গীতসংহিতা 119 - Chakma Bibleআলেফ 1 বর্ পেইয়্যে সেই মানুচ্চুন, যিগুনে দোল্ জিংকানি কাদান্ আর লগেপ্রভুর উগুম্ মজিম চলন্। 2 বর্ পেইয়্যে সেই মানুচ্চুন, যিগুনে তা কধামজিম্ চলন্ আর মনযোগ দিইনে তার আওজ্ মজিম চলন্। 3 তারা কনঅ ভুল্ ন-গরন; তারা লগেপ্রভুর পধেদি চলন্। 4 তুই সুদোমানি ঠিগ্ গুরি দুয়োচ্ যেন সিয়েনি আমি গমেডালে পালেই। 5 আহ্! তঅ সুদোম্ মজিম চলিবাত্তে যেন মঅ মনান্ থির্ থায়। 6 সালে তঅ বেক্ উগুমানি পালেবাত্তে মুই ন-লাজেম্। 7 তর্ ন্যায়বলা সুদোমর শিক্ষ্যে গত্তে গত্তে মুই গম্ মন্দোই তরে ভালেদি জানেম্। 8 মুই তর্ সুদোম্ মজিম চলিম; মরে এক্কুবারে ছাড়ি ন-যেচ্। 9 গাবুজ্যে কেধোক্ক্যেন্ গুরি তা জিংকানিগান দোল্ গুরি পারিবো? তর্ কধানি পালেইনে সিয়েনি পারিবো। 10 মুই মনদি তরে বিজিরে চাঙর্ তরে জানিবাত্তে মনান্ আওজ্ গরের্; তর্ উগুমোর্ বারেন্দি যেবাত্তে মরে ন-দিচ্। 11 তঅ কধানি মঅ মনানত্ মুই রাগেয়োং, যেনে তর্ উল্লোমি গুরিনে পাপ ন-গরং। 12 ও লগেপ্রভু, তুই বর্ পেইয়্যে। তর্ সুদোমানি মরে শিগেই দে। 13 তঅ মুয়োত্তুন্ যেদক্কানি সুদোম্ নিগিল্যে মর্ মুয়োনে সিয়েনি ফগদাং গুরিবো। 14 ধন-সোম্বোত্তি পেলে মান্জ্যে যেবাবোত্যে হুজি অন্, তঅ কধানি মানিনে মুইয়ো সেবাবোত্যে হুজি অং। 15 মুই তর্ সুদোম পৌইদ্যেনে ধ্যান গরং, আর তর পধ্থানন্দি মনযোগ দুয়োং। 16 তর্ সুদোম ভিদিরে থানা মুই হুজি অং; তর্ কধানি মুই ভুলি ন-যেম। 17 তর্ এ চাগর্বোরে ভালেদি গর্ যেনে মুই বাঁজি থাং আর তঅ কধানি পালেই পারং। 18 মঅ চোগ্কুন খুলি দে যেনে তঅ শিক্ষ্যে ভিদিরে মুই আমক্ অইদে বাবোত্যে কিজু দেগং। 19 মুই দঅ পিত্থিমীত বজত্তি গুরিয়্যে এক্কো বিদেশি; তঅ উগুমান মত্তুন্ লুগেই ন-রাগেচ্। 20 তর্ সুদোমানি হবর্ পেবাত্তে নিত্য মঅ পরাণানর আওজ্ছান বেশ্। 21 তুই বাড়্বো গুরিয়্যে গুনোরে ধমক্ দুয়োচ্; তারা দঅ অভিশাব্ পেইয়্যে, তারা তঅ উগুমান ন-পালেইনে ঘুরি ঘুরি থান্। 22 অগমান আর ঠাট্টা-তামাজাগানি মত্তুন্ দূর্ গর্, কিত্তে মুই তঅ কধানি মানং। 23 যুনিয়ো শাজন্গুরিয়্যেগুনে বোইনে মর্ বিপক্কে কধা কন্ তো তর্ এ চাগর্বো তঅ সুদোমানিলোই ধ্যান গরে। 24 তঅ কধানি মর্ হুজি অইদ্যে কধা; সিয়েনি মরে সল্লা দে। 