গীতসংহিতা 115 - Chakma Bible

¹ আমার নয়, ও লগেপ্রভু, আমার নয়, মাত্তর্ তরে বাঈনী গরা ওক্; তর্ অমকদ কোচ্‌পানা আর বিশ্বেজত্তেই ওক্।

² অন্য জাদ্‌তুনে কিত্তে কবাক্, “কুদু তারার গোজেন?”

³ আমা গোজেনে স্বর্গত্ আঘে; তা আওজ্ মজিম তে কাম গরে।

⁴ তারার মুত্তিগুন্ সোনা আর রূবোলোই মান্‌জ্যর্ আঢ্‌তোই বানেয়্যে।

⁵ তারার মু আঘে মাত্তর্ কধা কোই ন-পারন্, চোগ্ আগন মাত্তর্ ন-দেগন্;

⁶ তারার কান আঘে মাত্তর্ ন-শুনোন্, নাগ্ আগন মাত্তর্ চুমিই ন-পারন্।

⁷ তারার আত্ আঘে মাত্তর্ ধুরি ন-পারন্, টেঙ্ আঘে মাত্তর্ আহ্‌দি ন-পারন্, মুয়োন্দি কনঅ রঅয়ো নিগিলেই ন-পারন্।

⁸ যে ইগুনোরে বানায় আর তারা উগুরে বিশ্বেজ্ আর ভর্ গরে তারায়ো সেধোক্ক্যেন মূত্তি ধোক্ক্যেন অবাক্।

⁹ ও ইস্রায়েলীয়গুন, লগেপ্রভু উগুরে ভর্ গরঅ - তেয়ই তারার বল্ দিয়্যে আর ঢাল।

¹⁰ ও হারোণর গুট্টি, লগেপ্রভু উগুরে ভর্ গরঅ - তেয়ই তারার বল্ দিয়্যে আর ঢাল।

¹¹ ও লগেপ্রভুর ভক্তগুন্, লগেপ্রভু উগুরে ভর্ গরঅ - তেয়ই তারার বল্ দিয়্যে আর ঢাল।

¹² লগেপ্রভু আমা কধানি ইদোত্ রাগেয়্যে, সেনত্তে তে আমারে বর্ দিবো; অয়, তে ইস্রায়েলর গুট্টিবোরে বর্ দিবো, তে হারোণর গুট্টিবোরে বর্ দিবো,

¹³ তে তার্ চিগোন-দাঙর্ বেক ভক্তগুনোরে বর্ দিবো।

¹⁴ লগেপ্রভু তমার আর তমা পুয়ো-ছাগুনোর গুট্টিগুন বাড়েই দোক্।

¹⁵ লগেপ্রভু, যিবে স্বর্গ আর পিত্‌থিমীগান বানেয়্যে, তে তমারে বর্ দোক্।

¹⁶ স্বর্গগান অলঅ লগেপ্রভুর স্বর্গ, মাত্তর্ পিত্‌থিমীগান তে মান্‌জ্যরে দিয়্যে।

¹⁷ মরা মানুচ্চুনে দঅ লগেপ্রভুরে বাঈনী ন-গরন্; যিগুনে মরণর অলর্ জাগাত্ লামন তারা বাঈনী ন-গরন্;

¹⁸ মাত্তর্ আমি লগেপ্রভুরে বাঈনী গুরিবোং, বাঈনী গুরিবোং ইক্কিনেত্তুন ধুরি উমর সং। লগেপ্রভুরে নাঙ্ গিনে ওক্।