গীতসংহিতা 114 - Chakma Bible

¹ ইস্রায়েল জাদ্‌তো যেক্কেনে মিসরত্তুন্ নিগিলি এলঅ, নানান্ ভাষায় কধা কোইয়্যে মানুচ্চুনো ভিদিরেত্তুন্ যাকোব গুট্টিবো যেক্কেনে নিগিলি এলঅ,

² সেক্কেনে যিহূদা অলঅ গোজেনর পবিত্র জাগা, ইস্রায়েলান অলঅ তার রেজ্য।

³ সিয়েন দেগিনে লোহিত সাগরান্ ধেই গেলঅ, যর্দন গাঙানে গঙার্ ফিরেল;

⁴ আর দাঙর্ দাঙর্ মুড়োগুন ভেড়া ধোক্ক্যেন্, চিগোন চিগোন মুড়োগুন ভেড়া ছঅ ধোক্ক্যেন ফাল্যেদন্।

⁵ ও সাগরান্, কি অলঅ তর্? কিত্তে তুই ধেই গেলে? ও যর্দনান, কিত্তে তুই গঙারান্ ফিরেলে?

⁶ ও দাঙর্ দাঙর্ মুড়োগুন, কিত্তে তুই ভেড়া ধোক্ক্যেন ফাল্ল্যর? ও চিগোন চিগোন মুড়োগুন্, কিত্তে ফাল্ল্যর্ ভেড়া ছঅ ধোক্ক্যেন্?

⁷ ও পিত্‌থিমীগান, প্রভুর মুজুঙোত, যাকোব গোজেন মুজুঙোত্ গির্‌গিরে উদো।

⁸ তে শিল মুড়োবোরে বানেল পুয়োর্ আর্ দর শিল্লোরে বানেল পানির পয়নালা।