25 মুই ধূল্যেত্ লুদেই পোজ্যং; তর্ কধা মজিম্ মরে নুয়ো গুরি বল্ দে। 26 মঅ জিংকানির বেক্ কধাগানি মুই তরে জানেয়োং, আর তুই মরে জোব্ দুয়োচ্; তর্ সুদোমানি মরে শিগেই দে; 27 তর্ সুদোমর উগুমানি মরে বুঝোনার খেমতাগান দে; সালে মুই তর্ আমক্ অবার কামানি পৌইদ্যেনে চিন্তে গুরি পারিম। 28 দুঘে মঅ পরাণান্ ভাঙি পোজ্যে; তর্ কধা মজিম্ মরে খেমতা দে। 29 মত্তুন্ ছলনাগানি দূর্ গর্; তুই দোয়্যে গুরি তর্ শিক্ষ্যেগানি মরে দে। 30 মুই বিশ্বেজর পধ্তান বেঈ লোইয়োং; তর্ সুদোমানি মঅ মুজুঙোত্ রাগেয়োং। 31 ও লগেপ্রভু, মুই তঅ কধাগান মনত্ রাগেয়োং; তুই মরে লাজ্ ন-দিচ্। 32 তর্ উগুমে মুই পধেন্দি দাবা যেম্, কিত্তে তুই মর্ মনান্ খুলি দুয়োচ্। 33 ও লগেপ্রভু, তর্ সুদোম পৌইদ্যেনে মরে শিক্ষ্যে দে; যেদক্বুলোন্ বাজং সেদক্বুলোন সং মুই সিয়েনি পালেম্। 34 মরে বুঝোনা খেমতাগান দে, যেনে মুই তর্ উগুম মজিম চলি পারং আর মন দিইনে সিয়েনি পালেই পারং। 35 তর্ উগুমোর পধেন্দি মরে চালা, কিত্তে সিয়েনিলোই মুই হুজি অং। 36 ভান্ন্যেয়ন্দি মঅ মনান যেনে ন-ফিরে, তঅ কধা মজিম তুই মঅ মনান ফিরেই দে। 37 বাজে জিনিসোত্তুন্ তুই মঅ চোগ্কুন ফিরেই দে; তঅ পধেন্দি চলিবাত্তে মরে নুয়োগুরি খেমতা দে। 38 তর্ এ চাগরুনো ইদু তুই যে এগেমান্ গোজ্যস্ সিয়েন তুই পুরেই দে, যেনে মুই তরে ভোক্তি গুরি পারং। 39 মর্ অগমানানি তুই দূর্ গর্ যিয়েনি পৌইদ্যেনে মুই দরাং; ঘেচ্ছেক্গুরি তর্ সুদোমানিয়ে ভালেদি গরে। 40 তর্ সুদোমানি পৌইদ্যেনে মর্ আওজ্ আঘে; তুই গম্ বিলিনে মরে নূয়ো গুরি খেমতা দে। বৌ 41 ও লগেপ্রভু, তর্ থুম্ ন-ওইয়্যে কোচ্পানাগান্ মরে দেগা; তর্ এগেম্ মজিম তুই মরে উদ্ধোর্ গর্। 42 সালে যিগুনে মরে ঈচ্ গরন তারারে মুই জোব্ দি পারিম, কিত্তে মুই তঅ কধানি বিশ্বেজ্ গরং। 43 তর্ সত্যর্ কধানি তুই মঅ মুয়োত্তুন্ এক্কুবারে কাড়ি ন-নেযেচ্, কিত্তে তর্ সুদোমানি উগুরে মুই আজা গুরি আগং। 44 মুই নিত্য তর্ উগুমানি পালেম্, জনমভুরি সিয়েনি পালেম্। 45 মুই গমেডালে জিংকানি কাদেম, কিত্তে তর্ সুদোমর ইন্দি মুই মনান্ দুয়োং। 46 তুই যেদক্কানি কধা কোইয়োচ্ সিয়েনি মুই রাজাগুনো মুজুঙোত্ কোম; মুই ন-লাজেম্। 47 তর্ বেক উগুমানি পালেইলে মুই গম পাং, কিত্তে মুই সিয়েনি গম পাং। 