গীতসংহিতা 106 - Chakma Bible1 লগেপ্রভুরে নাঙ্ গিনে ওক্। তুমি লগেপ্রভুরে ভালেদি জানঅ, কিত্তে তে ভালেদি গরে; তার কোচ্পানাগান উমরত্তে। 2 লগেপ্রভুর্ দোল্ দোল্ কামর কধানি কন্না কোই পারে? তার বাঈনী গরানালোই ভরা কধাগান ফগদাঙ্ গরে এবাবোত্যে সাধ্য কার্? 3 বর্ পেইয়্যে তারা, যিগুনে দোল্ বিচের গরন্ আরে নিত্য ন্যায় কাম গরন্। 4 ও লগেপ্রভু, তঅ মানুচ্চুনোরে মেয়্যে দেগেবার অক্তত্ মরে ভুলি ন-যেচ্; তারারে উদ্ধোর্ গুরিবার সময়োত্ মন্দি আঢ্ বাবেই দিচ্। 5 ইয়েন্দোই যেনে মুই তর্ বেঈ লোইয়্যে মানুচ্চুনোর্ ভালেদি দেগং, তঅ জাদ্তুনোর হুজিয়ে হুজি ওই পারং, আর যিগুনে তর্ সোম্বোত্তি তার ভাগ ইজেবে বাড়্বো গুরি পারং। 6 আমা পুরোণি মানুচ্চুনো ধোক্ক্যেন্ আমিয়ো পাপ গোজ্যেই; আমি অন্যেয় গোজ্যেই, ভান্ন্যেই গুরি চোল্যেই। 7 মিসরত্ থেবার সময় আমা পুরোণি মানুচ্চুনে তর্ আমক্ অবার কামানি দেগিনে কিচ্ছু ন-বুঝোন্; তারা তর্ শেজ্ ন-ওইয়্যে অমকদ কোচ্পানার কধায়ো মনত্ ন-রাগান্; তারা সাগর পারত্, লোহিত সাগর পারত্ উল্লোমি গোজ্যন্। 8 তো তে তার নাঙান্ রোক্ক্যে গুরিবাত্তে, তার্ খেমতাগান ফগদাঙ্ গুরিবাত্তে তারারে উদ্ধোর্ গুরিলো। 9 তার উগুমে লোহিত সাগরান্ শুগেই গেলঅ; তে ধূল্যেচর-চাগালান্দি যাইদ্যে ধোক্ক্যেন গুরি গভিন্ সাগর ভিদিরেন্দি তারারে নেযেল। 10 তে ঈচ্ গুরিয়েগুনোর আঢত্তুন্ তারারে রোক্ক্যে গুরিলো; শত্রুগুনো আঢত্তুন্ তারারে উদ্ধোর্ গুরিলো। 11 তারার শত্রুগুনে পানিত ঢুবিলাক্, একজন্অ ন-বাঁজিলাক্। 12 সেক্কে লগেপ্রভুর কধালোই তারা বিশ্বেজ্ গুরিলাক্ আর তার নাঙ্ গিনেদে গীদ্ গেলাক্। 13 মাত্তর্ তা কামানির কধা যাদিমাদি ভুলি গেলাক্; তারা তার সল্লা গুরিবাত্তে বাজ্জেই ন-থেলাক্। 14 ধূল্যেচর-চাগালাত্ তারা লুভ্ গুরিনে গোজেনরে যগা চেলাক্। 15 তারা যিয়েন চেইয়োন তে সিয়েনই তারারে দিলো, মাত্তর্ তারা উগুরে পাধেই দিলো এক ক্ষয় গোজ্যে পিড়ে। 16 তাম্বুলোত্ দিন কাদেবার সময়োত্ মোশিরে দেগিনে, আর লগেপ্রভুর নাঙে ফারগ্ গোজ্যে সেই হারোণরে দেগিনে তারার ইংসে অলঅ। 17 পিত্থিমীগানে মুয়োন্ খুলিনে দাথনরে গিলিলো আর অবীরামর দল্লোরে ঢাগি ফেলেল। 18 তারা দল ভিদিরে আগুন জুলি উদিলো; আগুনো জিলানে পাজি মানুচ্চুনোরে পুড়ি ফেলেল। 19 হোরেব মুড়োবো মুজুঙোত্ তারা এক্কো সনার গোরু বানেলাক্ আর গোলেইনে বানেয়্যে মূত্তিবোরে সালাম গুরিলাক্। 20 তারার্ বাঈনীবলা গোজেনরে ফেলেইনে তারা ঘাস হেইয়্যে গোরুর মূত্তিবোরে মানি নেযেলাক্। 21 তারার্ উদ্ধোর গুরিয়্যে গোজেনরে তারা ভুলি গেলাক্ যিবে মিসরত্ ভালোক্কানি দাঙর্ কাম গোজ্যে। 22 হাম-বংশীয়গুনোর দেজত্ গোজ্যে আমক্ অবার্ কাম পৌইদ্যেনে তারা ভুলি গেলাক্, লোহিত সাগর ইদু গোজ্যে দর্বুক্ লাগেদে বেক কামর্ কধানি ভুলি গেলাক্। 23 সেনত্তে গোজেনে কলঅ তারারে দুনিয়েত্তুন উদেই দিম্; তে সিয়েনোই গুরিদো মাত্তর্ তার বেঈ লোইয়্যে মানুচ্ মোশি তারে মানা গুরিলো, তে যেন তারারে শেজ্ গরানার আদত্তুন্ রাগ্কান ফিরেই পারে। 