গীতসংহিতা 118 - Chakma Bible1 লগেপ্রভুরে ভালেদি জানঅ, কিত্তে তে গম্; তার অমকদ কোচ্পানাগান উমরত্যে থিদেবর্ গোজ্যে। 2 ইস্রায়েলীয়গুনে কোদোক্, “তার কোচ্পানাগান উমরত্যে থিদেবর্ গোজ্যে।” 3 হারোণর গুট্টিবো হোক্, “তার কোচ্পানাগান থুম্ ন-ওইয়্যে।” 4 লগেপ্রভুর ভক্তগুনে কোদোক্, “তার কোচ্পানাগান থুম্ ন-ওইয়্যে।” 5 মুই দজাত্ পড়িনে লগেপ্রভুরে ডাগিলুং; তে মর্ ডাগনিলোই তে ইজিরে দিইনে এক্কান মেলা জাগাত্ মরে নিগিলেই আনিলো। 6 লগেপ্রভু মঅ তপ্পে আঘে, মুই নঅ-দোরেম্; মান্জ্যে মরে কি গুরি পারন্? 7 মর্ এজাল্ দিয়্যে ইজেবে লগেপ্রভু মঅ তপ্পে আঘে, সেনত্তে মর্ শত্রুগুনোর্ উদি যানাগান্ মুই দেগিম। 8 মান্জ্য উগুরে বিশ্বেজ্ গরানাত্তুন্ লগেপ্রভু ইদু আশ্রয় নেযানা উজিত্। 9 দাঙর্ পোজিশন মানুচ্চুন উগুরে বিশ্বেজ্ গরানাত্তুন্ লগেপ্রভু ইদু আশ্রয় নেযানা উজিত্। 10 বেক জাদ্তুনে মরে ঘিরিনে ধোজ্যন্, মাত্তর্ লগেপ্রভুর নাঙে মুই তারারে শেজ্ গুরি দিম। 11 তারা মরে ঘিরিনে ধোজ্যন্, ঘেচ্চেক্গুরি তারা মরে ঘিরিনে ধোজ্যন্, মাত্তর্ লগেপ্রভুর নাঙে মুই তারারে শেজ্ গুরি দিম। 12 মো পুগো ধোক্ক্যেন তারা মরে ঘিরিনে ধোজ্যন্; কাদা-ঝুবো আগুনো ধোক্ক্যেন্ যাদিমাদি তারা মিলেই যেয়োন্। লগেপ্রভুর নাঙে মুই তারারে ঘেচ্চেক্গুরি শেজ্ গুরি দিম। 13 মুই যেনে পড়ি যাং সেনত্তে তারা মরে ধাক্কা মাজ্যন্, মাত্তর্ লগেপ্রভু মরে বল্ দিয়্যে। 14 লগেপ্রভু মর্ বল্ আর মর্ গান; তাইদু আগেদে মর্ উদ্ধোরান্। 15 গম্ মানুচ্চুনো ঘরত্ উদ্ধোরর হুজি রঅ শুনো যায়; লগেপ্রভুর খেমতাবলা আঢ্তানিয়ে দোল্ কাম গোজ্যে। 16 লগেপ্রভুর খেমতাবলা আঢ্তানিয়ে জিদেই দিয়্যে; লগেপ্রভুর খেমতাবলা আঢ্তানিয়ে দোল্ কাম গোজ্যে। 17 মুই ন-মুরিম, বাঁজি থেম, আর লগেপ্রভু যিয়েনি গোজ্যে সিয়েনি ফগদাং গুরিম। 18 লগেপ্রভু মরে দরমর গুরি শাজন্ গোজ্যে, মাত্তর্ মরণর আঢত্ তে মরে তুলি নঅ-দে। 19 মরে ন্যায়বলা লগেপ্রভুর ঘরর্ দোরান খুলি দুয়ো, যেনে মুই সিদু সোমেইনে তারে ভালেদি জানেই পারং। 20 ইয়েন দঅ লগেপ্রভুর ঘরর্ দোরান্; ইয়েনন্দি গম মানুচ্চুনে সমন্। 21 মুই তরে ভালেদি জানেম, কিত্তেই তুই মঅ কধাগান শুন্যচ্; মঅ উদ্ধোরান্ তইদু আঘে। 22 রাজমিস্ত্রিগুনে যে শিল্লো বাদ দি দুয়োন্ সিবে বেগত্তুন্ দরকারি শিল্ অলঅ; 23 লগেপ্রভু ইয়েন গুরিলো, আর সিয়েন আমা চোগেন্দি অমকদ আমক্ অইদ্যে ধোক্ক্যেন্ লাগিলো। 24 ইবে সেই দিন্নো যিবে লগেপ্রভু ঠিগ্ গোজ্যে; এজঅ, আমি এ দিনোত্ রঙ্গ-ফুত্তি গুরিই আর হুজি ওই। 25 ও লগেপ্রভু, কোজোলি গরং তুই আমারে উদ্ধোর্ গর্; ও লগেপ্রভু, কোজোলি গরং মরে ফোলেই দে। 26 যিবে লগেপ্রভুর নাঙে এজের্ তারে বাঈনী গরা ওক্। লগেপ্রভুর ঘরত্তুন্ আমি তমারে বর্ দিই। 27 লগেপ্রভুই গোজেন, তে আমারে পহ্র্ দে। পরবর্ উৎসর্ব গুরিবার য়েমানুন্ তুমি দুড়িলোই পূজোবোত্ বানি দুয়ো। 28 তুয়ই মর্ গোজেন, মুই তরে ভালেদি জানেম্; তুয়ই মর্ গোজেন, মুই তরে বাঈনী গুরিম। 29 লগেপ্রভুরে ভালেদি জানঅ, কিত্তে তে গম্; তার কোচ্পানাগান উমরত্তে থিদেবর্ গোজ্যে। |
Copyright © 2021 Bangladesh Bible Society
Bangladesh Bible Society