গীতসংহিতা 107 - Chakma Bibleপাচ্ লম্বর্ ভাক্কো ( ১০৭-১৫০ ) 1 “তুমি লগেপ্রভুরে ভালেদি জানঅ, কিত্তে তে অমকদ গম; তার অমকদ কোচ্পানাগান জিংকানিবর্ থিদেবর্ গোজ্যে।”- 2 লগেপ্রভুর উদ্ধোর্ গোজ্যে মানুচ্চুনে এ কধাগান কোদোক্, কিত্তে তে বিপক্কগুনোর আঢত্তুন্ তারারে উদ্ধোর্ গোজ্যে; 3 তে অন্য দেজত্তুন্ তারারে এক জাগাত্ আন্যে, আন্যে পূগ-পোজিমেত্তুন্ আর উত্তোর-দোগিনেত্তুন্। 4 তারা ধূল্যেচর-চাগালাত মানুচ্ জন নেইয়্যে জাগাত্ ঘুরিলাক্; বজত্তি গরেদে ধোক্ক্যেন্ কনঅ শঅর্ তারা তোগেই ন-পেলাক্। 5 তারা পেট্ পরায় আর পানি তিরেজে দুগ্ পেলাক্, তারার পরানানর বেক্ আজাগান আরেয়োন্। 6 দজাত্ পুরিনে তারা লগেপ্রভুর ইদু কানাকুদি গুরিলাক্, সেক্কে দুগোত্তুন্ তে তারারে উদ্ধোর্ গুরিলো। 7 তে উজু পধেন্দি তারারে নেযেল যেনে তারা কনঅ শঅরত্ যেইনে বজত্তি গুরি পারন্। 8 মান্জ্য উগুরে লগেপ্রভুর আমক্ অবার কামানিত্তে আর তার গভীন্ কোচ্পানার কারনে তারা তারে ভালেদি জানাদোক্। 9 যিগুনোর মনত্ আওজ্ আঘে তে তারার তিরেস্ মিটেই দে, আর যিগুনোর মনত্ পেট্পরা আঘে গম গম জিনিস্ছোই তে তারারে হাবেই দে। 10 তারা আন্ধারত্, ঘুর্গুজ্যে আন্ধারত্ বোই এলাক্, সেই বন্ধীগুনে দুঘে আর লুয়োর্ শিগোলে দুঘ্ পাদন্; 11 কিত্তে তারা গোজেন কধার বিরুদ্ধে উল্লোমি গুরিদাক্, গোজেনর সল্লানি তারা তুচ্ছো গুরিদাক্। 12 সেনত্তে তে জদবদে কাম গুরিনে তারার বাড়্বো গরানাগানি ভাঙি দিলো; তারা উজোত্ হেলাক্, বলদিয়্যে কনজন ন-এলাক্। 13 দজাত্ পুরিনে তারা লগেপ্রভু ইদু কানাকুদি গুরিলাক্, সেক্কে দুঘোত্তুন্ তে তারারে রোক্ক্যে গুরিলো। 14 আন্ধার আর মরণ মুয়োত্তুন্ তে তারারে নিগিলেই আনিলো; তে তারার শিগোলানি ভাঙি দিলো। 15 মান্জ্য ইদু লগেপ্রভুর আমক্ অবার্ কামানিত্তে আহ্ তার অমকদ কোচ্পানার কারনে তারা তারে ভালেদি জানাদোক্। 16 তে পিদল গেট্ ভাঙি ফেলেয়্যে আর লুয়ো লাগাড়া ভাঙি ফেলেয়্যে। 17 যিগুনোর মনানি বাজে সিগুনে তারার উল্লোমিগানিত্তে আর অন্যেয়ত্তে দুঘ্ পেলাক্। 18 তারা বেক্ হানাগানি ঈচ্ গুরিলাক্ আর মরণ মুয়োত্ লুমিলাক্। 19 দজাত্ পুরিনে তারা লগেপ্রভুর ইদু কানাকুদি গুরিলাক্, সেক্কে দুঘোত্তুন্ তে তারারে রোক্ক্যে গুরিলো। 20 তার কধা পাদেইনে তে তারারে গম্ গুরিলো; তে গোরত্তুন্ তারারে উদ্ধোর্ গুরিলো। 21 মান্জ্য ইদু লগেপ্রভুর আমক্ অবার্ কামানিত্তে আর তার অমকদ কোচ্পানার কারনে সিগুনে তারে ভালেদি জানাদোক্। 