গীতসংহিতা 131 - Chakma Bible

উগুরে উদিবার গান। দায়ূদ গান।

¹ ও লগেপ্রভু, মঅ মনান্ বাড়্‌বো নয়, মঅ চোগ্‌কুনোত্ বাড়্‌বোর্ ভাব নেই; যিয়েনি দাঙর্ আর আগাত্যে কাম মর্ গরানা সম্ভব নয় সিয়েনিলোই মুই মাধা ন-ঘামাং।

² মুই মঅ মনানরে অলর্ গুরি রাগেয়োং; দুধ ইরিদিয়্যে চিগোন চিজিগুনে যেধোক্ক্যেন মাবো ইদু গেলে অলর্ গুরি থান, সেধোক্ক্যেনগুরি মইদু মঅ মনানেয়ো অলর্ গুরি আঘে।

³ ও ইস্রায়েল, লগেপ্রভু উগুরে তঅ আজাগান রাগা, ইক্কিনেত্তুন্ ধুরি উমর সং।