24 পরেন্দি তারা সেই দোল্ দেজ্ছানরে ঈচ্ গুরিলাক্; তারা লগেপ্রভুর কধা বিশ্বেজ্ ন-গুরিলাক্। 25 তারা তাম্বুলো ভিদিরে কধা কুয়ো ধুরিলাক্; লগেপ্রভুর কধা তারা কান ন-পাদিলাক্। 26 সেনত্তে তে তারা পৌইদ্যেনে শমক্ খেলঅ- তে ধূল্যেচর-চাগালাত্ তারারে শেজ্ গুরি দিবো, 27 তারা গুট্টিগুনোর নানান্ জাদঅ ভিদিরে মরণ এবঅ, আর নানান্ দেজত্ তারারে ছিদি দিবো। 28 তারা পিয়োর মুড়োবোত্ বাল দেবেদা পুজোত্ যেইয়োন্ আর মরা মানুচ্চুনোর নাঙে উৎসর্ব গোজ্যে য়েরা হেলাক্। 29 এ বজং কামানিলোই তারা লগেপ্রভুরে রাগ্ তুলি দুয়োন্, সেনত্তে তারা ইদু বানা (সাজুরেদে পিড়ে) অলঅ। 30 সেক্কে ধর্মগুরু পীনহস্ উদিনে ইয়েনরে যগাজ্যে সাজা দিলো, আর বানাগান্ (সাজুরেদে পিড়ে) থামেল। 31 পীনহসর্ এ কামানত্তে তারে জিংকানিবর নিদ্দুযি বিলিনে ধরা অলঅ। 32 মরীবার পানি পারত্ তারা লগেপ্রভুরে রাগ তুলি দুয়োন্; তারাত্তে মোশি দযাত্ পল্ল। 33 তারা গোজেন আত্মার বিরুদ্ধে উল্লোমি গোজ্যন্, সেক্কে মোশি মুয়োত্তুন্ এমন্ কধা নিগিলিলো যিয়েনি কনা তার ঠিগ্ ন-এলঅ। 34 গোজেন উগুমোর্ অবাধ্য ওইনে তারা অন্য জাদর্ মানুচ্চুনোরে শেজ্ ন-গুরিলাক্, 35 বরং সেই জাদ্তুনো সমারে তারা নিজে মিজেয়োন্ আর তারার চলাফিরে-বেবহারানি মানি নিলাক্। 36 তারার মূত্তিগুনোরে তারা পূজো গুরিলাক্ আর সিগুন তারার ফাল্ অলঅ। 37 এমন্ কি, বজং আত্মাগুনোর নাঙে তারার পুয়ো-ঝিগুনোরে তারা ডালি দিলাক্। 38 তারা নিদ্দুযিগুনোর, অত্তাত্ তারার পুয়ো-ঝিগুনোর লো ঝোরেই দিলাক্। তারা কনান মূত্তিগুনোর নাঙে তারার ডালি দিলাক্, সেক্কে পুরো দেজ্ছান সে লো-লোই ফি বাঁজিলো। 39 ইয়েনি গুরিনে তারা নিজোরে ফি বলা বানেলাক্; তারার্ কামানিলোই তারা লগেপ্রভু ইদু অবিশ্বেজি অলাক্। 40 সেনত্তে লগেপ্রভুর রাগ্কান তা মানুচ্চুনো উগুরে জুলি উদিলো; যিগুনে তার সোম্বোত্তি তারা উগুরে তার ঘিন্ লাগিলো। 41 তে অন্য জাদ্তুনো আদত্ তারারে তুলি দিলো; তারারে ঈচ্ গুরিয়্যেগুনে তারারে শাজন্ গরা ধুরিলাক্। 42 তারার শত্রুগুনে তারা উগুরে অত্যেচার চালেলাক্; তারা সিগুনোর অধিনোত্ রলাক্। 43 ভালোক্বার তে তারারে উদ্ধোর্ গুরিলো, মাত্তর্ তারা নিজোর আওজে উল্লোমি অলাক্; পাপত্তে তারার এ অবস্তা অলঅ। 44 তো তে তারার কানানিগানি শুনিনে তারান্দি ফিরি চেলঅ। 45 তারাত্তেই তার থিদেবর্ গোজ্যে সুদোমর্ কধানি তে ইদোত্ তুলিলো; তার থুম্ ন-ওইয়্যে, অমকদ কোচ্পানা থানায় তারারে মেয়্যে গুরিলো। 46 যিগুনে তারারে বান্ন্যন্ তারা ইদু তে তারারে দোয়্যে-মেয়্যেবলা বানেল। 47 ও লগেপ্রভু, আমা গোজেন, আমারে উদ্ধোর্ গর্; অন্য জাদ ভিদিরেত্তুন্ তুই আমারে এক জাগাত্ লোই আয়, যেনে আমি তর্ পবিত্রতাগান নাঙে ভালেদি জানেই পারিই আর তরে নাঙ্ গিনি পারঙর্ বিলিনে বাড়্বো গুরি পারঙর্। 48 সৃট্টির্ আগেত্তুন্ ধুরি উমর সং ইস্রায়েলর গোজেন লগেপ্রভুর বাঈনী ওক্। বেক মানুচ্চুনে কোদোক্, “আমেন।” লগেপ্রভুরে নাঙ্ গিনে ওক্। |
Copyright © 2021 Bangladesh Bible Society
Bangladesh Bible Society