22 তারা ভালেদি জানেবার-উৎসর্ব গোরোদোক্, রঙ্গ-ফুত্তির্ গীদ্ গেইনে তার বেক কামানির কধা কোদোক্। 23 যিগুনে জাহাজত্ গুরি সাগরত্ যান আর দোজ্যে সাগর ইদু বেবসা গরন্, 24 সিগুনে লগেপ্রভুর কাম দেখ্যন্, গভিন পানিত্ দেখ্যন তার আমক অবার্ কামানি। 25 একপল্লা তা কধালোই অমকদ ঝড় অলঅ, সেক্কে দাঙর্ দাঙর্ তুবোল্ উদিলো। 26 সিয়েনত্তে নাবিককুনে আগাজত্ সং উদিলাক্ আর পানি তলা সং লামিলাক্; দজাত্ পুরিনে দরে তারার পরাণান উড়ি গেলঅ। 27 মাত্তল ধোক্ক্যেন তারা আলে-উলে ঢুলি পড়িলাক্; তারা উজ্ আরা অলাক্। 28 দজাত্ পুরিনে তারা লগেপ্রভু ইদু কানাকুদি গুরিলাক্, সেক্কে দুঘোত্তুন্ তে তারারে নিগিলেই আনিলো। 29 তে ঝড় থামেই দিলো, সেক্কে দোজ্যে সাগর তুবোলানি থামেল। 30 দোজ্যে সাগরান গুজুরোনি থামেলে তারা হুজি অলাক্; যে বন্ধরত্ তারা যেবাত্তে চেইয়োন সিদু তে তারারে নেযেল। 31 মান্জ্য ইদু লগেপ্রভুর আমক্ অবার কামানিত্তে আর তার অমকদ কোচ্পানার কারনে সিগুনে তারে ভালেদি জানাদোক্। 32 সমাজ ইদু সিগুনে তার বাঈনী গোরোদোক্, বুড়ো নেতাগুনোর তেম্মাঙত্ তারে নাঙ্ গিনোদোক্। 33 তে গাঙানিরে ধূল্যেচর-চাগালা ধোক্ক্যেন্ গরে, পয়নালারে গরে শুগুনো ভূই ধোক্ক্যেন্, 34 আর ফসল জর্মেয়্যে ভূইয়ানিরে গরে নুনো খলা। যিগুনে সিদু বজত্তি গরন তারার পাজিগানির কারনে তে ইয়েনি গরে। 35 তে ধূল্যেচর-চাগালাগানরে পুয়োর্ বানায় আর শুগুনো জাগানরে গরে পয়নালা। 36 পেট পরায় দুঘ্ পেইয়্যে মানুচ্চুনোরে তে সিদু বজত্তি গরা বাজেই দে; তারা সিদু শঅর্ তুলোন্। 37 তারা খেদত্ বীজ লাগান, আংগুর গাজ্ লাগান, আর বোউত্ খেতখেত্তি ফলান্। 38 তে তারারে আশিদ্বাদ গরে আর তারা জনেদি বোউত্ বাড়ন্; তে তারার য়েমান পালুন্ কমিবাত্তে ন-দে। 39 অত্যেচারে, দজাত্ পুরিনে আর দুঘে আরঅ তারা জনেদি কমি যান আর তারার অবস্থাগান গম্ ন-অয়। 40 তে বড়্ পোজিশন মানুচ্চুনো উগুরে অগমান আনে, ঝাড় ভিদিরে মানুচ্জন নেইয়্যে জাগানত্ তারারে ঘুরিবাত্তে দে; 41 মাত্তর্ তে নাদা মানুচ্চুনোরে গমেডালে রাগায়, ভেড়া পাল ধোক্ক্যেন্ তারার পুয়ো-ছাগুনোরে বাড়ায়। 42 গোজেন ভক্ত মানুচ্চুনে সিয়েনি দেগিনে হুজি অন, মাত্তর্ অন্যেয়গুরিয়্যেগুনে মুয়োন ন-খুলোদে বাধ্য অন্। 43 যে জ্ঞানী তে ইয়েনি পৌইদ্যেনে মনযোগ দোক্ আর লগেপ্রভুর অমকদ কোচ্পানার পৌইদ্যেনে গমেডালে খিয়েল্ গোরোদোক্। |
Copyright © 2021 Bangladesh Bible Society
Bangladesh Bible Society