গীতসংহিতা 142 - Chakma Bible

গাদত্ থেবার অক্তত্ দায়ূদোর দুঘোর্ তবনার্ গান। এক্কান তবনা।

¹ মুই গুজুরি গুজুরি লগেপ্রভু ইদু কানঙর্; মুই রঅ ছাড়ি ছাড়ি লগেপ্রভু ইদু কোজোলী গরঙর্।

² মঅ দুঘোর্ কধানি মুই তা মুজুঙোত্ কঙর্, মঅ কষ্টর্ কধানি তা মুজুঙোত্ কঙর্।

³ যেক্কেনে মুই আজা নেইয়্যে অং সেক্কেনে তুয়ই মর্ জিংকানির পথ্‌তান পৌইদ্যেনে হবর্ পাজ্; মর্ যেবার পদথ্ মান্‌জ্যে মত্তে ভিদিরে ভিদিরে ফাল্ পাদি রাগেয়োন্।

⁴ মঅ ডেনেন্দি রিনি চাহ্, মরে চিনোন্ এবাবোত্যে কনজন নেই। মর্ ধেই যেবার কনঅ জাগা নেই; কনজনে মঅ পরাণানত্তে চিদে ন-গরন্।

⁵ ও লগেপ্রভু, মুই তইদু কান্যং; মুই কোইয়োঙে, “তুয়ই মর্ আশ্রয়, এ পিত্‌থিমীত্ তুয়ই মর্ সোম্বোত্তি।”

⁶ মঅ কানানিগান তুই শুনিচ্, কিত্তে মুই অমকদ অনালর্ ওইয়োং; মরে যিগুনে লোড়েয়োন্ তারা আঢত্তুন্ তুই মরে বাঁজা, কিত্তে তারা আমাত্তুন্ বেজ্ খেমতাবলা।

⁷ জেলোত্ থাইদ্যে ধোক্ক্যেন্ এ অবস্থাত্তুন্ তুই মরে উদ্ধোর গর্, যেনে মুই তরে বাঈনী গুরি পারং। গোজেনভক্ত মানুচ্চুনে হুজিয়ে মরে ঘিরি থেবাক্, কিত্তে তুই মরে ভালেদি গুরিবে।