গীতসংহিতা 141 - Chakma Bible

দায়ূদো গীদ্।

¹ ও লগেপ্রভু, মুই তরে ডাগঙর্, তুই যাদিমাদি মইদু আয়; মুই ডাগিলে তুই শুনিচ্।

² মঅ তবনাগান্ যেন তুম্বাজ্ আগর্‌বাট্টি ধোক্ক্যেন্, মঅ আঢ্‌তান তুলোনা যেন সাজোন্যে উৎসর্ব ধোক্ক্যেন্ তঅ মুজুঙোত্ আজিল্ অন্।

³ ও লগেপ্রভু, মর্ মুয়োন উগুরে তুই চুগিদার বজা, মঅ ঠুট্‌তোর দরান্ তুই চুগি দে।

⁴ মঅ মনানরে কনঅ ভান্ন্যেই জিনিজোন্দি ঠিলি ন-দিচ্, যেনে অন্যেয়গুরিয়্যেগুনো সমারে ভান্ন্যেই কামত্ ন-মিজেং; তারার গম্ গম্ হানানি যেন মুই ন-হাং।

⁵ এক্কো গোজেনভক্ত মান্‌জ্যে মরে আঘাত্ গোরোক্, সিয়েন অবঅ বিশ্বেজর্ কাম। তে মরে গেইল্ দোক্, সিয়েন অবঅ মঅ মাঢাত্ তেল দেদে ধোক্ক্যেন্; মঅ মাঢাবো সিয়েনরে এলাফেলা ন-গোরোক্। তো মর্ তবনাগানি নিত্য অন্যেইগুরিয়্যেগুনো কামানির বিরুদ্ধে থেবঅ।

⁶ তারার্ শাজন্‌গুরিয়্যেগুনোরে অজল্ মুড়ো উগুরেত্তুন্ তলেদি ফেলেই দিয়্যে অবঅ; সেক্কে তারা মঅ কধানি শুনিবাক্, কিত্তে সিয়েনি মধুর।

⁷ মান্‌জ্যে চাষ গুরিনে যেবাবোত্যে গুরি মাদিগানরে ভাঙি ফেলান্ সেবাবোত্যেগুরি আমা আড়ুন গোরত্ ছিদি দিয়্যে ওইয়্যে।

⁸ মাত্তর্ ও প্রভু লগেপ্রভু, মঅ চোগ্‌কুন তঅ মোক্ক্যেন্দি আগন্; মুই তইদু আশ্রয় নেযেয়োং, মরে মরণ আঢত্ তুলি ন-দিচ্।

⁹ তারা মত্তে যে জালান্ পাত্যন্ সিয়েনত্তুন মরে রোক্ক্যে গর; অন্যেইগুরিয়্যেগুনোর্ পাদি রাগেয়্যে ফালত্তুন্ মরে রোক্ক্যে গর্।

¹⁰ পাজিগুনে তারার নিজো জালত্ নিজে ধরা পোড়োদোক্, আর মুই সে অক্তত্ গমেডালে সিয়েন পার্ ওই যেম্।