গীতসংহিতা 105 - Chakma Bible1 লগেপ্রভুরে ভালেদি জানঅ, তা গুণো কধা ফগদাঙ্ গরঅ; তা কাম কধা অন্য জাদ্তুনোরে জানঅ। 2 তা নাঙে গীদ্ গঅ, তার নাঙ্ গিনেদে গীদ্ গঅ; তার বেক্ আমক্ অবার কামর্ কধানি কঅ। 3 তার পবিত্রতাগানর্ বাঈনী গরঅ; যিগুনে লগেপ্রভুরে গভিন্ গুরি জানিবাত্তে আওজি তারার মনানি হুজি ওক্। 4 লগেপ্রভু আর তার খেমতাগানরে বুঝিবাত্তে চঅ; নিত্য তা সমারে উদোলোলি গুরি থেবাত্তে আওজি অ। 5-6 ও তার চাগর অব্রাহামর বংশধরুন্, তার বেঈ লোইয়্যে যাকোবর পুয়োছাগুন্, তুমি তার দাঙর্ কামানির কধা ইদোত্ রাগঅ; তার আমক্ অবার কামানির্ কধা আর বিচেরর যে সাজার কধা তে কোইয়্যে সিয়েন ইদোত্ রাগঅ। 7 তেয়ই আমা গোজেন লগেপ্রভু, গোদা দুনিয়েগান তার শাজনত্ চলের্। 8 যে কধানি উগুম তে দিয়্যে আজার আজার বংশত্তে, তার সেই সুদোমর কধানি তে উমরত্যে ইদোত্ রাগেব। 9 সেই সুদোমান্ তে অব্রাহামত্তে থিদেবর্ গোজ্যে আর ইস্হাক ইদু শমক্ হেইয়্যে। 10 তে তার সুদোমান্ যাকোব ইদু নিয়ম ইজেবে আর ইস্রায়েল ইদু উমরর্ সুদোম ইজেবে ফগদাঙ্ গোজ্যে। 11 তে কোইয়্যেদে, “মুই তরে কনান দেজ্ছান দিম, সিয়েনই অবঅ তর্ পাওনা সোম্বোত্তি।” 12 তারা জনেদি যেক্কে কম এলাক্, অমকদ কম এলাক্, আর তারা সিদু বিদেশি এলাক্, 13 তারা যেক্কেনে সিদু নানান্ জাদঅ ভিদিরে আর নানান্ রেজ্য ভিদিরে ঘুরি ঘুরি বেড়েদাক্, 14 সেক্কেনে তে কনজনরে তারাত্তুন্ অত্যেচার গুরিবাত্তে ন-দিদো। তারাত্তে তে রাজাগুনোরে ধমক্ দিদো, 15 কদঅ, “মর্ অভিষেগ্ গোজ্যে মানুচ্চুনোরে ন-ধুরিবা; মঅ ভাববাদিগুনোরে কনঅ খেতি ন-গুরিবা।” 16 সে পরেন্দি তে তারার দেজত্ ভাদ রাত্ ডাগি আনিলো আর তারার হানা-দানার অভাব গুরি দিলো, 17 সেক্কে তে এক্কো মান্জ্যরে তারার আগেন্দি পাধেই দিলো- যোষেফরে পাধেই দিলো; চাগর্ ইজেবে তারে বিজি দিয়্যে অলঅ। 18 বেড়া শিগল্লোই তা টেঙান দুঘ্ পেলঅ, লুয়ো শিগোল্লোই তে বানা পড়িলো। 19 তে যিয়েনি কোইয়্যে সিয়েনি যেদকদিন্ সং সত্য ইজেবে দেগা ন-যায়, সেদকদিন্ তা পৌইদ্যেনে লগেপ্রভুর এগেমান্ পুরোণা পৌইদ্যেনে তার পোরোক্ক্যে চলের্। 20 রাজার্ উগুমে তা শিগোলান্ খুলি দিয়্যে অলঅ; সেই শাজন্গুরিয়্যেবো তারে ইরি দিলো। 21 তে তারে তার রাজঘরর আর তা বেক সোম্বোত্তিগানি চেবার কাম দিলো, 22 যেনে তার আওজ্ মজিম তে রাজার কামগুরিয়্যেগুনোরে শাজনত্ রাগায় আর বুড়ো নেতাগুনোরে সল্লা দে। 23 সে পরেন্দি ইস্রায়েলে মিসরত্ গেলঅ; হাম-বংশীয়গুনোর দেজত্ যাকোবে কয়েক বজর্ বজত্তি গুরিলো। 