গীতসংহিতা 116 - Chakma Bible

¹ মুই লগেপ্রভুরে কোচ্‌পাং, কিত্তে তে মর্ কোজোলীগান শুন্যে।

² তে মঅ কধানি কান্ পাত্যে, সেনত্তে যেদকদিন মুই বাঁজি থাং সেদকদিন তারে ডাগিম।

³ মরণর দুড়িত্ মুই বানা হেইয়োং, চিদেশালর পিড়ে মরে পেইয়্যে; মুই অমকদ দুঘ্ পাঙর্।

⁴ সেক্কেনে মুই লগেপ্রভুরে ডাগিনে কলুং, “ও লগেপ্রভু, মুই তইদু কোজোলি গরং, তুই মঅ পরাণান্ বাঁজা।”

⁵ লগেপ্রভু দোয়্যেবলা আর গম্; আমা গোজেনে দোয়্যে-মেয়েন্দি তুজিমপুরো।

⁶ লগেপ্রভু সিদেসিদি মানুচ্চুনোরে রোক্ক্যে গরে; মুই অনালর্ ওইয়োং মাত্তর্ তেয়ই মরে উদ্ধোর্ গোজ্যে।

⁷ ও মর্ পরাণান, আরঅ এক্কানা অলর্ অ, কিত্তে লগেপ্রভু তরে বোউত্ ভালেদি গোজ্যে।

⁸ ও লগেপ্রভু, তুয়ই মরণত্তুন্ মঅ পরাণান্, চোগো পানিত্তুন মঅ চোগ্‌কুনোরে, আর বিজিদি যেইয়্যে আঢত্তুন্ মঅ টেঙানিরে রোক্ক্যে গোজ্যস্।

⁹ মুই জেদা মানুচ্চুনো ভিদিরেত্তুন্ লগেপ্রভুর মুজুঙোত্ আদাউদো গুরিম।

¹⁰ যেক্কেনে মুই কোইয়োং, “মুই অমকদ দজাত্ পোজ্যং,” সেক্কেয়ো মর্ বিশ্বেজ্ এলঅ।

¹¹ মুই দোরেইনে কোইয়োং, “বেক মানুচ্চুন্ মিজে কধা কন্।”

¹² লগেপ্রভু মরে যেত্তমান বর্ দিয়্যে সিয়েনর বদলে মুই তারে কি দিম?

¹³ তে দজাত্তুন্ মরে উদ্ধোর্ গোজ্যে, সেনত্তে ঢাল্যে-উৎসর্বর্ কাপ্য মুই তুলি ধুরিম আর তার্ বাঈনীগান্ ফগদাং গুরিম।

¹⁴ লগেপ্রভু ইদু মুই যেদক্কানি মানত্ গোজ্যং তার বেক মানুচ্চুনো মুজুঙোত্ মুই সিয়েন পূরোণ গুরিম।

¹⁵ লগেপ্রভু ইদু তার ভক্তগুনোর্ মরণান বোউত্ মংগা।

¹⁶ ও লগেপ্রভু, ঘেচ্চেক্‌গুরি মুই তঅ চাগর্, তর্ চাগর, তঅ চাগরানিবোর পুয়ো; তুয়ই মর্ বান্যেগান খুলি দুয়োচ্।

¹⁷ মুই তর্ নাঙে ভালেদি জানেবার-উৎসর্গর্ অনুষ্ঠান গুরিম আর তর্ বাঈনী গরানা ফগদাং গুরিম।

¹⁸ লগেপ্রভু ইদু মুই যেদক্কানি মানত্ গোজ্যং তার বেক মানুচ্চুনোর মুজুঙোত্ মুই সিয়েন পূরোণ গুরিম;

¹⁹ ও যিরূশালেম, তঅ ভিদিরে, লগেপ্রভুর ঘর উদোনত্ মুই সিয়েন পূরোণ গুরিম। লগেপ্রভুরে নাঙ্ গিনে ওক্।