গীতসংহিতা 135 - Chakma Bible

^1-2 লগেপ্রভুরে নাঙ্ গিনে ওক্। তুমি লগেপ্রভুরে বাঈনী গরঅ; ও লগেপ্রভুর সেবাগুরিয়্যেগুন, যিগুনে লগেপ্রভুর ঘরত্ সেবা-কামানি গরঅ; যিগুনে আমা গোজেন ঘর উদোনত্ সেবা-কামানি গরঅ, তুমি লগেপ্রভুরে বাঈনী গরঅ।

³ লগেপ্রভুরে বাঈনী গরঅ, কিত্তে তে আজলে গম্; তারে নাঙ্ গিনেদে গীদ্ গঅ, কিত্তে সিয়েন গরানা গম্।

⁴ লগেপ্রভু যাকোবরে তার নিজোত্তে, ইস্রায়েলরে তার নিজোর সোম্বোত্তি অবাত্তে বেঈ লোইয়্যে।

⁵ মুই হবর্ পাং লগেপ্রভু বোউত্ দাঙর্; আমা গিরোজ্‌সো বেক্ দেবদাগুনোত্তুন্অ দাঙর্।

⁶ আগাজত্, পিত্‌থিমীত, সাগরত্ আর পিত্‌থিমীর তলে জাগানত্ লগেপ্রভু তার আওজ্ মজিম কাম গরে।

⁷ তেয়ই পিত্‌থিমীর থুম ধুজিত্তুন্ মেঘকানিরে তুলি আনে; তেয়ই ঝড় দিবাত্তে ঝিমিলেনিগানরে পাধেই দে, আর তার ভান্ডালত্তুন্ বোইয়্যেরানরে নিগিলেই আনে।

⁸ মিসর পত্তম পুয়োগুনোরে তেয়ই আঘাত্ গোজ্যে, আঘাত্ গোজ্যে মানুচ্ আর য়েমান পত্তম ছঅগুনোরে।

⁹ ও মিসর, তে বুগোত্ ফরৌণ আর তার বেক কামগুরিয়্যেগুনোর বিরুদ্ধে তার চিহ্নো আর আমক্ অবার কামানি গোজ্যে।

¹⁰ তে ভালোক্কুন্ জাদরে আঘাত্ গোজ্যে আর খেমতাবলা রাজাগুনোরে মারে ফেলেয়্যে।

¹¹ তে ইমোরীয়গুনোর রাজা সীহোনরে, বাশনর রাজা ওগরে, আর কনানর বেক্ রাজাগুনোরে মারে ফেলেয়্যে।

¹² তে তারার দেশ্‌চান তা মানুচ্ ইস্রায়েলীয়গুনোরে অধিকার ইজেবে দান গুরিলো।

¹³ ও লগেপ্রভু, তঅ নাঙান্ উমরত্তে থিদেবর্ গোজ্যে। ও লগেপ্রভু, বংশর পর বংশ ধুরিনে তঅ নাঙান ইদোত্ থেবঅ;

¹⁴ কিত্তে লগেপ্রভু তা মানুচ্চুনো উগুরে দোল্ বিচের গুরিবো, আর তা চাগরুনো উগুরে মেয়্যে গুরিবো।

¹⁵ অন্য জাদ্‌ত‌ুনোর মূত্তিগুন্ সোনা আর রূবোলোই বানেয়্যে; সিয়েনি মান্‌জ্য আঢ্‌তোই বানেয়্যে।

¹⁶ তারার মু আঘে মাত্তর্ কধা কোই ন-পারন্, চোগ্ আঘে, ন-দেগন;

¹⁷ তারার কান আঘে মাত্তর্ ন-শুনোন্, তারার মুয়োত্ নিজেস্ বিলি কিচ্চু নেই।

¹⁸ যিগুনে ইগুনোরে বানান্ আর তারা উগুরে বিশ্বেজ্ আর নির্ভর গরন তারায়ো সেবাবোত্যে মুত্তিগুনো ধোক্ক্যেন অবাক্।

¹⁹ ও ইস্রায়েলর বংশ, লগেপ্রভুরে বাইনী গরঅ; ও হারোণর বংশ, লগেপ্রভুরে বাইনী গরঅ;

²⁰ ও লেবির বংশ, লগেপ্রভুরে বাঈনী গরঅ; ও লগেপ্রভুর ভক্তগুন্, তুমি গোজেনরে বাঈনী গরঅ।

²¹ লগেপ্রভু, যিবে যিরূশালেমত্ বজত্তি গরে, তারে বাঈনী গরানা সিয়োনত্তুন্ ধুরি আরাম্ভ ওক্। লগেপ্রভুরে নাঙ্ গিনে ওক্।