48 তর্ বেক উগুমানি উগুরে মর্ অমকদ আওজ্ আঘে, কিত্তে মুই সিয়েনি গম পাং; তর্ সুদোমানি মুই চিন্তে গরং। 49 তর্ এ চাগর্বো ইদু তুই যে শমক্তান্ গোজ্যস্ সিয়েন ইদোত্ তুলি চাহ্; সিয়েনিলোই দঅ তুই মরে আজা দুয়োচ্। 50 তর্ কধানিয়ে যে মরে নূয়ো গুরি খেমতা দে, দুঘোত্ ইয়েনোই মর্ সান্তনা। 51 বাড়্বো গুরিয়্যেগুনে মরে অমকদ ঈচ্ গরন, মাত্তর্ মুই তঅ উগুমোত্তুন্ এক্কেনায়ো সুরি ন-যাং। 52 ও লগেপ্রভু, বোউত্ আগে দিয়্যে তর্ সুদোমর কধানি মুই ইদোত্ তুলোং আর নিজোরে সান্তনা দুয়োং। 53 পাজি মানুচ্চুনোর পাজিগানি দেগিলে অমকদ মত্তুন্ রাগ লাগে; তারা দঅ তর্ উগুমানি বাদ দুয়োন। 54 মুই যেদকবুলোন্ এ পিত্থিমীত বাঁজি আগং সেদকবুলোন্ তর্ সুদোমানি অবদে মর্ গান। 55 ও লগেপ্রভু, মুই তর্ উগুমানি মানং, আর রেদোত্ তঅ কধানি ইদোত্ তুলোং। ইয়েনোই মর্ অভ্যেস্, 56 মুই তর্ সুদোমানি মানং। 57 ও লগেপ্রভু, তুই মর্ সোম্বোত্তি; মুই তঅ কধানি মানি চলিবাত্তে এগেম্ গোজ্যং। 58 মুই মনান দিইনে তর্ দোয়্যে চেইয়োং; তর্ কধা মজিম্ তুই মঅ উগুরে দোয়্যে গর্। 59 মুই কন পধেন্দি আদাউদো গোজ্যং সে পৌইদ্যেনে চিন্তে গুরি চেইয়োং, সেনত্তে তর্ কধামজিম্ মঅ টেঙানি ফিরেয়োং। 60 তুই যে উগুমানি দুয়োচ্ সিয়েনি মুই যাদিমাদি পালন গোজ্যং, দেরি ন-গরং। 61 পাজি মানুচ্চুনোর দুড়িত্ মুই বানা হেইয়োং, মাত্তর্ মুই তঅ উগুমান ভুলু ন-যাং। 62 তর্ ন্যায়বলা সুদোমানিত্তে ভালেদি জানাদে মুই দিবুজ্যে রেদোত্ উদোং। 63 যিগুনে তরে ভোক্তিগুরি দরান আর তর্ সুদোমানি পালান্ মুই তারার বেক্কুনোর সমাজ্যে। 64 ও লগেপ্রভু, পিত্থিমীগান তর্ কোচ্পানালোই তুজিমপুরো; তর্ সুদোমানি মরে শিগেই দে। 65 ও লগেপ্রভু, তর্ উগুম মজিম্ তর্ এ চাগরুনোরে তুই ভালেদি গর্। 66 মর্ যেনে গম বিচেরবুদ্ধি আর জ্ঞান অয় সেনত্তে তুই মরে শিগেই দে; তর্ বেক উগুমানি মুই বিশ্বেজ্ গরং। 67 দুঘ্ পেবার আগেন্দি মুই ভান্ন্যেই পধেদি এলুং, মাত্তর্ ইক্কিনে মুই তঅ কধার বাধ্য ওইয়োং। 68 তুই গম্ আর ভালেদি গুরি থাচ্; তর্ সুদোমানি মরে শিগেই দে। 69 বাড়্বো গুরিয়্যেগুনে মিজে কধালোই মরে ঢাগি দুয়োন্ মাত্তর্ মুই গমেডালে তর্ সুদোমানি পালাং। 70 তারার মনানি পেদডাম ধোক্ক্যেন দাঙর্, মাত্তর্ মুই তর্ বেক উগুমানিলোই হুজি অং। 