গম্ উপদেজ্ 7 - Chakma Bible

¹ মঅ পুয়োবো, মঅ কধাগান শুন্ আর মর্ বেক উগুমানি তঅ মনঅ ভিদিরে থুবেই রাগা।

² মঅ উগুমানি পালা, সেক্কে তুই বাঁজিবে। মর্ দিয়্যে শিক্ষ্যেনি তঅ চোগোর্ মানেক্কুন্ ধোক্ক্যেন গুরি চুগি দি রাগা;

³ তঅ আঙুলুনোত্ সিয়েনি বানি রাগা, তঅ মনঅ খাতাদ্ সিয়েনি লিগি রাগা।

⁴ জ্ঞানানরে কঅ, “তুই মর্ বোন,” আর বুদ্ধিগানরে সমাজ্যে কঅ;

⁵ যেনে তারা তরে বেশ্যেগুনো আঢত্তুন্ রোক্ষ্যে গরন্, রোক্ষ্যে গরন সেই মিদে কধালোই ভরা ভান্ন্যেই পধেদি যেইয়্যে মিলেগুনো আঢত্তুন্।

বেশ্যেমিলেবোর্ ভাত্যেনা

⁶ মঅ ঘর জানালাগানন্দি মুই বারেদি চেলুং।

⁷ ভুল্ মানুচ্চুনো ভিদিরে মুই রিনি চেলুং, গাবুজ্যেগুনো ভিদিরে মুই এন এক্কো গাবুজ্যেরে খিয়েল্ গুরিলুং যিবের্ বুদ্ধির অভাব এলঅ।

⁸ তে সেই মিলেবো ঘর কায়-কুরে পথ্‌তানদি যার্, সে পরেদি তে তা ঘর পথ্‌তানদি যেইনে সুমিলো;

⁹ সেক্কে দিনো পহ্‌রান্ মিলেই যেবার পরেদি সাজোন্যে ওইনে রেদো গভিন্ আন্ধারান্ লামি এলঅ।

¹⁰ সে অক্তত্ এক্কো মিলে তা লগে দেগা গুরিবাত্তে নিগিলি এলঅ; তা কিয়্যেত্ বেশ্যেমিলের্ পজাক্ উজ্যে আর তা মনান্ এলদে ছলনালোই ভরা।

¹¹ তে ভান্ন্যেই পধেদি যেইয়্যে মিলে, রঅ ছাড়ি ছাড়ি কধা কয়, তা টেঙানি কনদিন্অ ঘরত্ ন-থায়;

¹² কনদিন পদথ্, কনদিন বাজারত্, পত্তি পধ মুয়োত্ তে উৎ পাদি থায়।

¹³ তে সেই গাবুজ্যেবোরে ধুরিনে চুমিলো আর লাজ্ নেই মুয়োদি কলঅ,

¹⁴ “মঅ ঘরত্ উদোলোলি-উৎসর্বর য়েরা আঘে, এচ্চ্যে মুই মান্যেগান্ ছিড়েয়োং।

¹⁵ সেনত্তে মুই তমা লগে দেগা গুরিবাত্তে নিগিলি এচ্চ্যং; মুই তরে তোগেইনে তরে পেয়োং।

¹⁶ মিসর দেজর নানান্ বাবোত্যে বানেয়্যে কাবড়লোই মুই বিচ্ছোনান্ বিজেয়োং;

¹⁷ গন্ধরস, অগুরু আর দারচিনিলোই মঅ বিচ্ছোনান্ তুম্বাজ্ গোজ্যং।

¹⁸ এজঅ, আমি বেন্যেমাদান্ সং রঙ্গ-ফুত্তি গুরিই, গভিন্ কোচ্‌পানালোই হুজি রাজি গুরিই।

¹⁹ মঅ নেক্কো ঘরত্ নেই, তে দূরোত্ যেয়্যেগোই;

²⁰ তে থৈল্যে ভরা টেঙা নেযেয়্যে, পূন্নিমার্ আগে ঘরত্ ন-ফিরিবো।”

²¹ মন ভুলেয়্যে কধাবাত্তালোই তে তারে ভান্ন্যেই পধেদি নেযেল, মিদে কধালোই তারে ভুলেই নেযেল,

²² আর তে সেক্কেনে সেই মিলেবো পিজেদি গেলঅ। গোরুগুন যেবাবোত্যেগুরি কাবা পদত্ যান্, শিগোল্লোই বান্যে বাঁজে মান্‌জ্যে যেধোক্ক্যেন তা সাজাগান্ পায়,

²³ পেগ্‌কুনে যেবাবোত্যেগুরি ফালত্ পুরিবাত্তে যান আর যেরেদি তা কলিজেত্ সেল্ ফুদি যায়, সেধোক্ক্যেন গুরি সেই মানুচ্চো হবর্‌অ ন-পায়, ইয়েনত্ তার পরাণান্ যেবঅ।

²⁴ মঅ পুয়োগুন, ইক্কিনে তুমি মঅ কধানি শুনো, মুই যিয়েনি কঙ্ সিয়নি কান পাদি শুনো।

²⁵ তমা মনানি সেই মিলেগুনো ইন্দি যেবাত্তে ন-দুয়ো, তুমি সিগুনো পধেদি ন-ঘুজ্য;

²⁶ কিত্তে তে বোউত্ মান্‌জ্যরে সর্বনাশ গোজ্যে, আর যিগুনোরে তে শেজ্ গোজ্যে সিগুন জনেদি ভালোক্কুন্ এলাক্।

²⁷ তা ঘরান অলদে মরণ জাগাত্ যেবার পথ্‌তান, যে পথ্‌তান মরণ ঘরত্ লাম্মেগোই।