গীতসংহিতা 104 - Chakma Bible1 ও মর্ পরাণান, লগেপ্রভুর বাঈনী গর্; ও লগেপ্রভু, মর্ গোজেন, তুই কত্তমান্ দাঙর্! তুই বাঈনী আর মহিমার সাজে সাজি আগচ্। 2 কাবড় ধোক্ক্যেন্ গুরি তুই নিজোরে পহর্ লোই ঢাক্যচ্; দেবাবোরে তুই ছাল ধোক্ক্যেন্ গুরি ছিদি দুয়োচ্। 3 তর্ স্বর্গর থেবার জাগানর গড়াগান্ তুই দেবাবো পানিগান উগুরে থিদেবর্ গোজ্যস্; তুই মেঘ্কানরে গোজ্যস্ তর্ রথ; তুই বোইয়্যের ডুয়োগানিলোই ভর্ গুরিনে আঢাউদো গরচ্। 4 তুই বোইয়্যেরানরে তর্ দূত্ বানেয়োচ্; জোল্জোল্যে আগুনানরে বানেয়োচ্ তর্ চাগর্। 5 তুই পিত্থিমীগানরে তা নিজো গড়াগান উগুরে থিদেবর্ গোজ্যস্; সিয়েন কনদিন্অ ন-লুড়িবো। 6 তুই পিত্থিমীগানরে কাবড়্লোই ঢাগেদে ধোক্ক্যেন গুরি সাগর পানিলোই ঢাগি দুয়োচ্; মুড়ো-মুড়িগুনো সেই পানিলোই ঢাক্যে এলঅ। 7 মাত্তর্ সেই পানিগান তঅ উগুমে গেলগোই; সিয়েন গেলগোই তঅ গুজুরোনিত্। 8 মুড়ো-মুড়িগুন আরঅ অজল ওই উদিলাক্, বেক্ কলগ্কানি আরঅ তলে পুরিলো; তুই যে জাগায়ান ঠিগ্ গুরি রাগেয়োচ্ সিয়নি সিদ্দুর সং যেইনে লুমিলো। 9 এধোক্ক্যেন্ গুরি তুই পানির দুযিগান ঠিগ্ গুরি দুয়োচ্, যেনে পানিয়ে আর্ কনদিন্অ দুযিগান পার্ ওইনে পিত্থিমীগানরে ঢাগি ন-ফেলায়। 10 কলগ ভিদিরে তুয়ই পানি পয়নালা পাদেয়োচ্; সেই পানিগান মুড়ো-মুড়ির সংমোধ্যেন্দি বেঈ যায়। 11 সিয়েনে য়েমানুনোরে পানি যোগেই দে; সেক্কে ঝাড়্বো গাদাগুনোর তিরেস্ মরে। 12 পানি কায়-কুরে আগাজ পেক্কুনে ঘর্ বানান্, আর গাজ ডেলায় ডেলায় গীদ্ গান্। 13 তর্ স্বর্গর থেবার জাগানত্তুন্ তুই মুড়ো-মুড়ি উগুরে পানি ফেলাচ্; তর্ সেই কামানত্তে পিত্থিমীগানে হুজি অয়। 14 তুই য়েমান পালত্যেই ঘাস আর মান্জ্যর্ চাষত্তে গুলোগুলি গাজ জোর্মেবাত্তে দুয়োচ্, যেন ভূইয়োত্তুন্ তে তার খোরাক্কুন পায়- 15 আংগুর-রস যিয়েনে মান্জ্যর মনানিরে হুজি গরে, তেল যিয়েন তার মুয়োনরে জোল্জোল্যে গরে, আর রুটি যিয়েনে তা মনানত্ বল্ আনে। 16 লগেপ্রভুর বানেয়্যে বেক গাজ-বাশছুন্ বোউত্ ঝড় পান; তার লাগেয়্যে লেবাননর্ এরস গাছ্চুনেয়ো ঝড় পান্। 17 সেই গাছ্চুনোত্ পেখ্কুনে ঘর বানান্; সারস পেখ্কুনেয়ো বেরস গাজত্ ঘর বানান্। 