71 মুই যে দুঘ্ পেয়োং সিয়েন মত্তে গম ওইয়্যে; সেনত্তে মুই তর্ সুদোমানি শিগি পারঙর্। 72 তর্ মুয়োর উগুমানি মইদু আজার্ আজার্ সোনা-রূবোত্তুন্অ বেশ্ মংগা। 73 তঅ আঢ্তানে মরে বানেয়্যে; মরে বুঝোনা খেমতাগান দে যেনে তর্ বেক উগুমানি মুই জানি পারং। 74 যিগুনে তরে ভোক্তিগুরিনে দরান্ তারা মরে দেগিনে হুজি অন্, কিত্তে মুই তর্ এগেমান উগুরে বিশ্বেজ্ গুরি আগং। 75 ও লগেপ্রভু, মুই হবর্ পাং তর্ সুদোমানি অমকদ গম্; তুই বিশ্বেজি বিলিনে মরে দুঘ্ দুয়োচ্। 76 তর্ এ চাগর্বো ইদু তুই যে এগেমান্ গোজ্যস্ সে ইজেবে তর্ অমকদ কোচ্পানাগান মর্ সান্তনা ওক্। 77 মঅ উগুরে তর্ দোয়্যে-মেয়্যেগান্ লামি এজোক্ যেনে মুই বাঁজি থাং, কিত্তে তর্ উগুমানিয়ে মরে হুজি গরায়। 78 মিজে কধা কোইনে মরে দজাত্ ফেলেবাত্তে বাড়্বো গুরিয়্যেগুনে লাজত্ পোড়োদোক্; মাত্তর্ মুই তর্ সুদোমানি পৌইদ্যেনে ধ্যান গুরিম। 79 যিগুনে তরে ভোক্তিগুরিনে দরান্ আর তর্ কধানি বুঝোন্ তারা মইদু ফিরি এত্তোক্। 80 তর্ সুদোমানি পালাদে মর্ মনান যেন গম্ থায়, যেনে মুই লাজত্ ন-পড়ং। 81 তুই মরে রোক্ক্যে গুরিবে সিয়েন বাজ্জেই থাগদে থাগদে মর্ বলান কুমি যার্; মুই তর্ কধানিত্ আজা রাগেয়োং। 82 তর্ এগেমান্ পূরোণ অবাত্তে বাজ্জেই থাগদে থাগদে মঅ চোগ্কুন গুর্ গুর্ ওইয়োন; মুই কঙে, “কক্কেনে তুই মরে সান্তনা দিবে?” 83 আংগুর-রস রাগাইদ্যে চাম থোইল্যে ধূমোত্ যেধোক্ক্যেন বর্বাত্ ওই যায় মুই সেধোক্ক্যেন ওইয়োং; তো তর্ সুদোমানি মুই ভুলি ন-যাং। 84 তর্ এ চাগর্বো আয়ুগান আর কয়দিন? মরে যিগুনে অত্যেচার গরন্ কমলে তুই তারারে বিচের্ গুরিবে? 85 বাড়্বো গুরিয়্যেগুনে মত্তেই গাদ্ খুজ্যন্; তারা তঅ উগুমানি ন-মানন্। 86 তর্ বেক উগুমানি বিশ্বেজ্ গুরিবার। মান্জ্যে মিজে কধা কোইনে মরে অত্যেচার গরন্; তুই মরে বল্ দে। 87 পিত্থিমীত্তুন্ তারা মরে পেরায় বাদ দুয়োন্, মাত্তর্ তর্ সুদোমানি মুই ইদোত্ রাগেয়োং। 88 তর্ থুম্ ন-ওইয়্যে কোচ্পানালোই তুই মরে নূয়ো খেমতা দে, যেনে তর্ মুয়ো কধানি মুই পালেই পারং। 89 ও লগেপ্রভু, তর্ কধানি স্বর্গত্ জিংকানিবর্ থিদেবর্ আঘে। 90 বংশর পর্ বংশ ধুরিনে তর্ বিশ্বেজ্ছান চলের্; তুই পিত্থিমীগান থিদেবর্ গোজ্যস, আর সিয়েন থির্ আঘে। 