গীতসংহিতা 14 - Chakma Bible

গান পরিচালগত্তে। দায়ূদোর গান।

¹ যিগুনোর্ মনানি বাজে তারা মনে গরন্দে গোজেন বিলিনে কনজন নেই। তারার্ খাচ্চ্যত্‌তানি বর্‌বাদ ওই যেইয়্যে, তারার্ কামানি জঘন্য; গম্ কাম্ গরন এবাবোত্যে কনঅ মানুচ্ নেই।

² লগেপ্রভু স্বর্গত্তুন তলে মানুচ্চুনো ইন্দি রিনি চেলঅ, রিনি চেলদে কনজনে গম জ্ঞান্দোই চলন্ নাহি, রিনি চেলদে কনজনে গোজেনর আওজ্-মজিম কাম গরন্ নাহি।

³ তে দেগিলোদে, বেক্কুনে গম পদত্তুন্ সুরি যেইয়োন্, বেক্কুনে একসমারে বজং ওই যেইয়োন; গম কাম্ গরন এবাবোত্যে কনজন নেই, একজনঅ নেই।

⁴ যিগুনে ভান্ন্যেই কাম গুরি বেড়ান্ তারা কি এত্তমান্ অবুঝ্? মানুচ্চুনে যেধোক্ক্যেন্ গুরি হানা খান্ সেধোক্ক্যেন্ গুরিনে তারা আমা মানুচ্চুনোরে হেই পেলান্; তারা লগেপ্রভুরে ন-ডাগন্।

⁵ গোজেনে তা ভক্তগুনোর্ লগে আঘে, সেনত্তেই সেই মানুচ্চুনে অমকদ দোরে দোরে থেবাক্।

⁶ তুমি যিগুনে বজং কাম্ গোজ্য, তুমি দুঘি মানুচ্চুনোর্ কামানি বর্‌বাদ লাগেইনে তারারে লাজত্ ফেলেয়ো, মাত্তর্ লগেপ্রভু তারার্ আশ্রয়।

⁷ ইস্রায়েলীয়গুনোর্ উদ্ধোরান সিয়োন ভিদিরেত্তুন্ এজোক্; লগেপ্রভু যেক্কেনে তা মানুচ্চুনোর্ অবস্থাগান ফিরেব সেক্কেনে যাকোবর বংশগুনে ফুত্তি গুরিবাক্- ইস্রায়েলীয়গুনে হুজি অবাক্।