গীতসংহিতা 139 - Chakma Bibleগান পরিচালগত্তে। দায়ূদোর্ গান। 1 ও লগেপ্রভু, তুই মরে গমেডালে পোরোক্ক্যে গুরি চেয়োচ্ আর মরে হবর্ পেয়োচ্। 2 মুই যিয়েনি গরং সিয়েনি বেক্কানি দঅ তুই হবর্ পাজ্; তুই দূরোত্তুন্ মঅ মন কধানি বুঝোচ্। 3 তুই মর্ কামানি আর জিরেবার পৌইদ্যেনে গমেডালে হবর্ নেযাচ্; তুই মঅ জিংকানির-পথ্তান্ গমেডালে হবর্ পাজ্। 4 ও লগেপ্রভু, কনঅ কধা মঅ মুয়োন্দি কবার্ আগেন্দি তুই সিয়েনি বেক্কানি হবর্ পাজ্। 5 তুই চেরোকিত্যেত্তুন্ মরে ঘিরিনে ধোজ্যস্, আর মরে তঅ অধীনোত্ রাগেয়োচ্। 6 তর্ এ জ্ঞানান্ মুই বুঝি ন-পারঙর্; সিয়েন অমকদ উগুরে, মঅ খেমতার বারেদি। 7 তঅ পবিত্র আত্মাত্তুন্ মুই কুদু যেই পারং? তঅ মুজুঙোত্তুন্ মুই কুদু ধেই পারং? 8 যুনি আগাজত্ যেইনে উদোং, সিদু তুই; যুনি পাদালত্ মঅ বিচ্ছোনান্ পাদং, সিদুয়ো তুই; 9 যুনি বেন্যেমাদান্ পেগো ধোক্ক্যেন ডুয়োনি মিলিনে উদি এজং, যুনি ভূমধ্য সাগর উপারত্ যেইনে বজত্তি গরং, 10 সিদুয়ো তঅ আঢ্তানিয়ে মরে লাগত্ পেবঅ, তঅ ডেন্ আঢ্তানে মরে দরমর গুরি ধুরি রাগেব। 11 যুনি মুই কং, “আন্ধারানে মরে নাঢি ফেলেব, আর মঅ চেরোকিত্তেন্দি যে পহ্রান আঘে সিয়েন আন্ধার্ ওই যেবঅ,” তো সিয়েন্দোই কনঅ লাভ ন-অবঅ; 12 কিত্তে সে আন্ধারান্ দঅ তইদু আন্ধার্ নয়। রেত্তো-দিনো ধোক্ক্যেন পহ্র্; তইদু আন্ধার্ আর পহ্রান্ দ্বিয়েন এক্কুই। 13 তুয়ই মঅ মনান্ বানেয়োচ্; মা পেদত্ তুয়ই মঅ কিয়্যেগান একসমারে বানেয়োচ্। 14 মুই তরে বাঈনী গরং, কিত্তে মুই অমকদ আমক্ ওইদ্যে ধোক্ক্যেন ওইয়োং; আমক্ অবার্ তর্ বেক্ কামানি, মুই সিয়েন গমেডালে হবর্ পাং। 15 যেক্কে মরে গুমুরো জাগানত্ বানা অর্, মা পেদত্ যেক্কে মঅ কিয়্যেগান গমেডালে বানা অর্, সেক্কে মঅ দাঙর্ অনাগান তইদু লুগেয়্যে ন-এলঅ। 16 তঅ চোগ্কুনে মঅ বারি ন-উঠ্যে কিয়্যেগান দেখ্যন্। মত্তে ঠিগ্ গুরি রাগেয়্যে দিনুন্ যেক্কে আরাম্ভ ন-অয়, সেক্কে তঅ বোইবোত্ সে পৌইদ্যেনে বেক্কানি লেগা এলঅ। 17 ও গোজেন, তর্ এ সল্লাগানি মইদু কত্তমান্ মংগা! সিয়েনি বজমান্। 18 যুনি সিয়েনি মুই গুণোং সালে সিয়েনি ধূল্যেচরত্তুন্অ বেশ্। মুই যেক্কেনে জাগি উদোং সেক্কেনে মুই তঅ কায়-কুরে থাং। 19 ও গোজেন, মুই চাং তুই পাজিগুনোরে মারে ফেলা। ও লো চুজি হেইয়্যে মানুচ্চুন্, মত্তুন্ দূর্ ওই যহ্। 20 ভান্ন্যেই মনে তারা তঅ পৌইদ্যেনে নানান্ বাবোত্যে কধা কন্; তঅ শত্রুগুনে বজং আজাই তরে নাঙ্ গিনোন্। 21 ও লগেপ্রভু, যিগুনে তরে এলাফেলা গরন্ মুই কি তারারে এলাফেলা ন-গরং? যিগুনে তঅ বিরুদ্ধে কাম গরন্ মুই কি তারারে ঈচ্ ন-গরং? 22 তারারে মুই এক্কুবারে এলাফেলা গরং; মঅ শত্রু বিলিনে মুই তারারে মনে গরং। 23 ও গোজেন, তুই মরে গমেডালে পোরোক্ক্যে গুরি চাহ্, আর মর্ মন অবস্থাগান জানি লঅ; মরে বিজিরে চাহ্, আর মর্ টেনশন কধা জানি লঅ। 24 তুই চাহ্ মইদু এমন্ কিজু আঘে নাহি যিয়েনিয়ে দুখ্ দে; তুই মরে শেজ্ ন-ওইয়্যে জিংকানির পধেন্দি চালা। |
Copyright © 2021 Bangladesh Bible Society
Bangladesh Bible Society