91 তর্ সুদোম মজিম্ এজঅ বেক্কানি থির্ আঘে, কিত্তে সিয়েনি তঅ খেমতা ভিদিরে আঘে। 92 তর্ বেক উগুমানিত্ যুনি মুই হুজি ন-অদুং, সালে মর্ দুঘে মুই শেজ্ ওই যেদুং। 93 তর্ সুদোমানি কনদিন্অ মুই ভুলি ন-যেম্, কিত্তে সিয়েনিলোই দঅ তুই মরে নুয়ো বল্ দান গোজ্যস্। 94 মরে রোক্ক্যে গর্, কিত্তে মুই তর্; তর্ সুদোম ইন্দি মুই মনান্ দুয়োং। 95 পাজিগুনে মরে শেজ্ গুরিবাত্তে বাজ্জেই আগন্, মাত্তর্ তর্ কধানিলোই মুই গমেডালে চিদে গুরিম। 96 মুই রিনি চেয়োংগে কনঅ কিচ্ছুর তুজিমপুরো নেই, মাত্তর্ তর্ উগুমানি বেক্কানিত্তুন্ তুজিমপুরো। 97 মুই তর্ উগুমানি কত্তমান্ গমপাং! গোদা দিন্নোবো মুই সিয়েনি ধ্যান গরং। 98 তর্ বেক উগুমানি মঅ শত্রুগুনোত্তুন্ বেশ্ মরে চালাগ্ বানায়, কিত্তে সিয়েনি নিত্য মঅ সমারে সমারে আঘে। 99 মর্ বেক মাস্তরুনোত্তুন্ বেশ্ মুই জ্ঞানবলা, কিত্তে তর্ বেক কধানিলোই মুই ধ্যান গরং। 100 বুড়ো মানুচ্চুনোত্তুন্অ বেশ্ মুই বুঝোং, কিত্তে মুই তর্ সুদোমানি পালাং। 101 বেক্ ভান্ন্যেয়ানিত্তুন্ মুই মঅ টেঙানিরে সোরেই রাগেয়োং, যেনে মুই তর্ কধানি পালেই পারং। 102 তর্ সুদোমর পথ্তানত্তুন্ মুই সোরেই ন-যাং, কিত্তে তুই নিজেই মরে শিগেই দুয়োচ্। 103 তর্ বেক এগেমানি মঅ জিলানত্ কেজান্ মিদে লাগে! সিয়েন মর্ মুয়োন্দি মধুত্তুন্অ বেশ্ মিদে লাগে। 104 তর্ সুদোমানিত্তুন্ মুই বিচেরবুদ্ধি পাং, সেনত্তে মুই বেক্ মিজে পধেন্দি যানাগান ঘিনাং। 105 তর্ কধানি মর্ পধ দেগেবার বাত্তি, মর্ আঢিবার পধ্তান পহর্। 106 মুই তর্ গম সুদোমানি মানি চলিবাত্তে শমক্ গোজ্যং, আর সে শমক্তানি দরমর গোজ্যং। 107 মুই বোউত্ দুঘ্ সোজ্য গোজ্যং; ও লগেপ্রভু, তর্ কধা মজিম মরে নূয়ো খেমতা দে। 108 ও লগেপ্রভু, মুই নিজোর আওজে যে নাঙ্ গিনিবার উৎসর্ব গরং সিয়েন তুই গুজি লঅ, আর তর্ সুদোমানি মরে শিক্ষ্যে দে। 109 যুনিয়ো মঅ জিংকানিগানরে মুই আমিঝে আদঅ মুদোত্ রাগেইনে চলং, তো তর্ উগুমানি মুই ভুলি ন-যাং। 110 পাজিগুনে মত্তে ফাল্ পাত্ত্যন্, মাত্তর্ মুই তর্ সুদোমানিত্তুন্ সুরি ন-যাং। 111 তর্ কধানি মর্ উমরর্ সোম্বোত্তি; সিয়েনি মর্ মনর্ হুজি। 112 নিত্য, এন্ কি, থুম্ সং তঅ সুদোমানি পালেবাত্তে মঅ মনান্ মুই থির্ গোজ্যং। 