18 অজল্ অজল্ মুড়ো-মুড়িগুনোত্ ঝাড়্বো ছাগল থান; মুড়োগুনোর্ খাবত্ শাফন দলুনে আশ্রয় নেযান্। 19 ঋতু ভাগ গুরিবাত্তে তুই চানান্ বানেয়োচ্; তর্ সময় মজিম বেলানে ডুবেগোই। 20 তুই আন্ধারান্ আনিলে রেত্ অয়, ঝারর্ বেক য়েমানুনে সেক্কে ঘুরি ঘুরি বেড়ান্। 21 দামারা সিংহগুনে শিগের্ তোগেবাত্তে যেইনে রঅ ছাড়ন্, গোজেন ইদু তারা হানা চান্। 22 বেলান উদিলে তারা যান্দোই আর তারা গাদত্ সমন। 23 সেক্কে মানুচ্চুনে তারা কামত্ নিগিলোন্, সাজোন্যে সং কাম গরন্। 24 ও লগেপ্রভু, তুই ভালোক্কানি বানেয়োচ্; তর্ জ্ঞান্দোই সিয়েনি বানেয়োচ্; তর্ বানেয়্যে জিনিজে দুনিয়্যেগান ভরা। 25 উইয়োবু দাঙর্, দোজ্যে সাগর- সিয়েনত্ ঘুরি বেড়েয়্যে চিগোন-দাঙর গুণি ন-পুরেইয়্যে জেদা প্রাণি ভরা আগন্। 26 সিয়েন উগুরে জাহাজ চলের্, সিয়েনত্ লিবিয়াথনেয়ো আঘে; তারে তুই সাগরত্ খারা হবাত্তে বানেয়োচ্। 27 তারা বেক্কুনে তঅ মুয়ো কিত্তেন্দি চেই আগন্, যেনে ঠিগ্ সময়োত্ তুই তারারে হানা দুয়োচ্। 28 তুই তারারে দিলে তারা তুলি নেযান্; তুই আঢ্তান খুলিলে তারা গম্ গম্ জিনিস্ছানি পেইনে হুজি অন্। 29 তুই মুয়োন লুগেলে তারা দরান্; তুই তারার জিংকানি-বোইয়্যেরান্ নেযেলে তারা মুরি যান, আরঅ তারা ধূল্যে ওই যান্। 30 তর্ আত্মাগান পাদেলে তারা সৃট্টি অন; তো নুয়ো নুয়ো পরাণ দিইনে পিত্থিমীগানরে সাজাজ্। 31 লগেপ্রভুর বাঈনী পানাগান্ জিংকানিবর থোক্; তে যেনে নিজো কামত্ হুজি অয়। 32 তে পিত্থিমীর ইন্দি রিনি চেলে সিয়েনে গির্গিরেই; তার্ আত্ বাজেলে মুড়ো-মুড়িত্তুন্ ধূমো নিগিলে। 33 মর্ গোদা জিংকানিগান্ ধুরি মুই লগেপ্রভুর নাঙে গীদ্ গেম্; মুই যেদকদিন্ বাঁজি থেম সেদকদিন্ মঅ গোজেনর নাঙে নাঙ্ গিনেদে গীদ্ গেম্। 34 মর্ ধ্যান গরানা তাইদু মধুর ওক্; মুই লগেপ্রভুর লগে এগত্তর্ ওইনে ফুত্তি গুরিম। 35 পিত্থিমীর বুগোত্তুন্ পাপিগুনে উদি যাদোক্; পাজি মানুচ্চুনে বেক্কুনে শেজ্ ওই যাদোক্। ও মর্ পরাণান, লগেপ্রভুর বাঈনী গর্; লগেপ্রভুরে নাঙ্ গিনো। |
Copyright © 2021 Bangladesh Bible Society
Bangladesh Bible Society