গীতসংহিতা 140 - Chakma Bible

গীদ্ পরিচালগত্তে। দায়ূদোর্ গান।

¹ ও লগেপ্রভু, পাজি মানুচ্চুনোর্ আঢত্তুন্ তুই মরে রোক্ক্যে গর্; অত্যেচারি মানুচ্চুনোর্ আঢত্তুন্ মরে রোক্ক্যে গর্।

² তারা মনে মনে কুজুরো ফন্দি গরন্ আর পত্তিদিন যুদ্ধ বাজান্।

³ সাপ ধোক্ক্যেন তারা জিলানি ধারেয়্যে গোজ্যন্; তারা ঠুট্‌ঠুনো তলে যেন সাপ বিষ আঘে।

⁴ ও লগেপ্রভু, পাজিগুনো আঢত্তুন্ মরে রোক্ক্যে গর্। অত্যেচারি মানুচ্চুনো আঢত্তুন্ মরে রোক্ক্যে গর্; মঅ টেঙান্ যেন বিজিদি যায় সেনত্তে তারা ফন্দি গোজ্যন্।

⁵ বাড়্‌বো গুরিয়্যে মানুচ্চুন্ মত্তে ফাল্ আর দুড়ি ঠিগ্ গুরি রাগেয়ো; তারা পধ কুরে তারার্ জালানি বিজেই রাগেয়োন্ আর মত্তে ফাল্ পাত্যন্।

⁶ ও লগেপ্রভু, মুই তরে কোইয়োং, “তুয়ই মর্ গোজেন।” ও লগেপ্রভু, মর্ কোজোলী গুরি কানানিগান তুই শুন্।

⁷ ও লগেপ্রভু, মর্ খেমতাবলা উদ্ধোর্‌গুরিয়্যে, যুদ্ধোত্ তুয়ই মঅ মাঢাবো ঢাগি রাগাচ্।

⁸ ও লগেপ্রভু, পাজিগুনোর্ মন আওজ্‌চানি তুই পূরোণ গুরি ন-দিচ্; তারা কুজুরোমিগানি ফোলেবাত্তে ন-দিচ্, যেনে তারা বাড়্‌বো গুরিয়্যে ন-অন্।

⁹ যিগুনে মরে ঘিরিনে ধোজ্যন্ তারার মুয়োনি যেদক্কানি অন্যেয় গোজ্যে সিয়েনি তারা মাঢা উগুরে পোড়োক্।

¹⁰ তারা উগুরে জোল্‌জোল্যে আঙারা পোড়োক্; আগুনো ভিদিরে, গভীন্ গাদ ভিদিরে তারারে ফেলেই দিয়্যে ওক্; যেন তারা আর্ কনদিন্‌অ উদি এই ন-পারন্।

¹¹ ইংসে-নিন্দে গুরিয়্যেগুনে যেনে দেশ ভিদিরে অধিকার ন-পান; অত্যেচার্ গুরিয়্যেগুনোর্ পিজে পিজে দজাগান্ আমিঝে থেবঅ।

¹² মুই হবর্ পাং লগেপ্রভু দুঘিমানুচ্চুনোর্ তপ্পে রায় দিবো আর নাঢা মানুচ্চুনোত্তে দোল্ বিচের গুরিবো।

¹³ গম্ মানুচ্চুনে হামাক্কাই তরে বাঈনী গুরিবাক্, আর যিগুনে দোল্ মনর্ মানুচ্ তারা তঅ মুজুঙোত্ বজত্তি গুরিবাক্।