113 দ্বিমনা মানুচ্চুনোরে মুই গম ন-পাং, মাত্তর্ তঅ উগুমানি মুই গম পাং। 114 তুয়ই মর্ আশ্রয় আর মর্ ঢাল; তঅ কধানি উগুরে মুই আজা রাগেয়োং। 115 তুমি যিগুনে বজং কাম গরঅ, তুমি মত্তুন্ সুরিই যঅ, যেনে গোজেনর উগুমান্ মুই পালেই পারং। 116 তর্ এগেম্ মজিম তুই মরে ধুরি রাগা, সেক্কে মুই বাঁজি থেম; তঅ উগুরে মর্ যে আজাগান্ আঘে সে পৌইদ্যেনে তুই মরে লাজত্ ন-ফেলেচ্। 117 মরে ধর্, সালে মুই রোক্ক্যে পেম, আর তঅ সুদোমানি মুই নিত্য মানি চলিম। 118 তঅ সুদোমর্ বারেন্দি যিগুনে থান তারারে তুই এলাফেলা গোজ্যস্, কিত্তে তারার ভান্ গরানাগান্ অনত্তক্। 119 পিত্থিমীর বেক পাজিগুনোরে তুই কজরা ধোক্ক্যেন ধোই ফেলাচ্, সেনত্তে দঅ তর্ বেক কধানি মুই গম পাং। 120 তঅ দরে মঅ কিয়্যেগান গির্গিরে উদে; তঅ সুদোমানি মুই দরাং। 121 মুই দোল্বিচের্ আর গম কাম গোজ্যং; যিগুনে মরে অত্যেচার গরন্ তারা আঢত্ তুই মরে ইরি ন-দিচ্। 122 তর্ এ চাগর্বো ভালেদি অনার ভারান্ তুই নেযা; বাড়্বোগুনোরে অত্যেচার গুরিবাত্তে মরে ন-দিচ্। 123 তর্ গম কাম মজিম্ তুই যে এগেমান্ গোজ্যস্ সিয়েন পূরোণ অবার তর্ দিয়্যে উদ্ধোরান্ পেবার আজায় মঅ চোগ্কুন গুর্ গুর্ ওইয়োন্। 124 তর্ এ চাগরুনো সমারে তর্ কোচ্পানাগান বেবহার গর্, আর তর্ সুদোমানি মরে শিক্ষ্যে দে। 125 মুই তর্ চাগর্; মরে বুঝোনার খেমতাগান্ দে যেনে মুই তঅ কধাগান বুঝি পারং। 126 ও লগেপ্রভু, ইক্কিনে তর্ কামত্ লামিবার সময় ওইয়্যে; মান্জ্যে দঅ তঅ উগুমান্ অমান্য গোজ্যন্। 127 সেনত্তে মুই তর্ বেক উগুমানি সোনাত্তুন্ বেশ্, খাটি সোনাত্তুন বেশ্ গম পাং। 128 তর্ বেক সুদোমানি মুই ঠিগ্ বিলিনে মনে গরং, আর বেক মিজে পধ্থানি মুই গম ন-পাং। 129 তর্ বেক কধানি অমকদ দোল্, সেনত্তে মুই সিয়েনি পালাং। 130 তঅ কধানি ফগদাং অলে সিয়েনিয়ে পহ্র্ ফুদেই দে; সিয়েনিয়ে সিদেসিদি মানুচ্চুনোরে বুঝিবার খেমতা দে। 131 তর্ উগুমানি পেবাত্তে মুই অমকদ ধারোচ্ গুরি এলুং, যেবাবোত্যে মুই মুয়োন্দি ফবাঙর্। 132 যিগুনে তরে কোচ্পান তারা উগুরে তুই যেধোক্ক্যেন্ গুরি থাচ্, সেধোক্ক্যেন গুরি তুই মইন্দি ফির্ আর মরে দোয়্যে গর্। 133 তর্ কধা মজিম্ গম্ পধেন্দি চলিবাত্তে তুই মঅ টেঙানি ঠিগ্ গুরি দে; কনঅ অন্যেয় যেনে মঅ উগুরে ন-অয়। 