গীতসংহিতা 120 - Chakma Bible

উগুরে উদিবার গান।

¹ মুই দজাত্ পড়িনে লগেপ্রভুরে ডাগিলুং, তে মরে জোব্ দিলো।

² ও লগেপ্রভু, মিজেকধা কোইয়্যেগুনোত্তুন্ আর ছলনাগুরিয়্যে জিলানিত্তুন্ তুই মরে রোক্ক্যে গর্।

³ ও ছলনাগুরিয়্যে জিলান্, তে তরে কি দিবো? তে কি তরে আরঅ সাজা ন-দিবো?

⁴ তে তরে যুদ্ধোর্ ধারেয়্যে সেল্ দিবো আর রোতম গাজর ধোক্‌‌ধোক্যে‌ আঙারা।

⁵ হায়! কি দুর্‌ভাগ্যত্তে মুই! মুই মেশকীয়গুনো ধোক্ক্যেন মান্‌জ্য ইদু বজত্তি গরঙর্, কেদরীয়গুনো ধোক্ক্যেন মান্‌জ্য তাম্বুলো ইদু আগং।

⁶ যিগুনে সুগ্-শান্দিরে গম্ পান সেধোক্ক্যেন মান্‌জ্য সমারে মুই আর বজত্তি গুরিবাত্তে নচাং।

⁷ মুই সুগ্-শান্দিরে গম্ পাং, মাত্তর্ যেক্কেনে মুই সুগ্-শান্দি কধা কং সেক্কেনে তারা যুদ্ধো গুরিবাত্তে চান্।