গম্ উপদেজ্ 8 - Chakma Bible

গম্ বুদ্ধি পানা

¹ গম্ বুদ্ধিগানে কি ন-ডাগে? বিচের বুদ্ধিগানে কি রঅ ছাড়িনে কধা ন-কয়?

² পধ কুরে অজল্ জাগাত্ যিয়েনত্ পথ্‌তান দ্বপদা ওইয়্যে সিয়েনত্ গম্ বুদ্ধিগান থিয়্যেই থায়।

³ শঅরত্ যেবার পদথ্ গেদো কুরে তে রঅ ছাড়িনে কয়,

⁴ ও মানুচ্চুন্, মুই তমারে ডাগঙর্, বেক মানুচ্চুনো ইদু রঅ ছাড়িনে কঙর্।

⁵ ভুল্ মানুচ্চুন, চালাগ্ অবাত্তে বুদ্ধি গরঅ; জ্ঞাননেইয়্যে মানুচ্চুন্, বিচেরবুদ্ধি শিগো।

⁶ শুনো, মুই দোল্ কধা কোম, গম্ কধা কবাত্তে মঅ মুয়োন হুলিম।

⁷ মুই সত্য কধা কোম্; বজং কধানি মইদু জঘন্য লাগে, সেনত্তে মুই সিয়েনি ন-কোম্।

⁸ মঅ মুয়ো কধানি বেক্কানি ঠিগ, সিয়েনিত্ বেঙাটেরা বা কুজুরোমি নেই।

⁹ যিগুনোর বিচেরবুদ্ধি আঘে তারা ইদু মঅ কধাগান দোল্; যিগুনোর জ্ঞান আঘে তারা ইদু সিয়েনি দোল্ কধা।

¹⁰ রূবোত্তুন্ বেশ্ মঅ সল্লাগানি শিগিবাত্তে আওজি অ, বেঈ লোইয়্যে সনাত্তুন্ বেশ্ জ্ঞান পেবাত্তে আওজি অ;

¹¹ কিত্তে প্রবাল পাত্তরত্তুন্‌অ বেশ্ গম্ বুদ্ধিগানি মংগা; তর্ চাইদ্যে ধোক্ক্যেন কনঅ জিনিজো সমারে সিয়েনির সং ন-অয়।

¹² মুই গম্ বুদ্ধি, মুই চালাগ্ অইদ্যে বুদ্ধি সমারে বজত্তি গরঙর্; জ্ঞান আর গম-ভান্ন্যেই বুঝিবার খেমতা মর্ আঘে।

¹³ লগেপ্রভুরে ভোক্তি গুরিনে দরানা মানে পাজি কামানিরে ঘিনেনা; বার্‌বো গরানা, বার্‌বো কধা, বজং বেবহার আর বেঙা টেরা কধানি মুই ঘিনেং।

¹⁴ সল্লা আর তরিৎ বুদ্ধি মত্তুন্ এজে; মুই বিচেরবুদ্ধি, মুই খেমতা দুয়োং।

¹⁵ রাজাগুনে রাজাগিরি গরন্ মঅ মাধ্যমে, আর শাজন্‌গুরিয়্যেগুনে বানান্ ন্যায়বলা সুদোম;

¹⁶ মঅ মাধ্যমে শাজন্‌গুরিয়্যেগুনে আর নেতাগুনে শাজন-কামানি চালান; তারা বেক্কুনে বিচেরগর্ কাম গরন্।

¹⁷ যিগুনে মরে কোচ্‌পান মুইয়ো তারারে কোচ্‌পেম; যিগুনে মনদিইনে মরে তগান্ তারা মরে পান্।

¹⁸ ধন আর সর্মান মত্তুন্ এজে, এজে উমর সোম্বোত্তি আর ভালেদি।

¹⁹ সনাত্তুন্‌অ বেশ্, এন্ কি, খাটি সনাত্তুন্‌অ বেশ্ মর্ দিয়্যে ফলুন গম্; মুই যিয়েনি দুয়োং সিয়েনি বেঈ লোইয়্যে রূবোত্তুন্‌অ বেশ্ খাটি।

²⁰ মুই ন্যায়র পধেদি চলং, ন্যায়বিচেরর পথ্‌তান্ ধুরি চলং।

²¹ যিগুনে মরে কোচ্‌পান তারা ধন-সম্পদ পান; মুয়ই তারার ধনভান্ডালত্ ভোরেই দুয়োং।

²² লগেপ্রভুর কামর্ আরাম্ভত্, তা সিরিস্টির কামান আগেদি মুই তার্ এলুং;

²³ সেই পৌইল্যাত্তুন্ ধুরি, পিত্‌থিমী সিরিস্টির আগেত্তুন্ ধুরি, বেগ আগেত্তুন্ ধুরি মরে নেযা ওইয়্যে।

²⁴ যেক্কেনে কনঅ সাগর ন-এলঅ, ন-এলঅ কনঅ পয়নালা যিয়েনত্তুন্ পানি গায় গায় এদঅ, সেক্কেনে মুই জর্মেয়োং।

²⁵ মুড়ো-মুড়ি থিদেবর্ গুরিবার আগেদি মুই এলুং।

²⁶ যেক্কেনে পিত্‌থিমীগান্ আর মাদ-গাদ্ বা পিত্‌থিমীর এক্কো ধূল্যেচর তে ন-বানায়, সেক্কেনে মুই এলুং।

²⁷ তে যেক্কেনে দেবাবো থিদেবর্ গোজ্যে সেক্কেনে মুই সিদু এলুং; তে যেক্কেনে সাগর উগুরে চেরোকিত্তে দুযিগুন ঠিগ্ গোজ্যে, সেক্কেনে মুই সিয়েনত্ এলুং।

²⁸ তে যেক্কেনে উগুরেদি আগাজ্‌ছান থিদেবর্ গোজ্যে আর মাদি তলেদি দাঙর্ দাঙর্ পয়নালাগুন দরমর গুরি থিদেবর্ গোজ্যে,

²⁹ তে যেক্কেনে সাগর দুযিগান থির্ গোজ্যে যেন পানিগান তা পরিমান বারেদি পার্ ওই ন-এজে, যেক্কেনে তে পিত্‌থিমীর গড়াগান ঠিগ্ গোজ্যে,

³⁰ সেক্কেনে মুয়ই কালিগর্ ইজেবে তা কায়কুরে এলুং। দিনকে দিন মুই খুজি ওইনে তা মুজুঙোত্ নিত্য ফুত্তি গুরিদুং;

³¹ তা পিতথিমীগান্দোই ফুত্তি গুরিদুং, আহ্ মানুচ্চুনোরে নিইনে হুজি এলুং।

³² “মঅ পুয়োগুন, ইক্কিনে মঅ কধাগান শুনো; যিগুনে মঅ পধেদি চলন্ তারা সুগি।

³³ মঅ উগুমানি শুনো, জ্ঞানবলা অ, এলাফেলা ন-গোজ্য।

³⁴ যে মানুচ্চো মঅ কধানি শুনে আর পত্তিদিন মঅ দোরো ইদু জাগি থায় আর মঅ দোরো ফ্রেমান ইদু বাজ্জেই থেইনে তে সুগি;

³⁵ কিত্তে যে মরে পায় তে জিংকানি পায় আর লগেপ্রভুত্তুন্ দোয়্যে পায়।

³⁶ মাত্তর্ যে মরে ন-পায় তে নিজোরে ক্ষতি গরে; যিগুনে মরে ঘিনেন্ তারা বেক্কুনে মরণানরে গমপান্।”