24 লগেপ্রভু তার নিজো মানুচ্চুনোর বংশবো বোউত্ বাড়েই দিলো; শত্রুগুনোত্তুন্ বেশ্ তে তারারে বোলি বানেল। 25 তা মানুচ্চুনোর বিরুদ্বে তে শত্রুগুনোর মনত্ ঈচ্ গরানা জাগেই দিলো, সেক্কেনে তারা তা চাগরুনো সমারে চালাগি গুরিনে চলা ধুরিলাক্। 26 তে তার চাগর্ মোশিরে আর তার বেঈ লোইয়্যে হারোণরে পাধেই দিলো; 27 তারাল্লোই লগেপ্রভু হাম বংশীয়গুনোর দেজত্ বেক্কুনো মুজুঙোত্ নানান্ বাবোত্যে চিহ্নো আর আমক অবার্ কাম গুরিলো। 28 তে আন্ধার্ পাদেল, সেক্কে আন্ধার পাদেল; তা কধানির বিরুদ্ধে তারা উল্লোমি ন-গুরিলাক্। 29 তারার পানিগানি তে লো বানেই দিলো, সেক্কে বেক মাচ্ছুন্ মুরি গেলাক্। 30 দেজত্ বেঙে সয়-সাগোজ্যে অলাক্; এন্ কি, তারার রাজার ঘরত্ যেইনে সিগুন লুমিলাক্। 31 তা কধালোই ঝাক্ ঝাক্ পুক্ এলাক্, তারার দেজত্ মশা ছিদি পড়িলাক্। 32 তে ঝড় ধোক্ক্যেন্ গুরি তারা উগুরে শিল্ ফেলেল, পুরো দেজত্ ঝিমিলেনি গরা ধুরিলো। 33 তারার আংগুর লুদিগানিত্ আর ডোমোর গাজত্ তে আঘাত গুরিলো আর দেজত্ বেক গাজ-বাশ্ছুন ভাঙি দিলো। 34 তা কধালোই পুক্-যুক্ আর গুণি ন-পুরেইয়্যে ফিড়িঙ্ এলাক্; 35 সিগুনে দেজর গাজ-বাশ্ছুন আর ভুইয়োর খেত-খেত্তিগানি হেই ফেলেলাক্। 36 সে পরেন্দি তে মিসরীয়গুনোর গাবুজ্যে বলর্ পত্তম ফল, অত্তাৎ দেজর্ বেগ পৌল্যে পুয়োবোরে আঘাত গুরিলো। 37 তে সনা-রূবো সুদ্ধো ইস্রায়েলীয়গুনোরে নিগিলেই আনিলো; তারা গুট্টিগুনোত্তুন্ কনজনে বল্ পোজ্যে ন-অন। 38 তারার যানা দেগিনে মিসরীয়গুনে হুজি ওইয়োন্, কিত্তে তারা ইস্রায়েলীয়গুনোরে অমকদ দোরেদাক্। 39 তারারে ন-দেগিবাত্তে তে তার সেই মেঘ্কান মিলি দিলো, আর রেদোত্ পহ্র্ দিবাত্তে আগুন দিলো। 40 তারা হানা চেইয়োন বিলিনে তে তারারে ভারুই পেক্ আনি দিলো; স্বর্গত্তুন্ রুটিলোই তারারে পেট্ ভোরেই দিলো। 41 তে পাত্তর্ খুলি দিলো, সেক্কে পানি নিগিলি এলঅ; শুগুনো জাগা ভিদিরেন্দি সিয়েনে গাঙ ধোক্ক্যেন বেঈ গেলঅ। 42 তা চাগর অব্রাহাম ইদু তে যে পবিত্র এগেমান্ গোজ্যে সিয়েন তে ইদোত্ তুলিলো। 43 হুজি আর রঙ্গ-ফুত্তি গীদোর্ সমারে তার বেঈ লোইয়্যে মানুচ্চুনোরে তে নিগিলেই আনিলো। 44 তে অন্য জাদ্তুনোর দেজ্ছানি ইস্রায়েলীয়গুনোরে দিলো আর সে জাদ্তুনোর কামর্ ফল তা মানুচ্চুনোরে নিবাত্তে দিলো, 45 যেনে তারা তার সুদোমানি পালান্ আর তার রীদি-সুুদোমানি মানন্। লগেপ্রভুরে নাঙ্ গিনে ওক্। |
Copyright © 2021 Bangladesh Bible Society
Bangladesh Bible Society