গীতসংহিতা 136 - Chakma Bible

¹ লগেপ্রভুরে ভালেদি জানঅ, কিত্তে তে গম্; -তার কোচ্‌পানাগান উমরত্তে থিদেবর্ গোজ্যে-

² গোজেন, যিবে বেক্ দেবেদাগুনোত্তুন্‌অ দাঙর্ তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

³ প্রভু, যিবে বেক্ গিরোজ্‌চুনোত্তুন্‌অ বেশ্ দাঙর্ তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে।

⁴ যিবে গায় গায় বেক্ দাঙর্ দাঙর্ কামানি গরে তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

⁵ যিবে তার বুদ্ধিলোই আগাজ্‌চান বানেয়্যে তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

⁶ যিবে পানি উগুরে পিত্‌থিমীগান বোজেই দিয়্যে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

⁷ যিবে দাঙর্ বেলান্, চানানরে আর তারাগুনোরে বানেয়্যে তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

⁸ তে দিন উগুরে রাজাগিরি গুরিবাত্তে বেলানরে বানেয়্যে; - তার কোচ্‌পানাগান উমরত্তে থিদেবর্ গোজ্যে-

⁹ তে রেদো উগুরে রাজাগিরি গুরিবাত্তে চানানরে আর তারাগুনোরে বানেয়্যে; - তার কোচ্‌পানাগান উমরত্তে থিদেবর্ গোজ্যে।

¹⁰ যিবে মিসরীয়গুনোর পত্তম্ পুয়োবোরে আঘাত্ গোজ্যে তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

¹¹ যিবে তারা ভিদিরেত্তুন্ ইস্রায়েলীয়গুনোরে নিগিলেই আন্যে তারে ভালেদি জানঅ; -তার কোচ্‌পানাগান উমরত্তে থিদেবর্ গোজ্যে-

¹² তে দরমর খেমতাবলা আঢ্‌তোই তারারে নিগিলেই আন্যে; -তার কোচ্‌পানাগান উমরত্তে থিদেবর্ গোজ্যে।

¹³ তে লোহিত সাগরানরে দ্বিভাগ গোজ্যে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

¹⁴ তে ইস্রায়েলীয়গুনোরে সাগর সংমোধ্যেন্দি পার্ গুরি আন্যে; - তার কোচ্‌পানাগান উমরত্তে থিদেবর্ গোজ্যে-

¹⁵ মাত্তর্ ফরৌণ আর তা সৈন্যদলুনোরে তে লোহিত সাগরত্ ফেলে দিয়্যে; - তার কোচ্‌পানাগান উমরত্তে থিদেবর্ গোজ্যে।

¹⁶ যিবে তা মানুচ্চুনোরে ধূল্যেচর-চাগালান্দি নেযেয়্যে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

¹⁷ যিবে দাঙর্ দাঙর্ রাজাগুনোরে আঘাত্ গোজ্যে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

¹⁸ তে খেমতাবলা রাজাগুনোরে মারে ফেলেয়্যে; - তার কোচ্‌পানাগান উমরত্তে থিদেবর্ গোজ্যে-

¹⁹ তে ইমোরীয়গুনো রাজা সীহোনরে মারে ফেলেয়্যে; - তার কোচ্‌পানাগান উমরত্তে থিদেবর্ গোজ্যে-

²⁰ তে বাশন রাজা ওগরে মারে ফেলেয়্যে; - তার কোচ্‌পানাগান উমরত্তে থিদেবর্ গোজ্যে-

²¹ তে তারা দেশচানত্ বজত্তি গুরিবাত্তে দি দিলো; - তার কোচ্‌পানাগান উমরত্তে থিদেবর্ গোজ্যে-

²² তে তারা দেশচানত্ বজত্তি গুরিবাত্তে তার সেবাগুরিয়্যে ইস্রায়েলীয়গুনোরে দি দিলো; - তার কোচ্‌পানাগান উমরত্তে থিদেবর্ গোজ্যে।

²³ যিবে আমারে নাঢা অবস্থাত্ থেলেয়ো আমা কধানি ইদোত্ তুল্যে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

²⁴ যিবে শত্রুগুনো আঢত্তুন্ আমারে উদ্ধোর গুরিলো তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে-

²⁵ যিবে বেক্ প্রাণিগুনোরে হানা দে তারে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে।

²⁶ তুমি স্বর্গর্ গোজেনরে ভালেদি জানঅ; - তার কোচ্‌পানাগান উমরত্তে থিদেবর্ গোজ্যে।