গীতসংহিতা 10 - Chakma Bible

¹ ও লগেপ্রভু, কিত্তেই তুই দূরোত্ থিয়্যেই আগচ্? দুঘোর্ দিনোত্ কিত্তেই তুই নিজোরে লুগেই রাগেয়োচ্?

² পাজি মানুচ্চুনে বার্‌‌বো গরানার্ কারনে দুঘি মানুচ্চুনোরে লড়ান্, মাত্তর্ নিজো কুজুরোমিয়ে তে নিজে ধরা পড়ে।

³ পাজি মান্‌‌জ্যে তার্ মনর্ ভান্ন্যেই আওজর্ বার্‌বো গরে; লুভি মান্‌‌জ্যে লগেপ্রভুরে অভিশাব দে আর তারে ঈচ্ গরে।

⁴ পাজি মানুচ্চো বার্‌‌বো গরানার্ কারনে লগেপ্রভুরে অগ্রাজ্য গরে; তা কুজুরোমির্ পিজেদি এ মনভাবপান্ এলঅ- গোজেন বিলিনে কনজন নেই।

⁵ নিত্য তে ফলাইদে পধেদি উজেই যায়; তা চোখকুন্ তর্ শাজন্-বেবস্থাগানরে লাঘ্ ন-পায়, কিয়া সিয়েন্ বোউত্ উগুরে; তার্ বেক্ শত্রুগুনোরে তে ঈচ্ গরে।

⁶ তে মনে মনে কয়দে, “এমন্ কিজু নেই যিয়েনে মরে লারেই পারে; মর্ দজা কনঅ কালত্ ন-অবঅ।”

⁷ তা মুয়োন্ অভিশাবে, ঠোগেয়্যে আর অত্যেচারর্ কধালোই ভরা; তা জিলানত্ রোইয়্যেদে অন্যেয় আর ভান্ন্যেয়র্ কধা।

⁸ আদাম ইদু হবর্ ন-পেইয়্যে জাগাত্ তে হাপ্ দি থায়; হবর্ ন-পেইয়্যে জাগাত্ তে নিদ্দুজি মান্‌‌জ্যরে খুন্ গরে আর নাদা মানুচ্চুনো উগুরে ভিদিরে ভিদেরে খিয়েল্ রাগায়।

⁹ তে আন্দলত্তুন্ সিংহ ধোক্ক্যেন্ গুরি হাফ্ দি থায়; দুঘি মানুচ্চোরে ধুরিবাত্তে তে সিয়েন গরে, জালত্ ফেলেইনে তে তারে ধরে।

¹⁰ সে পরেদি তে তারারে নিগুজ্ গরে; সে অভাগ্যত্যেগুনে তা ফালত্ পড়ন্।

¹¹ তে মনে মনে কয়, “ইন্দি গোজেনর্ খিয়েল্ নেই; তে মুয়োন্ ফিরেই আঘে, কনদিন্‌‌অ ন-দেগিবো।”

¹² ও লগেপ্রভু, উঠ্; ও গোজেন, তঅ আঢ্‌তান বাবেই দে, দুঘি মানুচ্চুনোরে ভুলি ন-যেচ্।

¹³ পাজি মানুচ্চো কিত্তে গোজেনরে তুচ্ছো বিলি মনে গরে? তে কিত্তে মনে মনে কয়, “তে মইদু কনঅ ইজেব্ ন-চেবঅ”?

¹⁴ মাত্তর্ ও গোজেন, দুঘ্-কট্টগানিয়ে তঅ চোগ্‌কুনোরে ফাকি দি নঅ-পারন্; তুই নিজো আঢে ইয়েনর্ বেবস্থা গর্। অসহায়ানে দঅ তঅ আঢত্ নিজোরে তুলি দে; মা-বাপ নেইয়্যেগুনোরে তুই সাহায্য গুরি থাচ্।

¹⁵ পাজি আর বজং মানুচ্চুনোর্ খেমতাগান তুই শেজ্ গুরি দিচ্; তার্ বেক্ অন্যেয়র্ ইজেবপানি তুই চেই নেযেচ্।

¹⁶ লগেপ্রভু উমরর্ রাজা; তা দেজ্‌‌ছানত্তুন্ অন্য জাদ্‌তুনে ভস্ত ওই যেবাক্।

¹⁷ ও লগেপ্রভু, নম্রগুনোর্ মন আওজর্ কধানি তুই শুন্যচ্; তুই তারারে সাহস দুয়োর্, তারার্ কানানিগানি তুই শুন্যচ্।

¹⁸ তুয়ই সিয়েন্ গোজ্যস্, যেনে মা-বাপ্ নেইয়্যে আর অত্যেচার ওইয়্যে মানুচ্চুনোর্ পক্ষে তুই থিয়্যেই পারচ্, যেনে এ দুনিয়ের্ মানুচ্চুনে তারারে আর্ দর্ দেগেই ন-পারন্।