গীতসংহিতা 122 - Chakma Bible

¹ মান্‌জ্যে যেক্কে কলাক্ সেক্কে মুই হুজি অলুং, “আদঅ, আমি লগেপ্রভুর ঘরত্ যেই।”

² ও যিরূশালেম, আমি তঅ গেদো ভিদিরে যেইনে থিয়্যেলং।

³ সেই যিরূশালেমানরে এক্কান দোল্ শঅর্ ইজেবে বানা ওইয়্যে, যিয়েন ভিদিরে কনঅ ভস্ত জাগা নেই।

⁴ সিয়োদই বেক্ গুট্টিগুনে উদোন্দোই, লগেপ্রভু মানুচ্চুনোর বেক্ গুট্টিগুন; ইস্রায়েলরে দিয়্যে উগুম্ মজিম তারা উদোন্দোই লগেপ্রভুরে ভালেদি জানেবাত্তে।

⁵ সিয়োদোই আঘে বিচেরর্ বেক্ সিংহাসনানি, দায়ূদো বংশগুনোর বিচেরর্ সিংহাসনানি।

⁶ তুমি যিরূশালেমর সুগ-শান্দিত্ত্যে এ তবনাগান গরঅ, “যিগুনে যিরূশালেমানরে কোচ্‌পান তারার মংগল ওক্।

⁷ সিয়েনর চেরোকিত্তে দেবাল ভিদিরে সুগ্-শান্দি থোক্, আর সিয়েনর রাজঘর বিল্ডিঙো ভিদিরে ভালেদি থোক্।”

⁸ মঅ ভেই-সমাজ্যেগুনোর ভালেদি অবাত্তে মুই কোম্, “যিরূশালেম ভিদিরে সুগ-শান্দি থোক্।”

⁹ আমা গোজেন লগেপ্রভু ঘরান্ সিদু আঘে বিলিনে মুই যিরূশালেমর ভালেদি গুরিবার চেট্ট্যা গুরিম।