134 মানুচ্চুনোর অত্যেচারর্ আঢত্তুন্ তুই মরে উদ্ধোর গর্ যেনে মুই তর্ সুদোমানি পালেই পারং। 135 তর্ দোয়্যে-মেয়্যেগানি পহ্র্ গুরি জ্বলেদে ধোক্ক্যেন্ তর্ এ চাগর্বো উগুরে পোড়োক্; তর্ বেক সুদোমানি মরে শিক্ষ্যে দে। 136 মঅ চোগো পানিগান গঙার ধোক্ক্যেন বেঈ যার্, কিত্তে মান্জ্যে তঅ উগুমান ন-মানন্। সাদে 137 ও লগেপ্রভু, তুই ধার্মিক; তর্ বিচেরানি দোল্। 138 তর্ ধার্মিক্কান্দোই আর বিশ্বেজ্ছান্দোই তুই তর্ সুদোমানি দুয়োচ্। 139 মঅ শত্রুগুনে তঅ কধানি ভুলি যেইয়োন্ বিলিনে তঅ সর্মানান রাগেবাত্তে অমকদ আওজ্ মর্ ওইয়্যে। 140 তঅ কধানি এক্কুবারে খাটি বিলিনে প্রমান ওইয়্যে, সেনত্তে তর্ এ চাগর্বো সিয়েনি কোচ্পায়। 141 যুনিয়ো মুই চিগোন আর নগন্য, তো মুই তর্ সুদোমানি ভুলি ন-যাং। 142 তর্ ধার্মিকতাগান্ উমরত্তে থিদেবর্ গোজ্যে, আর তর্ বেক উগুমানি সত্য। 143 দুঘ্ আর যন্ত্রনা মঅ উগুরে এচ্চ্যে, মাত্তর্ তর্ বেক উগুমানিলোই মুই হুজি থাং। 144 তর্ বেক কধানি উমরত্তে সত্য; মরে সিয়েনি বুঝোনার খেমতাগান দে যেনে মুই বাঁজি থেই পারং। কূফ 145 মনেদি মুই তরে ডাগঙর্; ও লগেপ্রভু, মরে জোব্ দে। মুই তর্ বেক সুদোমানি পালেম্। 146 মুই তরে ডাগঙর্, মরে উদ্ধোর গর্; মুই তর্ বেক কধানি পালেম্। 147 বেন্যেপোত্যে মুই ঘুমোত্তুন্ উদিনে এজাল্ পেবাত্তে কানং; তর্ এগেমান উগুরে মুই বিশ্বেজ্ গুরি আগং। 148 পহ্র্ অবার আগেদি মঅ চোগ্কুনে জাগন্, যেনে তর্ বেক এগেমানিলোই মুই ধ্যান গুরি পারং। 149 তর্ কোচ্পানা মজিম তুই মঅ কধানি শুন; ও লগেপ্রভু, তর্ সুদোম মজিম্ তুই মরে নূয়ো গুরি খেমতা দে। 150 যিগুনে বজং কাম গরন্ তারা কায়কুরে লুম্মোন্দি; তারা তঅ উগুমোত্তুন্ ভালোদ দুরোত্ থান। 151 মাত্তর্ ও লগেপ্রভু, তুই দঅ কায়কুরে আগচ্, আর তর্ বেক উগুমানি সত্য। 152 তর্ কধানিত্তুন্ বোউত্ আগেদি মুই হবর্ পেয়োংগে যে, তুই উমরত্তে সিয়েন থিদেবর্ গোজ্যস্। রেশ 153 মর্ দুঘ্কান্ চাহ্, মরে রোক্ক্যে গর্, কিত্তে মুই তঅ উগুমান্ ভুলি ন-যাং। 154 মর্ তপ্পে ওইনে কধা কঅ, আর মুই যে নিদ্দুযি সিয়েন প্রমান গর্; তর্ এগেম্ মজিম মরে নুয়ো খেমতা দে। 155 পাজিগুনে উদ্ধোরান্ এনেবাদে ন-পেবাক্, কিত্তে তারা তঅ সুদোমানি মন ন-দুয়োন্। 