গীতসংহিতা 108 - Chakma Bible

এক্কো গান। দায়ূদোর এক্কো গীদ্।

¹ ও গোজেন, মঅ মনান থির্ আঘে; মুই গান গেম্ আর মঅ বেক মনান্দোই গানর সুর্ তুলিম।

² ও বাশি আর আর্‌মোনিগুন, জাগ; মুই বেন্যেপোত্যেগানরে জাগেম।

³ ও লগেপ্রভু, নানান্ জাদ মুজুঙোত্ মুই তরে ভালেদি জানেম, তারা ভিদিরেত্তুন্ তঅ নাঙে গান গেম্;

⁴ কিত্তে তর্ অমকদ কোচ্‌পানাগান আগাজত্তুন্ বেশ্ অজল্, তর্ বিশ্বেজ্‌ছান মেঘঅ উগুরেয়ো লুমেগোই।

⁵ ও গোজেন, তর্ মহিমাগান্ দেবাবো সং উদোক্; তর্ বাঈনী পানাগান্ পিত্‌থিমীগান উগুরে দেগা দোক্।

⁶ তর্ খেমতাবলা আঢ্‌তান বাবেইনে আমারে তুই উদ্ধোর্ গর্; মর্ ডাগনিলোই শমক্ দে, যেনে তুই যিগুনোরে কোচ্‌পাচ্ তারা উদ্ধোর্ পান।

⁷ গোজেনে তার পবিত্রতাগান কধা কোইয়্যে, “মুই হুজিয়ে শিখিমান ভাগ গুরি দিম, সুক্কোতর কলগ জাগায়ান রিনি চেইনে ভাগ গুরি দিম।

⁸ গিলিয়দগান মর্, মনঃশিগানঅ মর্; ইফ্রয়িমান যেন মঅ মাধাবোর লুয়োর টোক্কেবো, আর যিহূদাগান মর্ রাজ লুদিক্কো।

⁹ মোয়াবপান মর্ টেঙ্ ধবার জাগা; মুই ইদোম উগুরে মঅ টেঙর্ জদাগানি মেলা মারিম, আর পলেষ্টীয়া উগুরে জিদেনার কধা কোম।”

¹⁰ কন্না মরে সে শঅরত্ নেযেব যিয়েনত্ সোমেই ন-পারে? কন্না মরে পধ দেগেইনে ইদোমত্ নেযেব?

¹¹ ও গোজেন, তুই কি আমারে বাদ ন-দুয়োচ্? আমা সৈন্যগুনো সমারে তুই দঅ আর্ ন-যাচ্।

¹² ও গোজেন, শত্রুগুনোর বিরুদ্ধে তুই আমারে বল্ দে, কিত্তে মান্‌জ্যর বল্ দেনার দঅ কনঅ দাম নেই।

¹³ গোজেনর বলে আমি জিদিবোং; আমা শত্রুগুনোরে তেয়ই টেঙন্দি উড়িবো।