গীতসংহিতা 132 - Chakma Bible

উগুরে উদিবার গান।

¹ ও লগেপ্রভু, তুই দায়ূদোর বেক্ দুঘোর্ কধানি ইদোত্ তুলি চাহ্।

² তে দঅ লগেপ্রভু ইদু শমক্ হেইয়্যে, যাকোববর্ সেই খেমতাবলা গোজেন ইদু এ এগেমান্ গোজ্যে,

³ “মঅ ঘরানত্ মুই ন-সুমিম্, বা বিচ্চোনত্ অ ঘুম্ ন-যেম্;

⁴ মঅ চোগ্‌কুনোরে ঘুম্ যেবাত্তে ন-দিম, চোগো পাদানিরে চোগ্ কাদিবাত্তে ন-দিম;

⁵ যেদক্কন সং লগেপ্রভুত্তে এক্কান জাগা তোগেইনে ন-পাং, যাকোবর সেই খেমতাবলা গোজেনত্তে এক্কান থেবার জাগা তোগেইনে পেয়োং।”

⁶ আমি ইফ্রাথাত্তুন্ সাক্ষ্য-সুন্দুগোর্ হবরান্ শুন্যেই, যায়ার মাদত্ সেই হবরান্ পেইয়্যেই;

⁷ আদঅ, আমি তাহ্ থেবার জাগানত্ যেই, তার্ টেঙ্-থইদ্যে জাগানত্ মাঢা নিগিরিনে উবোসনা গুরিই।

⁸ ও লগেপ্রভু, উদ্, তঅ জিরেবার জাগানত্ আয়; তুই আয়, আর তর্ খেমতার সুন্দুক্কো এজোক্।

⁹ তঅ ধর্মগুরুগুনে ন্যায়র পোজাক্ উরোদোক্, আর তঅ ভক্তগুনে রঙ্গ-ফুত্তিয়ে গীদ্ গাদোক্।

¹⁰ তঅ চাগর দায়ূদোত্তে তঅ অভিষেগ্ গোজ্যে মানুচ্চুনোর্ তবনাগানি তুই ফিরেই ন-দিচ্।

¹¹ লগেপ্রভু দায়ূদো ইদু এ শমক্তান্ গোজ্যে যিয়েন তে কনদিন্‌অ ন-ভাঙিবো, “তর্ এক্কো পুয়োরে মুই তঅ সিংহাসনানত্ বোজেম্।

¹² তর্ পুয়োগুনে যুনি মঅ থিদেবর্ গোজ্যে সুদোমানি পালান্ আর মঅ কধানি মানন্ যিয়েনি মুই তারারে শিগেম, সালে তারার পুয়োগুনোরে জনমভুরি তঅ সিংহাসনত্ বুজিবাত্তে দিয়্যে অবঅ।”

¹³ লগেপ্রভু সিয়োনানরে বেঈ লোইয়্যে; তাহ্ থেবার জাগানত্তে ইয়েনই তে চেইয়্যে।

¹⁴ তে কোইয়্যেদে, “ইয়েনই মর্ জনমত্তে জিরেবার জাগা; মুই ইয়োদোই বজত্তি গুরিম, কিত্তে মুই সিয়েনই চেয়োং।

¹⁵ মুই সিয়োনানরে ভালোক্কানি হানালোই বর্ দিম; হানালোই সিদুগো নাঢা মানুচ্চুনোরে আওজ্ পুরেই দিম।

¹⁶ মুই সিয়োন ধর্মগুরুগুনোর উদ্ধোরর পজাক্কানি উরেই দিম্; সিদুগোর ভক্তগুনে হুজিয়ে দাঙর্ দাঙর্ গুরি গীদ্ গেবাক্।

¹⁷ মুই সিদু দায়ূদোত্তে এক্কো খেমতাবলা বংশ তুলি দিম; মর্ অভিষেগ্ গোজ্যে মানুচ্চুনোত্তে মুই এক্কো চেরাগ্ জ্বালেবার সুদোম্ গোজ্যং।

¹⁸ মুই তা শত্রুগুনোরে লাজ্ পাইদ্যে পজাক্ উরেই দিম, মাত্তর্ তা মাঢাবোত থেবঅ জোল্ জোল্যে মুকুট।”