156 ও লগেপ্রভু, তর্ দোয়্যে-মেয়্যেগান বোউত্ বেশ্; তর্ সুদোম মজিম্ মরে নূয়ো খেমতা দে। 157 মঅ শত্রুগুনে আর অত্যেগুরিয়্যেগুনে জনেদি ভালোক্কুন্, মাত্তর্ মুই তঅ কধাত্তুন্ সুরি ন-যাং। 158 কুজুরোমিগুনোরে রিনি চেলে মত্তুন্ ঘিন্ লাগে, কিত্তে তারা তঅ কধামজিম্ ন-চলন্। 159 চাহ্, মুই তর্ সুদোমানি কেধোক্ক্যেন্ গম্ পাং! ও লগেপ্রভু, তর্ কোচ্পানাগান মজিম্ মরে নূয়ো খেমতা দে। 160 তর্ বেক কধানি সত্য; তর্ এক এক্কান ধর্মীয় সুদোম উমরত্তে থিদেবর্ গোজ্যে। শিন 161 শাজন্গুরিয়্যেগুনে এনেবাদে মঅ উগুরে অত্যেচার গরন্, মাত্তর্ মঅ মনানত্ তঅ কধানি উগুরে ভোক্তিগোজ্যে দর্ আঘে। 162 যুদ্ধোত্ পেইয়্যে পযাপিরালোই মান্জ্যে যেবাবোত্যে হুজি অন, ঠিগ্ সেধোক্ক্যেন তর্ এগেমানিত্তে মুই হুজি অং। 163 মিজেগানরে মুই ঘিনাং, জঘন্য মনে গরং, মাত্তর্ তঅ উগুমানি মুই গম পাং। 164 তর্ ধর্মীয় সুদোমানিত্তে দিনে সাতপল্লা মুই তরে নাঙ্ গিনোং। 165 যিগুনে তর্ উগুমানি গম্ পান তারা অমকদ সুগ-শান্দি পান্; কনঅ কিজুত্ তারা উজুদো ন-হান্। 166 ও লগেপ্রভু, তুই মরে উদ্ধোর্ গুরিবে মুই সে আজায় আগং, আর তঅ উগুমানি পালাঙর্। 167 মুই তর্ বেক কধানি মানং আর সিয়েনি অমকদ গম্ পাং। 168 মুই তর্ সুদোমানি আর বেক কধানি মানিনে চলং, কিত্তে মঅ জিংকানি আগাগোড়া তুই হবর্ পাচ্। তৌ 169 ও লগেপ্রভু, মঅ কানানিগান তইদু লুমোক্কোই; তর্ কধা মজিম্ মরে বুঝোনার খেমতাগান দে। 170 মর্ কোজোলিগান তইদু লুমোক্কোই; তর্ এগেম্ মজিম তুই মরে উদ্ধোর গর্। 171 মঅ মুয়োন্দি তরে নাঙ্ গিনি পারং, কিত্তে তুয়ই মরে তর্ সুদোমানি শিগেই দুয়োর্। 172 মঅ মুয়োনে তর্ গান গোক্, কিত্তেই তর্ বেক উগুমানি দোল্। 173 তঅ আঢ্তানিয়ে মরে এজাল্ দিবাত্তে যুক্কোল্ থোক্, কিত্তে তর্ সুদোমানি মুই পালেম্ বিলিনে ঠিগ্ গোজ্যং। 174 ও লগেপ্রভু, তুই মরে উদ্ধোর্ গুরিবে সেনত্তে মুই আওজ্ গুরি বাজ্জেই আগং; তর্ বেক উগুমানি মর্ হুজির কধা। 175 মরে বাঁজিবাত্তে দে যেনে মুই তরে বাঈনী গুরি পারং; তর্ সুদোমানিয়ে মরে এজাল্ দোক্। 176 আরি যেইয়্যে ভেড়া ধোক্ক্যেন্ মুই বজং পধেন্দি যেয়োং; তঅ চাগর্বোরে তুই তোগেই লঅ, কিত্তে তঅ উগুমানি মুই ভুলি ন-যাং। |
Copyright © 2021 Bangladesh Bible Society
Bangladesh Bible Society