গীতসংহিতা 109 - Chakma Bibleগীদ্ পরিচালগত্তে। দায়ূদোর গান। 1 ও গোজেন মুই তর্ বাঈনী গরং; তুই জুরো গুরি ন-থেচ্। 2 পাজি ছলনাগোজ্যে মানুচ্চুনে মঅ বিরুদ্ধে মু খুল্যন্; তারার মিজেকধা কোইয়্যে জিলানিলোই তারা মঅ বিরুদ্ধে কধা কোইয়োন্। 3 তারা মরে ঈচ্ গরেদে কধালোই বানি ফেল্যন্, এনেবাদে মরে আক্রমন গোজ্যন্। 4 মঅ কোচ্পানার বদলে তারা মঅ বিরুদ্ধে শত্রুতা গরন্, মাত্তর্ মুই তবনা গুরি গুরি থাং। 5 তারা ভালেদির্ বদলে মর্ উগুরে অমংগল গরন্, কোচ্পানার বদলে মরে ঈচ্ গরন। 6 তুই তারা উগুরে পাজি বিচেরক্ নেযা; যিগুনে তারারে দুষি গুরিবাক্ সিগুনে তারার ডেন্ ঢাগেন্দি থিয়্যেদোক্। 7 বিচেরত্ তারারে দুষি বিলিনে রায় দিয়া ওক্; তারার তবনাগান্ পাপ বিলিনে ধরা ওক্। 8 তারার আয়ুগান কম ওক্; তারার দাঙর্ পোজিশনানি অন্য মানুচ্চুনে নেযাদোক্। 9 তারার ঝি-পুয়োগুনে বাপ্পোরে আরাদোক্; তারা মোগ্কুনে রানী ওদোক্। 10 তারার ঝি-পুয়োগুনে পধে পধে ভিক্ক্যে গোরোদোক্ আর তারার ভাঙাচরা ঘরত্তুন্ দূরোত্ যেইনে হানা তগাদোক্। 11 মাজন্ মানুচ্চুনে বেক্কানি নেযাদোক্; অন্য মানুচ্চুনে তারার কামর ফলুন্ লুদেই নেযাদোক্। 12 তারা উগুরে দোয়্যে গুরিয়্যে এবাবোত্যে কনজন ন-থাদোক্; তারার মা-বাপ নেইয়্যে ঝি-পুয়োগুনো উগুরে কনজনে মেয়্যে ন-গোরোদোক্। 13 তারার গুট্টিগুনোরে মারে ফেলা ওক্; তারার পুয়ো ছাগুনোর্ নাঙানি বাদ দিয়া ওক্। 14 তারার পুরোণি মানুচ্চুনোর অন্যেয়র কধানি লগেপ্রভুর মনত্ থোক্; তারার মা গুনোর পাপ্পানি বাদ দিয়া ন-ওক্। 15 আমিঝে সিয়েনি লগেপ্রভুর মুজুঙোত্ থোক্, যেনে তে পিত্থিমীত্তুন তারার স্মৃতিগানি ফুজি ফেলেই পারে। 16 তারা দোয়্যে গুরিবার কধা কনদিন্অ মনে ন-গরন্, তো দুঘী, নাঢা আর আজা নেইয়্যে মানুচ্চুনোরে মারে ফেলেবাত্তে অত্যেচার গুরিদাক্। 17 তারা অভিশাব দেদে কোচ্পেদাক্, সেনত্তে সে অভিশাব্পান তারা উগুরে পল্ল; বর্ দিবাত্তে তারার গম্ ন-লাগিদো, সেনত্তে বর্ পানাগান তারাত্তুন্ সুরি গেলগোই। 18 কাবড় উরেদে ধোক্ক্যেন গুরি অভিশাব্ দেনা তারার অভ্যেস্ ওইয়্যে; পানি খাইদ্যে ধোক্ক্যেন্ সিয়েন তারার অভ্যেস্ ওইয়্যে আর কিয়্যেত্ তেল গুলেদে ধোক্ক্যেন্। 19 সেই অভিশাব্পানে কাবড় ধোক্ক্যেন তারারে ঘিরি রাগোক্ আর কমর বিজোনি ধোক্ক্যেন আমিঝে বানি রাগোক্। 20 মঅ বিপক্কগুনে, যিগুনে মঅ পৌইদ্যেনে বজং কধা কন্, তারা লগেপ্রভুত্তুন্ যেন এ ফল পান। 21 মাত্তর্ তুই, ও প্রভু লগেপ্রভু, তঅ সুনাঙান্ রোক্ক্যে গুরিবাত্তে তুই মরে দোয়্যে গর্; তর্ কোচ্পানাগান গম্ বিলিনে তুই মরে উদ্ধোর গর্। 22 মুই দুঘি আর নাদা মানুচ্; মুই মনত্ আঘাত্ পেইয়োং। 23 বেল্যেমাদান্ ছাবা ধোক্ক্যেন মুই মিলেই যাঙর্; পিরিঙো ধোক্ক্যেন মরে ঝাড়ি দিয়্যে ওইয়্যে। 24 নখাদে নহাদে মঅ আদুগুন্ গির্ গিজ্যে ওইয়োন্; মঅ কিয়্যেগান রোগা ওই যেইয়্যে, এক্কুবারে শুগেই যেইয়্যে। 25 মঅ বিপক্কগুনো ইত্তুন্ মুই ঈচ্ গরা হেইয়্যে ওইয়োং; তারা মরে রিনি চেলে মাধা লাড়ান্। 26 ও লগেপ্রভু মর্ গোজেন, মরে বল্ দে; তর্ কোচ্পানালোই মরে রোক্ক্যে গর্। 27 তারা হবর্ পাদোক্ ইয়েন তর্ কাম; তুই, ও লগেপ্রভু, এ কামান গোজ্যস্। 28 তারা অভিশাব্ দেদোক্, মাত্তর্ তুই বর্ দে; তারা মঅ বিরুদ্ধে লাগিলে লাজত্ পড়িবাক্, মাত্তর্ তঅ চাগর্বো হুজি অবঅ। 29 মঅ বিপক্কগুনে অগমানে ঢাগা যাদোক্, আর লাজ্ জিনিস্ছান কাবড় ধোক্ক্যেন তারার কিয়্যেনিত্ বেড়েয়্যে থোক্। 30 মুই বেক্কুনো মুজুঙোত্ লগেপ্রভুরে বোউত্ ভালেদি জানে্ম, আর বোউত্ মান্জ্যর মুজুঙোত্ তারে নাঙ্ গিনিম্; 31 কিত্তে তে নাদা মানুচ্চুনোর কায়কুরে থেদঅ, যেন অন্যেয় বিচের রায়ত্তুন্ তা পরাণান্ রোক্ক্যে গুরি পারে। |
Copyright © 2021 Bangladesh Bible Society
Bangladesh Bible Society