন্ তে মরে আন্ধারত্ বজত্তি গরার্।

⁴ সেনত্তে মুই আজা নেইয়্যে ওইয়োং; মঅ মনান্ বাজে ওই যেইয়্যে।

⁵ মুই পুরোণি দিনুনোর্ কধা ইদোত্ তুলোং, তর্ বেক কামানি পৌইদ্যেনে ধ্যান গরং; তঅ আঢ্‌তানিয়ে যিয়েনি গোজ্যে সিয়েনি ভাবঙর্।

⁶ মুই তন্দি মঅ আঢ্‌তান বাবেই দুয়োং; শুগুনো ভুইয়ো ধোক্ক্যেন্ মঅ পরাণানে তত্তে ধারস্ গরের্।

⁷ ও লগেপ্রভু, তুই মরে যাদিমাদি জোব্ দে, কিত্তে মঅ পরাণানে যেন নিগিলি যাত্তে ধোক্ক্যেন্; মইদু তঅ মুয়োন ফিরেই ন-রাগেচ্, গোরত্ যিগুনোরে লামাদন্ মুই তারা ধোক্ক্যেন্ যেন ন-অং।

⁸ বেন্যেমাদান্ তুই মরে কোচ্‌পানার কধা শুনেচ্, কিত্তে মুই তঅ উগুরে বিশ্বেজ্ গুরি আগং; কন্ পধেদি যাহ্ পুরিবো সিয়েন মরে দেগা; কিত্তে মঅ মনান্ মুই তইন্দি দুয়োঙর্।

⁹ ও লগেপ্রভু, মঅ শত্রুগুনো আঢত্তুন্ তুই মরে উদ্ধোর্ গর্, কিত্তে মুই তইদু আশ্রয় লোইয়োং।

¹⁰ তঅ আওজ্ মজিম কাম গুরিবাত্তে তুই মরে শিগেই দে, কিত্তে তুয়ই মর্ গোজেন; তর্ ভালেদি গরেদে আত্মালোই মরে সং পধেদি চালা।

¹¹ ও লগেপ্রভু, তঅ নাঙান্ রোক্ক্যে গুরিবাত্তে মরে নুয়ো গুরি খেমতা দে; তর্ ধার্মিক্কান্দোই দজাত্তুন্ তুই মরে উদ্ধোর গর্।

¹² তর্ অমকদ কোচ্‌পানার কারনে তুই মঅ শত্রুগুনোরে ফেলেই দে; মর্ বেক বিপক্কগুনোরে তুই ভস্ত গর্, কিত্তে মুই তর্ চাগর্।