গীতসংহিতা 137 - Chakma Bible

¹ বাবিলো গাঙানি পারত্ বোইনে আমি যেক্কে সিয়োন কধা ইদোত্ তুলিদোং সেক্কে আমার চোগো পানি পড়িদো।

² সিদুগোর উইলো গাজত্ আমার বাজনাগুন্ আমি টাঙেই রাগেদং।

³ যিগুনে আমারে বানিনে নেযেয়োন সিদু তারা আমারে গীদ্ গেবাত্তে কদাক্; সে অত্যেচারিগুনে আমাত্তুন্ রঙ্গ-ফুত্তির্ গীদ্ শুনিবাত্তে চেদাক্; তারা কদাক্, “তুমি সিয়োনর এক্কো গীদ্ আমারে শুনো।”

⁴ মাত্তর্ বিদেশ মাদিত্ আমি কেধোক্ক্যেন গুরি লগেপ্রভুর গীদ্ গেই পারিদোং?

⁵ ও যিরূশালেম, যুনি মুই তরে ভুলি যাং সালে মঅ ডেন্ আঢ্‌তান যেন লুলো ওই যায়।

⁶ যুনি মুই তরে ইদোত্ ন-রাগাং, যুনি যিরূশালেমরে মুই বেগত্তুন্ বেশ্ রঙ্গ-ফুত্তির জিনিস বিলিনে মনে ন-গরং, তো মঅ জিলানে যেন মঅ তাগারাত্ বাজে।

⁷ ও লগেপ্রভু, যিরূশালেমর ভস্ত দিনোত্ ইদোমীয়গুনে যিয়েনি গোজ্যন্ সিয়েনি ইদোত্ তুলি চাহ্; তারা কোইয়োন্দে, “ভস্ত গরঅ, এক্কুবারে ইয়েনর গড়াগান সং ভস্ত গুরি ফেলঅ।”

⁸ ও বাবিল মিলেবো, তরে ভস্ত গরা অবঅ; তুই যেবাবোত্যে আমা উগুরে গোজ্যস্, যে মানুচ্চো তঅ উগুরে সিয়েনি গুরিবো তে বর্ পেইয়্যে!

⁹ যে মানুচ্চো তঅ চিগোন চিজিগুনোরে ধুরিনে শিলো উগুরে আজেরেব তে বর্ পেইয়্যে!