গীতসংহিতা 103 - Chakma Bibleদায়ূদো গান। 1 ও মর্ পরাণান্, লগেপ্রভুর বাঈনী গর্; ও মর্ মনান, তা পবিত্রতাগানর বাঈনী গর্। 2 ও মর্ পরাণান্, লগেপ্রভুর বাঈনী গর্; তার কনঅ উপকার কধা ভুলি ন-যেচ্। 3 তর্ বেক পাপ্পানি তে খেমা গরে; তে তর্ বেক পিড়েগানি গম্ গুরি পারে। 4 তে মরণ জাগাত্তুন্ তঅ জিংকানিগান উদ্ধোর্ গরে; তে তরে অমকদ কোচ্পানালোই আর মেয়্যেলোই ঘিরি রাগায়। 5 যিয়েনে ভালেদি আনে সেধোক্ক্যেন্ বেক জিনিস্ছোই তে তরে আওজ্ পুরেই দিবো; তে ঈগল পেগো ধোক্ক্যেন্ তরে নূয়ো বল্ দে। 6 লগেপ্রভু যগাজ্যে কাম গরে; তে গমেডালে অত্যেচারিগুনোর বিচের গরে। 7 কিত্তেই কি গরে সিয়েন তে মোশিরে জানেয়্যে; তা কামানি তে ইস্রায়েলীয়গুনোরে চেবাত্তে দিয়্যে। 8 লগেপ্রভু দোয়্যে-মেয়্যেন্দি ভরা; তে সহজে বেজার্ ন-অয়, তার অমকদ কোচ্পানার থুম্ নেই। 9 তে দুষিগুনোর বিরুদ্ধে দিন্কে দিন আবিত্তি ন-গরে, উমরর্ রাগ্কানরে ন-পুযে। 10 আমা পাপর্ সাজা যেত্তমান্ আমার পাওনা সেত্তমান্ তে আমারে ন-দে; আমা অন্যেয় মজিম অ সাজা ন-দে। 11 পিত্থিমীত্তুন দেবাবো কুদ্দুর্ যেধোক্ক্যেন দুযি নেই, সেধোক্ক্যেন তা ভক্তগুনো উগুরে তার্ অমকদ কোচ্পানার্অ দুযি নেই। 12 পোজিমেত্তুন্ ধুরি পূগেন্দি যেত্তমান্ দূরোত্, আমা বেক পাপ্পানি তে সেত্তমান্ দূরোত্ সোরেই দিয়্যে। 13 পুয়ো-ছাগুনো উগুরে বাব্পোর যেত্তমান্ মেয়্যে আঘে সেধোক্ক্যেন্ তা ভক্তগুনো উগুরে তার মেয়্যে আঘে। 14 কিবাবোত্যে গুরি আমারে বানেয়্যে সিয়েন দঅ তার জানা আঘে; আমি যে ধূল্যে বাদে আর্ কিচ্চু নয় সিয়েন তার ইদোত্ আঘে। 15 ঘাস আয়ু ধোক্ক্যেন মান্জ্যর্ আয়ুগান, মাদ ফুলো ধোক্ক্যেন্ তে ফুদি উদে। 16 ফুলো উগুরেন্দি বোইয়্যের্ বেঈ গেলে ফুল্লো আর্ ন-থায়; যে জাগানত্ সেই ফুল্লো ফুট্যে সেই জাগায়ানেয়ো আর তারে ইদোত্ ন-রাগায়। 17-18 মাত্তর্ যিগুনে লগেপ্রভুর ভক্ত, যিগুনে তার সুদোমানি মানি চলন্ আর তার সুদোম মজিম চলেদে ইন্দি খিয়েল রাগান্, তারা উগুরে তার অমকদ কোচ্পানা আর তার বিশ্বেজছান্ উমরত্যে থেবঅ, বংশর পর বংশ ধুরি থেবঅ। 19 লগেপ্রভু স্বর্গত্ তা সিংহাসনান থিদেবর্ গোজ্যে; বেক্কানি উগুরে তার রাজাগিরি। 20 ও লগেপ্রভুর বোলী দূত্তুন, যিগুনে তা কধার বাধ্য থেইনে তা উগুমানি পালন গরর্, তুমি তার্ বাঈনী গরঅ। 21 ও লগেপ্রভুর সেবাগুরিয়্যে বলীদলুন্ যিগুনে তা আওজ্চানি পালন গরর্, তুমি তার্ বাঈনী গরঅ। 22 ও লগেপ্রভুর রেজ্যগানির বেক জাগায়ানিত্ তার বানেয়্যে বেক্কানি, তুমি তার বাঈনী গরঅ; ও মর্ পরাণান, লগেপ্রভুর বাঈনী গর্। |
Copyright © 2021 Bangladesh Bible Society
Bangladesh Bible Society