গীতসংহিতা 101 - Chakma Bible

দায়ূদ গান।

¹ মুই তর্ অমকদ কোচ্‌পানা আর দোল্‌বিচেরর্ গীদ্ গেম্; ও লগেপ্রভু, মুই তঅ নাঙে নাঙ্ গিনেদে গীদ্ গেম্।

² দোল্ জিংকানি কাদেবাত্তে মুই মনান্ দিম; কক্ক্যে তুই মইদু এবে? মঅ নিজো ঘরত্ মুই গম মনে থেম্।

³ মুই বজঙ্ কনঅ কিজু মঅ চোগো মুজুঙোত্ ন-রাগেবে। বজঙ্ পধেদি যেয়্যে মানুচ্চুনোর কামানি মর্ চোগোছাল্; সিয়েনিয়ে মরে আক্‌সো রাগেই ন-পারিবো।

⁴ মঅ মনানত্ মুই কুজুরোমিগানরে জাগা ন-দিম; ভান্ন্যেয় সমারে মর্ কনঅ মিজেমিজি কারবার্ নেই।

⁵ যিগুনে ভিদিরে ভিদিরে অন্য মান্‌জ্যরে ঈচ্ গরন তারারে মুই শেজ্ গুরিম; যিগুনো চোগ্‌কুনোত্ আর মনানিত্ বাড়্‌বোগান্ রোয়্যে তারারে মুই সোজ্য ন-গুরিম।

⁶ দেজর্ বিশ্বেজি মানুচ্চুনো ইন্দি খিয়েল্ থেবঅ যেনে তারা মঅ সমারে বজত্তি গুরি পারন্; যিগুনো জিংকানিগানি দোল্ তারা মঅ কামানি গুরিবাক্।

⁷ ছলনাবলাগুনে মঅ ঘরত্ বজত্তি গুরি ন-পারিবাক্; মিজেকধা কোইয়্যেগুনে মঅ কামত্ অদে অদে থেই ন-পারিবাক্।

⁸ পত্তি বেন্যে দেজ পাজি মানুচ্চুনোরে মুই শেজ্ গুরিম, যেনে লগেপ্রভুর শঅরত্তুন্ পত্তি অন্যেয়গুরিয়্যেরে পিত্‌থিমীত্তুন্ তুলি দিয়্যে অয়।